જેફરીઝની નજરે હોસ્પિટલ સેક્ટરના ટોચના 6 શેરો, ઘટાડામાં રોકાણ કરવાની સુવર્ણ તક!
શેરબજારમાં છેલ્લા કેટલાક દિવસોથી હોસ્પિટલ સેક્ટરના શેરોમાં ભારે ઉથલપાથલ જોવા મળી રહી છે. સરકાર દ્વારા દવાઓ અને મેડિકલ ઉપકરણોની મનમાની કિંમતો સામે કડક વલણ અપનાવવામાં આવ્યું છે, જેના કારણે રોકાણકારોમાં ડરનો માહોલ છે. સુપ્રીમ કોર્ટે પણ કેન્સરની દવાઓ પર ભારે નફાખોરી (માર્જિન) સામે ગંભીર નારાજગી વ્યક્ત કરી હતી. પરિણામે, અગ્રણી હોસ્પિટલોના શેર નીચા સ્તરે આવી ગયા છે. જોકે, પ્રખ્યાત વિદેશી બ્રોકરેજ ફર્મ ‘જેફરીઝ’ (Jefferies) આ ઘટાડાને રોકાણ માટે એક શ્રેષ્ઠ તક તરીકે જોઈ રહી છે, કારણ કે આ કંપનીઓના મૂળભૂત ફંડામેન્ટલ્સ ખૂબ મજબૂત છે.
વેપારી માર્જિન અને સુપ્રીમ કોર્ટની ચિંતા
સરકાર મેડિકલ સાધનો અને જીવનરક્ષક દવાઓ પર ટ્રેડ માર્જિનને તર્કસંગત બનાવવા પર વિચાર કરી રહી છે. ફૂડ એન્ડ ડ્રગ એડમિન્સ્ટ્રેશન (FDA) એ અગાઉ નોંધ્યું હતું કે હોસ્પિટલોમાં વપરાતી સીરિંજ, આઈવી સેટ, કાર્ડિયાક કેથેટર અને પેસમેકર જેવી વસ્તુઓની ખરીદ કિંમત કરતા તેની MRP ૧૦ થી ૨૦ ગણી વધુ હોય છે. બીજી બાજુ, સુપ્રીમ કોર્ટે કેન્સરની એક દવા પર આશ્ચર્ય વ્યક્ત કરતા જણાવ્યું હતું કે જે દવાની ખરીદ કિંમત 2,700 રૂપિયા છે, તેની MRP 27,000 રૂપિયા રાખવામાં આવી છે. કોર્ટે આના પર ૧૬ ટકાનું સમાન માર્જિન કેપ લગાવવાનું સૂચન પણ કર્યું છે, જેના કારણે શેરોમાં વેચવાલી જોવા મળી છે.
જેફરીઝ દ્વારા પસંદ કરાયેલા 6 મુખ્ય શેરો અને ટાર્ગેટ
આ મુશ્કેલીઓ વચ્ચે પણ જેફરીઝે 6 મોટા હોસ્પિટલ શેરોમાં રોકાણ જાળવી રાખવાની સલાહ આપી છે અને તેમને ‘બાય’ (Buy) રેટિંગ આપ્યું છે:
૧. ફોર્ટિસ હેલ્થકેર (Fortis Healthcare): ટાર્ગેટ પ્રાઈસ ₹1,125
૨. ડો. અગ્રવાલ હેલ્થકેર (Dr. Agarwal’s Healthcare): ટાર્ગેટ પ્રાઈસ ₹600
૩. મણિપાલ હોસ્પિટલ્સ (Manipal Hospitals): ટાર્ગેટ પ્રાઈસ ₹870
૪. મેક્સ હેલ્થકેર (Max Healthcare): ટાર્ગેટ પ્રાઈસ ₹1,260
૫. અપોલો હોસ્પિટલ્સ (Apollo Hospitals): ટાર્ગેટ પ્રાઈસ ₹10,350
૬. મેદાંતા (Medanta / Global Health): ટાર્ગેટ પ્રાઈસ ₹1,660
નુકસાનમાંથી બહાર આવવાની અગાઉની રણનીતિ
બ્રોકરેજ ફર્મનું અનુમાન છે કે જો સરકાર માર્જિન કેપ લાગુ કરશે, તો હોસ્પિટલોની કુલ આવક પર અસર પડી શકે છે અને તેમના EBITDA માં ૨ થી ૫ ટકા સુધીનો ઘટાડો થઈ શકે છે. પરંતુ હોસ્પિટલો પાસે આ નુકસાનમાંથી ઉગરી જવાની પૂરી ક્ષમતા છે. અગાઉ જ્યારે હાર્ટ સ્ટેન્ટ સહિતની ઘણી વસ્તુઓના ભાવ 70 થી 85 ટકા સુધી ઘટાડવામાં આવ્યા હતા, ત્યારે પણ હોસ્પિટલોએ તેનો રસ્તો શોધી લીધો હતો. તેમણે આગામી 12 થી 15 મહિનામાં સારવારના અન્ય ખર્ચાઓ ધીમે-ધીમે વધારીને પોતાના નુકસાનની ભરપાઈ કરી લીધી હતી. અપોલો જેવી મોટી હોસ્પિટલોએ થોડા જ ત્રિમાસિક ગાળામાં નફાકારકતા પાછી મેળવી લીધી હતી.
લાંબા ગાળાના રોકાણકારો માટે સુવર્ણ અવસર
જેફરીઝનું માનવું છે કે હેલ્થકેર સેક્ટરની ડિમાન્ડ હજુ પણ ખૂબ મજબૂત છે. તાજેતરના ઘટાડાને કારણે આ શેરોના વેલ્યુએશન ખૂબ આકર્ષક બન્યા છે. અગાઉ જે શેર 25 થી 35 ના વેલ્યુએશન પર ટ્રેડ થઈ રહ્યા હતા, તે હવે ઘટીને 20 થી 27 (FY28 EV/EBITDA) ના સ્તરે આવી ગયા છે. ઇતિહાસ સાક્ષી છે કે જ્યારે પણ આવા નિયમનકારી નિયંત્રણો આવ્યા છે, ત્યારે શેરોએ 3 થી 6 મહિનામાં શાનદાર વાપસી કરી છે. તેથી, લાંબા ગાળાના રોકાણકારો માટે આ ઘટાડો નફાકારક એન્ટ્રી પોઇન્ટ સાબિત થઈ શકે છે.
