Donald Trump: ઈરાન સામે ટ્રમ્પના આકરા તેવર: કહ્યું- ‘સૈન્ય બરબાદ, હવે કિંમત ચૂકવવી પડશે’
અમેરિકાના રાષ્ટ્રપતિ ડોનાલ્ડ ટ્રમ્પે ઈરાન સાથેની સંભવિત સમજૂતી (ડિલ) અંગેના પોતાના દાવાઓ વચ્ચે તેહરાન સામે આકરા પ્રહાર કર્યા છે. ટ્રમ્પે તેમના સોશિયલ મીડિયા પ્લેટફોર્મ ‘ટ્રૂથ’ (Truth) પર ઈરાનની સૈન્ય ક્ષમતા પર કટાક્ષ કરતા ગંભીર આરોપો લગાવ્યા છે.
ઈરાનની સેના સંપૂર્ણપણે ખતમ: ટ્રમ્પ
ડોનાલ્ડ ટ્રમ્પના જણાવ્યા અનુસાર, ઈરાનની સૈન્ય શક્તિ હવે લગભગ સમાપ્ત થઈ ગઈ છે. તેમણે દાવો કર્યો છે કે ઈરાનની નૌકાદળ અને વાયુસેના હવે માત્ર નામની જ રહી છે અને તે સંપૂર્ણપણે પરાજિત થઈ ચૂકી છે. ટ્રમ્પના મતે, ઈરાન હવે માત્ર વાતો કરી રહ્યું છે અને વાસ્તવિકતામાં તેની પાસે કોઈ ક્ષમતા બચી નથી.
મધ્ય-પૂર્વની દાદાગીરી હવે ઈતિહાસ બની
ટ્રમ્પે સ્પષ્ટ શબ્દોમાં કહ્યું છે કે મધ્ય-પૂર્વમાં જે દેશ પોતાની દાદાગીરી માટે જાણીતો હતો, તેનો હવે અંત આવી ગયો છે. તેમણે ઈરાન પર આક્ષેપ કર્યો કે તેમણે એક એવી સમજૂતી માટે ખૂબ લાંબો સમય બગાડ્યો છે, જે તેમના માટે ફાયદાકારક સાબિત થઈ શકત. હવે તેમણે આ વિલંબની ભારે કિંમત ચૂકવવી પડશે.
નાકાબંધીને ગણાવી સૌથી સફળ
દરિયાઈ માર્ગે અમેરિકા દ્વારા કરવામાં આવેલી નાકાબંધી અંગે ટ્રમ્પે મીડિયા પર પણ નિશાન સાધ્યું છે. તેમણે ‘ફેક ન્યૂઝ મીડિયા’ પર આરોપ લગાવતા કહ્યું કે, તેઓ યુએસ નેવલ નાકાબંધીની સફળતા છુપાવી રહ્યા છે. ટ્રમ્પના મતે, આ દરિયાઈ યુદ્ધના ઈતિહાસની સૌથી સફળ નાકાબંધી છે. તેમણે દાવો કર્યો કે અમેરિકાની મંજૂરી વગર કંઈ પણ અંદર કે બહાર જઈ શકતું નથી.
‘એક નિષ્ફળ દેશ તરફ ઈરાન’
ટ્રમ્પે વધુમાં ઉમેર્યું કે, “આ એક સ્ટીલની દીવાલ જેવું છે. ઈરાનનો કોઈ વેપાર થઈ રહ્યો નથી. તેઓ પોતાની સેના કે અન્ય બિલ ચૂકવવા માટે પણ સક્ષમ નથી. ઈરાન ખૂબ જ ઝડપથી એક નિષ્ફળ રાષ્ટ્ર બની રહ્યું છે.” પોતાના દાવાઓને મજબૂત કરતા અને તેલના ઉત્પાદન અંગે વાત કરતા ટ્રમ્પે ઈશ્વરનો આભાર માન્યો હતો.
