Google SynthID: સુંદર પિચાઈએ એલન મસ્ક સાથેની ફેક ફોટો બતાવીને સમજાવ્યું AI નું જોખમ, જાહેર કર્યું નવું SynthID ટૂલ
વિશ્વભરમાં આર્ટિફિશિયલ ઇન્ટેલિજન્સ (AI) દ્વારા જનરેટ થતા કન્ટેન્ટની સંખ્યા ખૂબ જ ઝડપથી વધી રહી છે. આ વધતા આઈ કન્ટેન્ટ અને ડીપફેકના જોખમ વચ્ચે હવે ગૂગલે પોતાની એક ખાસ ટેક્નોલોજી SynthID ને સામાન્ય યુઝર્સ સુધી મોટા પાયે પહોંચાડવાનો નિર્ણય કર્યો છે. આ એડવાન્સ ટૂલની મદદથી ઇન્ટરનેટ યુઝર્સ હવે સરળતાથી ઓળખી શકશે કે સ્ક્રીન પર દેખાતો ફોટો, વીડિયો કે ઓડિયો અસલી છે કે પછી તેને AI ની મદદથી બનાવવામાં કે એડિટ કરવામાં આવ્યો છે.
Google Search અને Chrome બ્રાઉઝરમાં પણ મળશે સપોર્ટ
આલ્ફાબેટ (Alphabet) ના સ્વામિત્વ ધરાવતી કંપની ગૂગલે સ્પષ્ટ કર્યું છે કે SynthID ફીચર હવે માત્ર ‘જેમિની એઆઈ’ (Gemini AI) એપ પૂરતું મર્યાદિત નહીં રહે. કંપની ટૂંક સમયમાં જ આ ફીચરને પોતાના ગૂગલ સર્ચ (Google Search) પ્લેટફોર્મ અને ગૂગલ ક્રોમ (Google Chrome) બ્રાઉઝર સાથે ઇન્ટિગ્રેટ કરવા જઈ રહી છે.
ગૂગલના સીઈઓ (CEO) સુંદર પિચાઈ એ કેલિફોર્નિયામાં યોજાયેલી કંપનીની વાર્ષિક ‘Google I/O’ ઇવેન્ટ દરમિયાન આ મોટા અપડેટની જાહેરાત કરી હતી. તેમણે જણાવ્યું હતું કે:
“ઇન્ટરનેટ પર જે ગતિએ AI કન્ટેન્ટ વધી રહ્યું છે, તેને જોતા ડિજિટલ દુનિયામાં પારદર્શિતા અને વિશ્વાસ જાળવી રાખવો એ હાલના સમયની સૌથી મોટી જરૂરિયાત બની ગઈ છે.”
શું છે SynthID ટેક્નોલોજી અને તે કેવી રીતે કામ કરે છે?
ગૂગલે આ SynthID ટેક્નોલોજીને સૌથી પહેલા વર્ષ ૨૦૨૩ માં રજૂ કરી હતી. ટેકનિકલ ભાષામાં સમજીએ તો, આ એક પ્રકારનો ઇનવિઝિબલ વોટરમાર્ક (Invisible Watermark) એટલે કે અદ્રશ્ય ઓળખચિહ્ન છે, જે AI દ્વારા બનાવવામાં આવેલા ફોટો, વીડિયો કે ઓડિયો ફાઇલ્સના પિક્સલ્સ અને ડિજિટલ કોડિંગમાં આપોઆપ છુપાઈ જાય છે.
સામાન્ય આંખોથી અદ્રશ્ય: આ વોટરમાર્ક એટલો સૂક્ષ્મ હોય છે કે તેને સામાન્ય આંખોથી જોઈ શકાતો નથી અને કન્ટેન્ટની ક્વોલિટી પર તેની કોઈ અસર થતી નથી.
