Elon Musk X Money: મળશે ૬% વ્યાજ અને ફ્રી વિઝા કાર્ડ! એલોન મસ્કે અમેરિકામાં લોન્ચ કર્યું ડિજિટલ પેમેન્ટ એપ X Money
એલોન મસ્કની જાણીતી સોશિયલ મીડિયા કંપની ‘X’ (જે અગાઉ ટ્વિટર તરીકે ઓળખાતી હતી) એ ડિજિટલ ફાઇનાન્સ ક્ષેત્રે એક મોટું અને ઐતિહાસિક કદમ ઉઠાવ્યું છે. કંપનીએ અમેરિકામાં પોતાની નવી ડિજિટલ પેમેન્ટ સર્વિસ ‘X Money’ લોન્ચ કરવાની જાહેરાત કરી છે. આ નવી સર્વિસ શરૂ થવાનો સીધો અર્થ એ છે કે હવે યુઝર્સ માત્ર સોશિયલ મીડિયા પર વિચારો કે પોસ્ટ શેર કરવા પૂરતા સીમિત નહીં રહે, પરંતુ X એપની અંદરથી જ તમામ પ્રકારના ઓનલાઈન પેમેન્ટ્સ પણ કરી શકશે.
અમેરિકામાં પેઇડ સબ્સ્ક્રાઇબર્સ માટે શરૂઆત
મળતી માહિતી મુજબ, X Money ની સેવા હાલમાં પ્રાથમિક ધોરણે અમેરિકામાં રહેતા અને X નું પેઇડ સબ્સ્ક્રિપ્શન ધરાવતા યુઝર્સ માટે જ ઉપલબ્ધ કરાવવામાં આવી છે. આ નવી સુવિધા દ્વારા યુઝર્સ એપની અંદર જ અન્ય યુઝર્સને પૈસા મોકલી શકશે, ખરીદીનું પેમેન્ટ કરી શકશે અને પોતાના તમામ ફાઇનાન્શિયલ ટ્રાન્ઝેક્શનને એક જ જગ્યાએથી સરળતાથી મેનેજ કરી શકશે. કંપનીનો મુખ્ય ઉદ્દેશ્ય સોશિયલ મીડિયા અને ડિજિટલ ફાઇનાન્સને એક જ પ્લેટફોર્મ પર લાવવાનો છે.
ઝીરો ચાર્જ સાથે ઇન્સ્ટન્ટ P2P ટ્રાન્સફર
X Money એપની સૌથી મોટી અને આકર્ષક ખાસિયત એ છે કે તેના દ્વારા યુઝર્સને ઇન્સ્ટન્ટ પીઅર-ટુ-પીઅર (P2P) મની ટ્રાન્સફરની સુવિધા મળશે. આ ફીચરની મદદથી યુઝર એપમાં જ સેકન્ડોમાં બીજા યુઝરના ખાતામાં નાણાં ટ્રાન્સફર કરી શકશે. કંપનીના દાવા મુજબ, આ સુવિધાનો ઉપયોગ કરવા માટે યુઝર્સે કોઈ પણ વધારાનો ચાર્જ કે ફી ચૂકવવી નહીં પડે. આ ઉપરાંત ટ્રાન્ઝેક્શન માટે કોઈ સીમા (Limit) પણ રાખવામાં આવી નથી.
X Visa ડેબિટ કાર્ડ અને ફોરેન ટ્રાન્ઝેક્શનમાં રાહત
X Money સર્વિસ સાથે કંપની યુઝર્સને X Visa Debit Card પણ ઓફર કરી રહી છે. આ એક ડિજિટલ કાર્ડ હશે જેને યુઝર્સ પોતાના ‘Apple Pay’ સાથે સીધું કનેક્ટ કરી શકશે. આ કાર્ડનો ઉપયોગ ઓનલાઈન શોપિંગ તેમજ ઓફલાઈન સ્ટોર્સ પર પેમેન્ટ કરવા માટે કરી શકાશે. વધુમાં, કંપનીએ આંતરરાષ્ટ્રીય સ્તરે મુસાફરી કરતા યુઝર્સ માટે એક મોટી રાહત આપી છે; આ કાર્ડ દ્વારા વિદેશી લેવડદેવડ (Foreign Transactions) કરવા પર કોઈ જ એક્સ્ટ્રા ચાર્જ લેવામાં આવશે નહીં.
મસ્કનો વિઝન: ‘Everything App’ બનાવવાનું સપનું
એલોન મસ્ક અગાઉ પણ અનેકવાર જાહેર મંચ પર કહી ચૂક્યા છે કે તેઓ X ને એક એવી ‘એવરીથિંગ એપ’ (Everything App) બનાવવા માંગે છે, જ્યાં યુઝરને મેસેજિંગ, ન્યૂઝ, મનોરંજન અને ફાઇનાન્સ સહિતની તમામ સેવાઓ એક જ જગ્યાએ મળી રહે. X Money નું લોન્ચિંગ આ યોજનાનો એક અત્યંત મહત્વપૂર્ણ હિસ્સો ગણાવાય છે. જો આ સર્વિસ સફળ રહેશે, તો આગામી સમયમાં તેમાં ઇન્વેસ્ટમેન્ટ, ડિજિટલ વોલેટ, બિલ પેમેન્ટ્સ અને ઈ-કોમર્સ શોપિંગ જેવી સુવિધાઓ પણ ઉમેરવામાં આવશે.
પ્રીમિયમ યુઝર્સને મળશે જબરદસ્ત વ્યાજ અને કૅશબૅક
X Money દ્વારા કંપની પોતાના પ્રીમિયમ ગ્રાહકોને મોટો આર્થિક ફાયદો પહોંચાડવા જઈ રહી છે.
Premium+ યુઝર્સ: દર મહિને $40 અથવા વાર્ષિક $395 ચુકવતા પ્લેટિનમ/પ્રીમિયમ પ્લસ યુઝર્સને તેમના જમા નાણાં પર ૬% વાર્ષિક વ્યાજ (APY) મળશે.
Premium યુઝર્સ: સામાન્ય પ્રીમિયમ યુઝર્સ પણ પોતાના X Money એકાઉન્ટ સાથે ડાયરેક્ટ ડિપોઝિટ લિંક કરીને ૬% વ્યાજ મેળવી શકે છે.
આ સિવાય પસંદગીની ખરીદીઓ પર ૩% સુધીનું કૅશબૅક અને ડાયરેક્ટ ડિપોઝિટ યુઝર્સને તેમની સેલેરી કે પેમેન્ટ નક્કી કરેલા સમય કરતા વહેલા ખાતામાં મળી જશે.
શું ભારતમાં લોન્ચ થશે X Money?
હાલમાં X Money માત્ર અમેરિકન માર્કેટ પૂરતું જ મર્યાદિત રાખવામાં આવ્યું છે અને ભારતમાં તેના લોન્ચિંગ અંગે કંપની દ્વારા કોઈ સત્તાવાર નિવેદન આપવામાં આવ્યું નથી. જોકે, ટેક નિષ્ણાતોનું માનવું છે કે અમેરિકામાં સફળતા મળ્યા બાદ એલોન મસ્ક ભારત જેવા મોટા ડિજિટલ માર્કેટમાં પણ આ સર્વિસ ચોક્કસપણે લાવશે.
