Gold Price Today
Gold Price Today: આજે ગુરુવારે સ્થાનિક હાજર બજારમાં સોનાના ભાવમાં વધારો જોવા મળ્યો છે. ગુરુવારે, રાષ્ટ્રીય રાજધાની દિલ્હીના બુલિયન બજારમાં સોનાનો ભાવ 200 રૂપિયા વધીને 94,350 રૂપિયા પ્રતિ 10 ગ્રામના નવા રેકોર્ડ સ્તરે પહોંચી ગયો, જે ઝવેરીઓ અને સ્ટોકિસ્ટોની સતત ખરીદી વચ્ચે નોંધાયું હતું. બુધવારે ૯૯.૯ ટકા શુદ્ધતા ધરાવતું સોનું ૯૪,૧૫૦ રૂપિયા પ્રતિ ૧૦ ગ્રામ પર સ્થિર રહ્યું હતું. આજે ૯૯.૫ ટકા શુદ્ધતા ધરાવતું સોનું ૨૦૦ રૂપિયા વધીને ૯૩,૯૦૦ રૂપિયા પ્રતિ ૧૦ ગ્રામના સર્વકાલીન ઉચ્ચતમ સ્તર પર પહોંચી ગયું.
દિલ્હી બુલિયન માર્કેટમાં સોના ઉપરાંત હાજર ચાંદીના ભાવમાં પણ ઘટાડો જોવા મળ્યો છે. ચાંદીના ભાવ બુધવારના રૂ. ૧,૦૧,૫૦૦ના બંધ સ્તરથી રૂ. ૧,૦૦૦ ઘટીને રૂ. ૧,૦૦,૫૦૦ થયા છે.
LKP સિક્યોરિટીઝના વાઇસ પ્રેસિડેન્ટ (રિસર્ચ એનાલિસ્ટ – કરન્સી અને કોમોડિટી) જતીન ત્રિવેદીએ જણાવ્યું હતું કે, “પરસ્પર ટેરિફને કારણે સવારના સત્રમાં સોનામાં શરૂઆતમાં વધારો જોવા મળ્યો હતો, પરંતુ ટૂંક સમયમાં ભાવમાં નફો બુકિંગ શરૂ થયું.” વૈશ્વિક બજારોમાં, હાજર સોનાનો ભાવ $43.39 અથવા 1.38 ટકા ઘટીને $3,089.64 પ્રતિ ઔંસ થયો. બુધવારે યુએસ રાષ્ટ્રપતિ ડોનાલ્ડ ટ્રમ્પે 60 થી વધુ દેશો પર ટેરિફની જાહેરાત કર્યા પછી તે ઔંસ દીઠ $3,167.71 ની નવી ઊંચી સપાટીએ પહોંચ્યું હતું.
એશિયન બજારોમાં, હાજર ચાંદી 4.21 ટકા ઘટીને $32.44 પ્રતિ ઔંસ થઈ ગઈ. એબાન્સ ફાઇનાન્શિયલ સર્વિસીસના સીઈઓ ચિંતન મહેતાના જણાવ્યા અનુસાર, રોકાણકારો ટ્રમ્પની નવી ટેરિફ નીતિઓ અને વૈશ્વિક અર્થતંત્ર પર તેમની સંભવિત અસરનું નજીકથી મૂલ્યાંકન કરશે. મહેતાએ જણાવ્યું હતું કે, આ ઉપરાંત, બજારનું ધ્યાન ગુરુવારે મોડી રાત્રે જાહેર થનારા સાપ્તાહિક યુએસ બેરોજગારી દાવાઓ અને સેવા પીએમઆઈ ડેટા પર રહેશે, જે વધતા વેપાર તણાવ વચ્ચે યુએસ અર્થતંત્રની મજબૂતાઈ વિશે વધુ સમજ આપી શકે છે.
