Gmail Spam Issue: જીમેલ પર ઈમેઈલ સ્પામમાં જવાની સમસ્યાનું નિરાકરણ કેવી રીતે લાવવું?
આજના ડિજિટલ યુગમાં જીમેલ (Gmail) આપણા જીવનનો અભિન્ન હિસ્સો બની ગયું છે. નોકરીની અરજીઓ, બેંકિંગ એલર્ટ્સ, (OTP), વ્યવસાયિક અપડેટ્સ અને મહત્વપૂર્ણ દસ્તાવેજો મેળવવા માટે આપણે ઈમેઈલ પર નિર્ભર છીએ. જોકે, ઘણીવાર એવી ફરિયાદ જોવા મળે છે કે આપણા અત્યંત જરૂરી ઈમેઈલ ઇનબોક્સમાં આવવાને બદલે સીધા ‘સ્પામ’ (Spam) ફોલ્ડરમાં જતા રહે છે. આનાથી આપણે મહત્વપૂર્ણ માહિતી ચૂકી જઈએ છીએ. જો તમારી સાથે પણ આવું બની રહ્યું હોય, તો ચિંતા કરવાની જરૂર નથી. જીમેલની કેટલીક સેટિંગ્સમાં ફેરફાર કરીને તમે આ સમસ્યાને કાયમ માટે દૂર કરી શકો છો.
ઈમેઈલ શા માટે સ્પામમાં જાય છે?
જીમેલનું સ્પામ ફિલ્ટર ખાસ કરીને શંકાસ્પદ અને અનિચ્છનીય મેઈલ્સને રોકવા માટે બનાવવામાં આવ્યું છે. પરંતુ ક્યારેક જીમેલની સિસ્ટમ ભૂલથી જે-તે મેઈલને ‘અવિશ્વસનીય’ માની લે છે. આ સમસ્યા મુખ્યત્વે ત્યારે થાય છે જ્યારે: ૧. જે વ્યક્તિ કે સંસ્થા તમને મેઈલ મોકલી રહી છે, તે તમારી ‘કોન્ટેક્ટ લિસ્ટ’માં નથી. ૨. અગાઉ ક્યારેક તે સेंडरના મેઈલને તમે સ્પામ તરીકે માર્ક કર્યા હોય. ૩. તમારા જીમેલ ફિલ્ટર સેટિંગ્સમાં કોઈ ખામી હોય.
સમસ્યાના નિરાકરણ માટેના અસરકારક પગલાં
‘Not Spam’ તરીકે માર્ક કરો: જો કોઈ જરૂરી ઈમેઈલ સ્પામમાં જાય, તો તેને ખોલો અને ઉપર આપેલા ‘Not Spam’ વિકલ્પ પર ક્લિક કરો. આ પગલું જીમેલને સ્પષ્ટ સંકેત આપે છે કે તે સુરક્ષિત છે. કોમ્પ્યુટર પર સ્પામ સેક્શનમાં જઈને ઈમેઈલ પસંદ કરો અને ‘Report not spam’ પર ક્લિક કરો. મોબાઈલ યુઝર્સ પણ એપમાં આ જ રીતે સેટિંગ કરી શકે છે.
કોન્ટેક્ટ લિસ્ટમાં ઈમેઈલ સેવ કરો: ગૂગલ પોતે સલાહ આપે છે કે જો તમે કોઈ ચોક્કસ ઈમેઈલ એડ્રેસને તમારા ‘Google Contacts’ માં સેવ કરો છો, તો જીમેલ તેને વધુ વિશ્વસનીય માને છે. તેથી, મહત્વપૂર્ણ કંપનીઓ, બેંકો કે સરકારી સંસ્થાઓના ઈમેઈલ એડ્રેસને ગૂગલ કોન્ટેક્ટ્સમાં ચોક્કસ સેવ કરો.
ફિલ્ટર સેટિંગ્સ તપાસો: જીમેલ સેટિંગ્સમાં જઈને ‘Filters and Blocked Addresses’ ચેક કરો. ઘણીવાર ભૂલથી કોઈ એડ્રેસ બ્લોક લિસ્ટમાં આવી જાય છે, તેને દૂર કરવાથી મેઈલ આવવા લાગશે.
સુરક્ષિત સબસ્ક્રિપ્શન: અજાણી વેબસાઈટ કે ન્યૂઝલેટર માટે સાઈન-અપ કરતી વખતે સાવધ રહો. અતિશય પ્રમોશનલ મેઈલ્સ ઇનબોક્સને ભરી દે છે અને ઘણીવાર જીમેલ તેના આધારે ફિલ્ટરિંગ કરે છે.
