ક્રિકેટમાં ફરી એક વાર ફિક્સીંગ રેકેટનો પર્દાફાશ થયો છે. ઇન્ટરનેશનલ ક્રિકેટ કાઉન્સિલ (આઈસીસી)એ ૨૦૨૧માં યુનાઇટેડ અરબ અમીરાત(યુએઈ)માં રમાયેલી ટી-૧૦ લીગ દરમિયાન ફિક્સિંગ બાબતે ૩ ભારતીયો સહીત ૮ લોકો સામે આરોપ લાગ્યા છે, સાથે સાથે કેટલાક અધિકારીઓ પર ભ્રષ્ટાચારનો આરોપ લગાવ્યો છે. આઈસીસી દ્વારા જાહેર કરવામાં આવેલી યાદીમાં જે ભારતીયોના નામ સામેલ છે તેમાં ૨ ટીમના માલિક છે. આ સિવાય બાંગ્લાદેશ ટીમના પૂર્વ ખેલાડી નાસિર હુસૈનનું નામ પણ આ યાદીમાં છે.
ફિક્સિંગની પ્રવૃતિઓમાં સંડોવાયેલા ભારતીયોમાં આ લીગમાં રમી રહેલી ટીમ પુણે ડેવિલ્સના સહમાલિક પરાગ સંઘવી અને કૃષ્ણ કુમારનો સમાવેશ થાય છે. આ સિવાય ત્રીજાે ભારતીય સની ઢીલ્લોન છે જે ટીમનો બેટિંગ કોચ છે. આઈસીસી કહ્યું કે આ આરોપો વર્ષ ૨૦૨૧માં અબુ ધાબી ટી-૧૦ લીગ સાથે સંબંધિત છે, આ ટૂર્નામેન્ટમાં મેચ ફિક્સ કરવાના પ્રયાસો થયા હતા. આ ટૂર્નામેન્ટ માટે અમીરાત ક્રિકેટ બોર્ડ(ઇસીબી) દ્વારા ડેઝિગ્નેટેડ એન્ટી કરપ્શન ઓફિસર (ડીએસીઓ) તરીકે આઈસીસીના અધિકારીઓની નિમણૂક કરવામાં આવી હતી.
આ ઉપરાંત આઈસીસસી દ્વારા જાહેર કરાયેલા નિવેદનમાં પરાગ સંઘવી પર મેચના પરિણામો અને અન્ય પ્રવૃતિઓ પર સટ્ટો લગાવવાનો અને તપાસમાં એજન્સીને સહકાર ન આપવાનો આરોપ લગાવવામાં આવ્યો હતો. બેટિંગ કોચ સની ઢીલ્લોન પર મેચ ફિક્સ કરવાનો પ્રયાસ કરવાનો આરોપ છે. આ સિવાય કૃષ્ણ કુમાર પર ડીએસીઓથી તથ્યો છુપાવવાનો આરોપ છે. આ યાદીમાં સામેલ બાંગ્લાદેશ ટીમના ભૂતપૂર્વ ખેલાડી નાસિર હુસૈન પર ડીએસીઓ ને ૭૫૦ ડોલરથી વધુ કિંમતની ભેટ પ્રાપ્ત કરવા વિશે જાણ ન કરવાનો આરોપ છે. આ યાદીમાં બેટિંગ કોચ અઝહર ઝૈદી, મેનેજર શાદાબ અહેમદ, યુએઈના સ્થાનિક ખેલાડીઓ રિઝવાન જાવેદ અને સાલિયા સામેલ છે. ૬ લોકોને સસ્પેન્ડ કરવાની સાથે આઈસીસીએ તમામને આરોપીઓનો જવાબ આપવા માટે ૧૯ દિવસનો સમય આપ્યો છે.
