Ashwini Vaishnaw: ધોલેરામાં બનશે માઇક્રો-LED ડિસ્પ્લે: કેન્દ્ર સરકારે ગુજરાતમાં વધુ બે સેમીકન્ડક્ટર પ્રોજેક્ટ્સને આપી મંજૂરી
ભારતને ગ્લોબલ સેમીકન્ડક્ટર સપ્લાય ચેઈનમાં અગ્રેસર બનાવવાના ઉદ્દેશ્ય સાથે કેન્દ્ર સરકારે એક ઐતિહાસિક નિર્ણય લીધો છે. મંગળવારે મળેલી કેન્દ્રીય કેબિનેટની બેઠકમાં અંદાજે ₹3,936 કરોડના ખર્ચે બે નવા સેમીકન્ડક્ટર યુનિટ્સ સ્થાપવાની મંજૂરી આપવામાં આવી છે. કેન્દ્રીય મંત્રી અશ્વિની વૈષ્ણવે આ અંગે માહિતી આપતા જણાવ્યું હતું કે આ બંને મહત્વકાંક્ષી પ્રોજેક્ટ્સ ગુજરાતમાં સ્થાપિત કરવામાં આવશે.
ગુજરાતમાં ક્યાં અને કયા પ્રોજેક્ટ્સ સ્થપાશે?
આ મિશન હેઠળ ગુજરાતના બે અલગ-અલગ વિસ્તારોમાં હાઈ-ટેક ફેસિલિટી તૈયાર કરવામાં આવશે:
ધોલેરા (Crystal Matrix Limited): ક્રિસ્ટલ મેટ્રિક્સ લિમિટેડ દ્વારા ધોલેરા સ્પેશિયલ ઇન્વેસ્ટમેન્ટ રીજન (SIR) માં એક ઇન્ટિગ્રેટેડ ફેસિલિટી સ્થાપવામાં આવશે. અહીં કમ્પાઉન્ડ સેમીકન્ડક્ટર ફેબ્રિકેશન અને ATMP (એસેમ્બલી, ટેસ્ટિંગ, માર્કિંગ અને પેકેજિંગ) યુનિટ તૈયાર કરાશે, જે મુખ્યત્વે મિની અને માઇક્રો-LED ડિસ્પ્લે મોડ્યુલ્સના ઉત્પાદન પર ધ્યાન કેન્દ્રિત કરશે.
સુરત (Suchi Semicon Private Limited): સુરતમાં સુચી સેમીકોન પ્રાઈવેટ લિમિટેડ દ્વારા OSAT (આઉટસોર્સ્ડ સેમીકન્ડક્ટર એસેમ્બલી એન્ડ ટેસ્ટ) સુવિધા ઉભી કરવામાં આવશે. અહીં ડિસ્ક્રીટ સેમીકન્ડક્ટર્સનું ઉત્પાદન અને પરીક્ષણ કરવામાં આવશે.
રોજગારી અને આર્થિક રોકાણના આંકડા
આ પ્રોજેક્ટ્સ માત્ર ટેકનોલોજી જ નહીં, પણ આર્થિક રીતે પણ ભારતને નવી ઊંચાઈ પર લઈ જશે:
કુલ રોકાણ: આ બે નવી મંજૂરીઓ સાથે દેશમાં સેમીકન્ડક્ટર મિશન હેઠળ કુલ રોકાણ વધીને ₹1.64 લાખ કરોડ પર પહોંચ્યું છે.
રોજગારીની તકો: આ બે નવા એકમો દ્વારા આશરે 2,230 કુશળ પ્રોફેશનલ્સ માટે સીધી રોજગારીની તકો ઉભી થશે.
કુલ પ્રોજેક્ટ્સ: ભારતમાં અત્યાર સુધીમાં મંજૂર થયેલા સેમીકન્ડક્ટર પ્રોજેક્ટ્સની સંખ્યા વધીને હવે 12 થઈ ગઈ છે.
સેમીકન્ડક્ટર મિશનથી થનારા મુખ્ય ફાયદા
ભારત માટે આ મિશન ગેમ-ચેન્જર સાબિત થવાની અપેક્ષા છે:
આયાત પર નિર્ભરતામાં ઘટાડો: હાલમાં ભારત મોટાભાગના સેમીકન્ડક્ટર્સ વિદેશથી આયાત કરે છે. સ્થાનિક ઉત્પાદન શરૂ થવાથી વિદેશી હૂંડિયામણની બચત થશે અને ભારત સ્વનિર્ભર બનશે.
વિશાળ બજાર: અનુમાન છે કે વર્ષ 2030 સુધીમાં ભારતનું સેમીકન્ડક્ટર માર્કેટ $110 અબજ સુધી પહોંચી જશે.
કૌશલ્ય વિકાસ: ‘ચિપ્સ ટુ સ્ટાર્ટ-અપ’ જેવા કાર્યક્રમો દ્વારા દેશમાં 10 લાખથી વધુ કુશળ યુવાનો માટે ડિઝાઇન અને મેન્યુફેક્ચરિંગ સેક્ટરમાં નોકરીઓનું સર્જન થશે.
