HDFC બેંક સામેના ક્રેડિટ સુઈસ AT1 બોન્ડ કેસ બહરીન કોર્ટમાં રદ: જાણો વિગતો અને દુબઈ બ્રાન્ચ અંગેનું વલણ
ભારતની સૌથી મોટી ખાનગી ક્ષેત્રની બેંક HDFC બેંક માટે એક અત્યંત રાહતજનક સમાચાર સામે આવ્યા છે. ક્રેડિટ સુઈસ AT1 બોન્ડ મામલે આંતરરાષ્ટ્રીય રોકાણકારો દ્વારા બહરીનમાં દાખલ કરવામાં આવેલા તમામ સાતેય મુકદ્દમા કોર્ટે ફગાવી દીધા છે. આ નિર્ણયથી બેંક સામેનો મોટો કાનૂની વિવાદ શાંત થયો છે. બેંક પર ગ્રાહકોને ખોટી રીતે ઊંચા જોખમ ધરાવતી સિક્યોરિટીઝ વેચવાના ગંભીર આરોપો મૂકવામાં આવ્યા હતા, જે હવે કાનૂની રીતે પાયાવિહોણા સાબિત થયા છે.
બહરીન હાઈ સિવિલ કોર્ટનો મહત્વપૂર્ણ ચુકાદો
૯ સપ્ટેમ્બરે બહરીનની હાઈ સિવિલ કોર્ટે આ મામલે અંતિમ બે કેસમાં પણ HDFC બેંકના પક્ષમાં ચુકાદો આપ્યો હતો. આ અગાઉ જુલાઈ અને ઓગસ્ટ દરમિયાન અન્ય પાંચ કેસ પણ અદાલત દ્વારા રદ કરવામાં આવ્યા હતા. બેંક દ્વારા જાહેર કરવામાં આવેલા સત્તાવાર નિવેદન અનુસાર, કોર્ટે રોકાણકારોના તમામ દાવાઓને સંપૂર્ણપણે નકારી કાઢ્યા છે.
પુરાવાના અભાવે રોકાણકારોના આરોપો રદ
રોકાણકારોએ બેંક પર ભારે બેદરકારી, ખોટી માહિતી આપવી, પ્રોડક્ટના જોખમો છુપાવવા અને નાણાકીય નિયમોનો ભંગ કરવાનો આરોપ મૂક્યો હતો. આ રોકાણકારોએ HDFC બેંકના માધ્યમથી ક્રેડિટ સુઈસના AT1 બોન્ડ્સ ખરીદ્યા હતા. જોકે, બહરીન કોર્ટે નોંધ્યું કે રોકાણકારો બેંક સામે કાનૂની રીતે માન્ય હોય તેવો એક પણ નક્કર પુરાવો રજૂ કરી શક્યા નથી. કોર્ટે સ્પષ્ટ કર્યું કે રોકાણકારોને થયેલા નાણાકીય નુકસાન માટે બેંક કોઈ પણ રીતે જવાબદાર નથી. આ ઉપરાંત, અદાલતે તમામ સાતેય કેસનો કાનૂની ખર્ચ પણ ફરિયાદી રોકાણકારોને જ ભોગવવાનો આદેશ આપ્યો છે.
ભારતની NCDRC કમિશન તરફથી પણ મળી ચૂકી છે ક્લીન ચિટ
આ સમગ્ર વિવાદ માર્ચ ૨૦૨૩નો છે, જ્યારે સ્વિસ બેંક UBS દ્વારા સંકટમાં ઘેરાયેલી ક્રેડિટ સુઈસ બેંકનું ટેકઓવર કરવામાં આવ્યું હતું. તે સમયે નિયમો મુજબ AT1 બોન્ડ્સની મલ્ય શૂન્ય (Zero) કરી દેવામાં આવી હતી, જેના કારણે વિશ્વભરના રોકાણકારોએ કરોડો રૂપિયા ગુમાવ્યા હતા.
બહરીન કોર્ટના નિર્ણય પહેલાં ભારતમાં પણ HDFC બેંકને મોટી જીત મળી ચૂકી છે. માર્ચ ૨૦૨૬માં ભારતની નેશનલ કન્ઝ્યુમર ડિસ્પ્યુટ્સ રેડ્રેસલ કમિશન (NCDRC) એ રોકાણકારોની તમામ ફરિયાદો ફગાવી દીધી હતી. કમિશને સ્પષ્ટ કર્યું હતું કે બેંકે માત્ર રોકાણ માટે એક માધ્યમ (Platform) તરીકે કામ કર્યું હતું અને ગ્રાહકોએ પોતાની મરજીથી રોકાણ કરવાનો નિર્ણય લીધો હતો. રોકાણકારો આ બોન્ડ્સના ઊંચા જોખમથી અગાઉથી માહિતગાર હતા, તેથી રિટર્ન ન મળવા પર બેંકને જવાબદાર ગણાવી શકાય નહીં.
દુબઈ બ્રાન્ચમાં ટેકનિકલ ખામી અને બેંકનું વલણ
બહરીનમાં કાનૂની જીત મળી હોવા છતાં, HDFC બેંકની દુબઈ (DIFC) શાખા સામે સર્જાયેલા વહીવટી પ્રશ્નો અંગે પણ ચર્ચા થઈ રહી છે. બેંકના એમડી અને સીઈઓ શશીધર જગદીશને સ્પષ્ટતા કરી છે કે દુબઈ ઓપરેશન્સમાં કોઈ ફ્રોડ કે ગેરરીતિ થઈ નથી.
તેમણે જણાવ્યું કે દુબઈ ફાઈનાન્શિયલ સર્વિસીસ ઓથોરિટીના કેટલાક નિયમોના પાલનમાં માત્ર ડોક્યુમેન્ટેશન સંબંધિત ટેકનિકલ ચૂક થઈ હતી. આ બાબતે બેંકે આંતરિક તપાસ કરીને જવાબદાર કર્મચારીઓ સામે ખાતાકીય પગલાં પણ લીધા છે. ઉલ્લેખનીય છે કે સપ્ટેમ્બર ૨૦૨૫માં દુબઈ ઓથોરિટી દ્વારા આ શાખા પર નવા ગ્રાહકો જોડવા અને નાણાકીય સલાહ આપવા પર કામચલાઉ રોક લગાવવામાં આવી હતી, જે હજુ પણ અમલમાં છે.
