EPFO: બંધ પડેલું PF એકાઉન્ટ કેવી રીતે શોધવું? જાણો EPFO ના નવા ઈ-પ્રાપ્તિ પોર્ટલની સરળ પ્રક્રિયા
નોકરી બદલતી વખતે ઘણી વખત કર્મચારીઓ જૂની કંપનીનું પીએફ (PF) એકાઉન્ટ નવી કંપનીના ખાતા સાથે લિંક કરવાનું ભૂલી જાય છે. અથવા તો કેટલીક વખત ટેકનિકલ કારણોસર આ ટ્રાન્સફર પ્રક્રિયા પૂર્ણ થઈ શકતી નથી. પરિણામે, મહેનતની કમાણી એ જૂના કે બંધ પડેલા ખાતાઓમાં પડી રહે છે અને સમય જતાં લોકો તેને ભૂલી પણ જાય છે.
કર્મચારીઓની આ મોટી મુશ્કેલીનો કાયમી ઉકેલ લાવવા માટે સરકારે ‘ઈ-પ્રાપ્તિ’ (E-PRAAPTI) નામનું નવું ડિજિટલ પોર્ટલ તૈયાર કર્યું છે. આ પોર્ટલ સંપૂર્ણપણે આધાર (Aadhaar) આધારિત સિસ્ટમ પર કામ કરે છે. તેની મદદથી તમે તમારા જૂના પીએફ ખાતા શોધી શકો છો અને તે રકમને હાલના ચાલુ યુએન (UAN) ખાતામાં ટ્રાન્સફર કરી શકો છો.
આ નવું પોર્ટલ કેવી રીતે કામ કરશે?
ઈ-પ્રાપ્તિ પોર્ટલની પ્રક્રિયાને ખૂબ જ સરળ બનાવવામાં આવી છે જેથી સામાન્ય નોકરીયાત વ્યક્તિ પણ તેનો ઉપયોગ કરી શકે.
ઓળખની ચકાસણી: જ્યારે તમે પોર્ટલ પર લોગિન કરશો, ત્યારે તે આધાર OTP દ્વારા તમારી ઓળખની ખાતરી કરશે.
બે વિકલ્પો ઉપલબ્ધ: એકવાર જૂનું ખાતું શોધી લીધા પછી તમારી પાસે બે રસ્તા હશે:
ફંડ ટ્રાન્સફર: તમે જૂના ખાતાની રકમને હાલના પીએફ ખાતામાં સ્થાનાંતરિત કરી શકો છો, જેથી નિવૃત્તિનું ભંડોળ એક જગ્યાએ એકત્રિત રહે.
ડાયરેક્ટ વિથડ્રોઅલ (ક્લેમ): જો તમને નાણાંની તાત્કાલિક જરૂર હોય, તો તમે તે રકમ સીધી ઉપાડવાનો વિકલ્પ પણ પસંદ કરી શકો છો.
આ વ્યવસ્થાથી કર્મચારીઓને પીએફ ઓફિસોના ચક્કર મારવામાંથી કાયમી મુક્તિ મળશે.
શું જૂની વિગતો વગર પણ જૂનું ખાતું શોધી શકાશે?
ઘણા લોકોના મનમાં પ્રશ્ન હોય છે કે જો જૂનો પીએફ નંબર કે કંપનીની વિગતો યાદ ન હોય, તો શું પોર્ટલ મદદ કરશે?
સાંસદમાં પૂછાયેલા આ પ્રશ્નના જવાબમાં કેન્દ્રિય મંત્રી શોભા કરંદલાજેએ સ્થિતિ સ્પષ્ટ કરી હતી. તેમણે જણાવ્યું કે હાલમાં સરકાર પાસે એવી કોઈ વ્યવસ્થા નથી જેનાથી સંપૂર્ણ વિગતો વિના ખાતું શોધી શકાય. આનો અર્થ એ થયો કે જૂનું પીએફ એકાઉન્ટ શોધવા માટે તમારી પાસે જૂના ખાતાની કોઈ વિગત હોવી જરૂરી છે અથવા તો તે ખાતું આધાર સાથે લિંક (Aadhaar Seeded) થયેલું હોવું અનિવાર્ય છે.
કાગળની ઝંઝટ અને દલાલોમાંથી મુક્તિ
આ નવા ડિજિટલ ફેરફારથી પીએફ સંબંધિત કાગળકામ લગભગ નાબૂદ થઈ ગયું છે.
અગાઉ કેવાયસી (KYC) અપડેટ કરાવવું કે નામ-તારીખ સુધારવી જટિલ પ્રક્રિયા હતી, પરંતુ હવે ઓનલાઈન ‘જોઈન્ટ ડિક્લેરેશન’ (Joint Declaration) ફોર્મ જમા કરાવીને આ કામ ઝડપથી થઈ જાય છે. પૂરી પ્રક્રિયા પારદર્શક અને ઓનલાઈન હોવાથી હવે ક્લેમ સેટલમેન્ટમાં વિલંબ કે કોઈ દલાલીની શક્યતા રહેશે નહીં.
પીએફ સભ્યો માટે વ્યાજ જમા થવાના ખુશખબર
જૂના ખાતાઓને જોડવાની આ સુવિધા ઉપરાંત, પીએફ ખાતાધારકો માટે વધુ એક સારા સમાચાર છે.
ઈપીએફઓ (EPFO) એ નાણાકીય વર્ષ ૨૦૨૫-૨૬ માટે નક્કી કરાયેલા ૮.૨૫% વ્યાજના નાણાં સભ્યોના પીએફ ખાતામાં જમા કરવાનું શરૂ કરી દીધું છે. દેશભરના લાખો કર્મચારીઓના મોબાઈલ પર વ્યાજ જમા થવાના એસએમએસ (SMS) પણ આવવા લાગ્યા છે. પીએફ સભ્યો ઈ-પાસબુક (E-Passbook) અથવા ઉમંગ (UMANG) એપ દ્વારા પોતાનું બેલેન્સ ચકાસી શકે છે.
