Election Commission : ચૂંટણી કમિશનરની નિમણૂક અંગેનો નિર્ણય ગુરુવારે લેવામાં આવ્યો હતો. વડાપ્રધાન નરેન્દ્ર મોદીની અધ્યક્ષતામાં મળેલી બેઠકમાં બે નામોને મંજૂરી આપવામાં આવી હતી. આ મુજબ જ્ઞાનેશ કુમાર અને સુખબીર સંધુ ચૂંટણી કમિશનર તરીકે ચૂંટાયા છે. આ બેઠકમાં કોંગ્રેસના નેતા અધીર રંજન ચૌધરી પણ હાજર રહ્યા હતા. આ બંને 1988 બેચના IAS ઓફિસર છે.
આગામી લોકસભા ચૂંટણીની તૈયારીઓમાં મુખ્ય ચૂંટણી અધિકારી રાજીવ કુમારને મદદ કરવા માટે બે ચૂંટણી કમિશનરની નિમણૂક કરવા માટે પીએમ મોદીની અધ્યક્ષતામાં એક સમિતિની રચના કરવામાં આવી હતી. અધીર રંજન ચૌધરીને પણ આ સમિતિના સભ્ય બનાવવામાં આવ્યા હતા. આજે યોજાયેલી બેઠકમાં કેન્દ્રીય ગૃહમંત્રી અમિત શાહ પણ હાજર રહ્યા હતા. બેઠક બાદ અધીર રંજન ચૌધરીએ આ નિમણૂંકો વિશે માહિતી આપી હતી.
નવી નિમણૂંકો શા માટે કરવામાં આવી?
ચૂંટણી પંચમાં મુખ્ય ચૂંટણી કમિશનર સિવાય બે ચૂંટણી કમિશનર હોય છે. તેમાંથી એક ચૂંટણી કમિશનર અનુપ ચંદ્ર પાંડે ફેબ્રુઆરીમાં નિવૃત્ત થયા હતા. તે જ સમયે, બીજા ચૂંટણી કમિશનર અરુણ ગોયલે 8 માર્ચે અચાનક રાજીનામું આપી દીધું હતું. ગોયલને આ પદ 21 નવેમ્બર 2022ના રોજ આપવામાં આવ્યું હતું. તેમનો કાર્યકાળ 5 ડિસેમ્બર 2027 સુધીનો હતો. પરંતુ, તે પહેલા જ તેમણે રાજીનામું આપવાનો નિર્ણય લીધો હતો.
તમને જણાવી દઈએ કે ADR (એસોસિએશન ડેમોક્રેટિક રિફોર્મ્સ) એ અનિલ ગોયલની ચૂંટણી કમિશનર તરીકે નિમણૂકના નિર્ણયને સુપ્રીમ કોર્ટમાં પડકાર્યો હતો. અરજીમાં કહેવામાં આવ્યું હતું કે ગોયલની નિમણૂક કાયદામાં ખોટી છે. ADRએ કહ્યું હતું કે સરકાર અને ચૂંટણી પંચે પોતાના ફાયદા માટે ગોયલને ચૂંટણી કમિશનર તરીકે નિયુક્ત કર્યા હતા. આ સાથે ગોયલને આ પદ પરથી હટાવવાની પણ માંગણી અરજીમાં કરવામાં આવી હતી.
કોણ છે જ્ઞાનેશ અને સંધુ?
જ્ઞાનેશ કુમાર અને સુખબીર સંધુ, બંને 1988 બેચના નિવૃત્ત IAS અધિકારી છે. સંધુ ઉત્તરાખંડના મુખ્ય સચિવ અને નેશનલ હાઈવે ઓથોરિટી ઓફ ઈન્ડિયાના અધ્યક્ષ રહી ચૂક્યા છે. તે જ સમયે, જ્ઞાનેશ કુમાર સંસદીય બાબતોના મંત્રાલયમાં સચિવ અને અમિત શાહના નેતૃત્વમાં સહકાર મંત્રાલયમાં સચિવ રહી ચૂક્યા છે. તેમની નિમણૂક બાદ એવું માનવામાં આવે છે કે લોકસભા ચૂંટણીની તારીખો ટૂંક સમયમાં જાહેર કરવામાં આવશે.