એડિટિંગ પછી પણ સુરક્ષિત: જો કોઈ વ્યક્તિ તે ફોટો કે વીડિયોને ક્રોપ કરે, એડિટ કરે અથવા તેનો રંગ બદલી નાખે, તેમ છતાં આ અદ્રશ્ય વોટરમાર્ક ડિલીટ થતો નથી. ગૂગલની સિસ્ટમ તેને તુરંત સ્કેન કરીને પકડી પાડે છે કે આ કન્ટેન્ટ આર્ટિફિશિયલ ઇન્ટેલિજન્સ દ્વારા નિર્મિત છે.
સુંદર પિચાઈએ મસ્કની AI ફોટો બતાવીને સમજાવ્યું જોખમ
આ ભવ્ય ઇવેન્ટ દરમિયાન સુંદર પિચાઈએ સ્ટેજ પર એક વાયરલ થયેલી રસપ્રદ AI ફોટો સ્ક્રીન પર બતાવી હતી. આ તસવીરમાં સુંદર પિચાઈ પોતે, એલન મસ્ક (Elon Musk), જેન્સન હુઆંગ (Nvidia CEO) અને સેમ ઓલ્ટમેન (OpenAI CEO) એકસાથે બેસીને મેકડોનાલ્ડ્સમાં બર્ગર ખાતા નજરે પડતા હતા.
પિચાઈએ હસતા હસતા મજાકિયા અંદાજમાં કહ્યું કે, “આ તસવીર ૧૦૦% નકલી છે, કારણ કે હું શાકાહારી છું અને હેમબર્ગર નથી ખાતો!” જો કે, મજાકની સાથે તેમણે ગંભીરતાથી સ્વીકાર્યું કે ઇન્ટરનેટ પર દરેક સામાન્ય યુઝર માટે અસલી અને એઆઈ તસવીરો વચ્ચેનો ભેદ પારખવો ખૂબ મુશ્કેલ છે. આથી જ SynthID જેવી ટેક્નોલોજી ભવિષ્યમાં ભ્રામક સમાચારો અને ફેક ન્યૂઝ રોકવામાં મોટી ભૂમિકા ભજવશે.
ઓપનએઆઈ (OpenAI) સહિતની અન્ય મોટી કંપનીઓ પણ આપશે સાથ
ગૂગલનું માનવું છે કે માત્ર એક જ કંપનીના સ્તર પર આ ટેક્નોલોજી વાપરવાથી ઇન્ટરનેટને સુરક્ષિત નહીં બનાવી શકાય. આથી ગૂગલે આ પદ્ધતિને વૈશ્વિક સ્ટાન્ડર્ડ બનાવવાની પહેલ કરી છે. સુંદર પિચાઈના જણાવ્યા અનુસાર, ગૂગલની કટ્ટર હરીફ ગણાતી OpenAI, Kakao અને ElevenLabs જેવી અગ્રણી ટેક કંપનીઓ પણ હવે પોતાના કન્ટેન્ટમાં ‘SynthID’ વોટરમાર્ક સ્ટાન્ડર્ડ અપનાવવા માટે તૈયાર થઈ ગઈ છે. આ સિવાય ગ્રાફિક્સ ક્ષેત્રની દિગ્ગજ કંપની Nvidia પણ આ સુરક્ષા અભિયાનમાં જોડાઈ ચૂકી છે.
અત્યાર સુધીમાં વિશ્વભરમાં અંદાજે ૧૦૦ અબજ (100 Billion) થી વધુ ફોટો, વીડિયો અને ઓડિયો ફાઇલો પર સફળતાપૂર્વક SynthID વોટરમાર્ક લગાવવામાં આવી ચૂક્યો છે. ટેક એક્સપર્ટ્સ માને છે કે આગામી સમયમાં ડિજિટલ કન્ટેન્ટની અસલિયત ચકાસવા માટે આ ટેક્નોલોજી સમગ્ર વિશ્વમાં એક નવો માપદંડ (Industry Standard) બનશે.
