IRCTC
ઓનલાઈન ટિકિટ બુકિંગ એપ IRCTC ડાઉન છે. યુઝર્સને ટિકિટ બુક કરાવવામાં મુશ્કેલીનો સામનો કરવો પડી રહ્યો છે. સોશિયલ મીડિયા પર લોકો આ અંગે ફરિયાદ કરી રહ્યા છે. રેલવે તરફથી હજુ સુધી કોઈ ટિપ્પણી આવી નથી.
ગુરુવારે ભારતીય રેલવેની એપ અને વેબસાઈટ ડાઉન હોવાને કારણે લોકોને ટિકિટ બુક કરાવવામાં ભારે મુશ્કેલીનો સામનો કરવો પડી રહ્યો છે. સોશિયલ મીડિયા પર ઘણા યુઝર્સ આ અંગે ફરિયાદ કરી રહ્યા છે. ઓનલાઈન આઉટેજ પર નજર રાખતી વેબસાઈટ DownDetector અનુસાર, IRCTC ડાઉન હોવાના ઘણા અહેવાલો પ્રાપ્ત થયા છે. ડાઉનડિટેક્ટરના જણાવ્યા અનુસાર, સૌથી વધુ ફરિયાદો સવારે 10:25ની આસપાસ મળી હતી.
ખાસ કરીને નવી દિલ્હી, અમદાવાદ, સુરત, મુંબઈ, મદુરાઈ, ચેન્નાઈ, બેંગલુરુ, હૈદરાબાદ, નાગપુર, જયપુર, લખનૌ અને કોલકાતાના લોકોએ એપ ડાઉન હોવાની જાણ કરી હતી. IRCTC એપ ખોલવા પર, ‘એનેબલ ટુ પરફોર્મ એક્શન ડ્યુ મેન્ટેનન્સ એક્ટિવિટી’ લખેલું હોય છે. હજુ સુધી આ અંગે રેલવે તરફથી કોઈ પ્રતિક્રિયા આપવામાં આવી નથી.
સોશિયલ મીડિયા પર લોકો ફરિયાદ કરી રહ્યા છે
લોકો સોશિયલ મીડિયા પર IRCTC ડાઉન હોવાની ફરિયાદ કરી રહ્યા છે. એક યુઝરે લખ્યું કે IRCTCની તપાસ થવી જોઈએ. ચોક્કસ કોઈ કૌભાંડ ચાલી રહ્યું છે. એપ કે વેબસાઈટ ખૂલે ત્યાં સુધીમાં ટિકિટો વેચાઈ ચૂકી હશે. અન્ય એક યુઝરે લખ્યું કે ભારત વિશ્વનું સૌથી મોટું આઈટી હબ છે, છતાં તે વેબસાઈટને ઠીક કરવામાં સક્ષમ નથી. તમે કર એકત્રિત કરી શકો છો, પરંતુ બદલામાં સારી સેવા આપી શકતા નથી. આ શરમજનક બાબત છે.
આ મહિનાની આ બીજી મોટી આઉટેજ છે
ભારતીય રેલ્વેમાં આ મહિનામાં આ બીજી મોટી આઉટેજ છે. અગાઉ 9 ડિસેમ્બરના રોજ સમારકામના કારણે ઈ-ટિકિટીંગ પ્લેટફોર્મ એક કલાક માટે બંધ કરવામાં આવ્યું હતું. આ સમય દરમિયાન પણ તત્કાલ ટિકિટ બુક કરાવનારા લોકોને સૌથી વધુ અસર થઈ હતી.
IRCTCએ પોતાની એક એડવાઈઝરીમાં કહ્યું હતું કે જે લોકો તેમની ટિકિટ કેન્સલ કરવા ઈચ્છે છે તેઓ કસ્ટમર કેર પર ફોન કરીને આમ કરી શકે છે. આ સિવાય તેઓ ટિકિટ ડિપોઝિટ રિસિપ્ટ (TDR) માટે ઈમેલ કરી શકે છે. IRCTCએ સંપર્ક નંબર 14646, 08044647999, 08035734999 આપ્યા હતા. ટિકિટ સંબંધિત સમસ્યાઓના ઉકેલ માટે, etickets@irctc.co.in પર મેઇલ મોકલી શકાય છે.
