US Iran War: અમેરિકા-ઇરાન તણાવ ચરમસીમાએ: ઇસ્લામિક રેઝિસ્ટન્સ ગ્રૂપે ટ્રમ્પના માથા પર જાહેર કર્યું મોટું ઇનામ, જાણો શું છે ૨૦૨૦નો વિવાદ
અમેરિકા અને ઈરાન વચ્ચે ચાલી રહેલા વર્ષો જૂના રાજદ્વારી અને સૈન્ય તણાવમાં વધુ એક ભયંકર વળાંક આવ્યો છે. ઈરાન સમર્થિત ઈરાકી સશસ્ત્ર જૂથ (Mililitia Group) ‘ઇસ્લામિક રેઝિસ્ટન્સ ઇન ઇરાક’ દ્વારા અમેરિકી રાષ્ટ્રપતિ ડોનાલ્ડ ટ્રમ્પની હત્યા કરનાર વ્યક્તિને એક બહુ જ મોટું ઇનામ આપવાની જાહેરાત કરવામાં આવી છે. આ કટ્ટરપંથી જૂથે જાહેરાત કરી છે કે જે કોઈ પણ વ્યક્તિ ડોનાલ્ડ ટ્રમ્પની હત્યા કરશે, તેને ૧૦ મિલિયન ડોલર (આશરે ₹૮૫ કરોડ) નું અધધ ઇનામ આપવામાં આવશે.
ઈરાકી મિલિશિયા જૂથના જણાવ્યા અનુસાર, આ ચોંકાવનારી જાહેરાત વર્ષ ૨૦૨૦માં અમેરિકા દ્વારા કરવામાં આવેલા એક ડ્રોન હુમલાનો બદલો લેવા માટે કરવામાં આવી છે. ઉલ્લેખનીય છે કે, તે હુમલામાં ઈરાનના ટોચના સૈન્ય જનરલ કાસિમ સુલેમાની અને ઈરાકી સશસ્ત્ર જૂથના નેતા અબુ મહદી અલ-મુહંદિસ માર્યા ગયા હતા.
ઇસ્લામિક રેઝિસ્ટન્સ ગ્રૂપે કેમ કરી આ જાહેરાત?
અમેરિકી ગુપ્તચર એજન્સીઓ અને વહીવટીતંત્ર લાંબા સમયથી આ ઈરાકી મિલિશિયા જૂથ પર ઈરાક, સીરિયા અને અખાતી દેશોમાં સ્થિત અમેરિકી સૈન્ય મથકો અને તેના હિતો પર સેંકડો ડ્રોન, રોકેટ અને મિસાઈલ હુમલા કરવાનો આરોપ લગાવતું રહ્યું છે.
પોતાના સત્તાવાર નિવેદનમાં ઇસ્લામિક રેઝિસ્ટન્સ ઇન ઇરાકે જણાવ્યું છે કે, “ડોનાલ્ડ ટ્રમ્પ એક હત્યારા છે. તેઓ પોતાના સૈન્ય અધિકારીઓને નિર્દોષ લોકોની હત્યા કરવા અને વિવિધ સંગઠનોને ખતમ કરવાના આદેશ આપે છે. તેથી જ અમે તેમના મૃત્યુ માટે આ કરોડો રૂપિયાના ઇનામની જાહેરાત કરી રહ્યા છીએ.” ઈરાની મીડિયા ‘પ્રેસ ટીવી’ ના અહેવાલ મુજબ, આ સંગઠને એવો પણ આરોપ લગાવ્યો છે કે કાસિમ સુલેમાની અને અબુ મહદી અલ-મુહંદિસની હત્યા કરીને ટ્રમ્પે સમગ્ર વિશ્વ સામે ક્રૂરતાપૂર્વક પોતાની વાહવાહી લૂંટી હતી.
વ્હાઇટ હાઉસની બેઠક અને ટ્રમ્પનું આક્રમક નિવેદન
આ સનસનાટીભર્યા ઇનામની જાહેરાત એવા સમયે થઈ છે જ્યારે રાષ્ટ્રપતિ ડોનાલ્ડ ટ્રમ્પે વ્હાઇટ હાઉસમાં ઈરાકના વડાપ્રધાન કાદિમ અલ-ઝૈદી સાથેની એક ઉચ્ચ સ્તરીય બેઠક દરમિયાન વર્ષ ૨૦૨૦ના તે વિવાદાસ્પદ ડ્રોન હુમલાનો જાહેરમાં ઉલ્લેખ કર્યો હતો.
અરબ ન્યૂઝ આઉટલેટ ‘અશરક અલ-અવસાત’ ના અહેવાલ મુજબ, ટ્રમ્પે સુલેમાની અને મુહંદિસને મારવાના પોતાના જૂના ઓપરેશનનો મજબૂત બચાવ કર્યો હતો. ટ્રમ્પે બેઠકમાં સ્પષ્ટ શબ્દોમાં કહ્યું હતું કે:
“મેં મારા પ્રથમ કાર્યકાળ દરમિયાન જ તે બંનેને (સુલેમાની અને મુહંદિસ) ખતમ કર્યા હતા. જો મેં તે સમયે આ કડક પગલું ન ભર્યું હોત, તો આજે મધ્ય-પૂર્વ (Middle-East) ની સ્થિતિ ઘણી વધારે ભયજનક અને અલગ હોત. મને પૂરો વિશ્વાસ છે કે ખુદ ઈરાનના મોટા નેતાઓ પણ સુલેમાનીના ક્રૂર વલણથી ડરતા હતા.”
ટ્રમ્પ પર અગાઉ થઈ ચૂકેલા જીવલેણ હુમલા
અમેરિકી રાષ્ટ્રપતિ ચૂંટણી અભિયાન દરમિયાન પણ ડોનાલ્ડ ટ્રમ્પ પર એક કરતાં વધુ વખત જીવલેણ હુમલાના પ્રયાસો થઈ ચૂક્યા છે, જેના કારણે તેમની સુરક્ષા વ્યવસ્થા હંમેશા હાઈ-એલર્ટ પર હોય છે.
૧૩ જુલાઈ, ૨૦૨૪ નો હુમલો: પેન્સિલવેનિયાના બટલરમાં એક ચૂંટણી રેલી દરમિયાન એક બંદૂકધારીએ ટ્રમ્પ પર અંધાધૂંધ ગોળીબાર કર્યો હતો, જેમાં એક ગોળી તેમના જમણા કાનને અડીને નીકળી ગઈ હતી અને તેઓ આબાદ બચ્યા હતા.
ફ્લોરિડાનો કિસ્સો: આ ઘટનાના થોડા અઠવાડિયા પછી, ફ્લોરિડામાં ટ્રમ્પના ગોલ્ફ કોર્સની નજીકથી સુરક્ષા એજન્સીઓએ હથિયારો સાથે એક શંકાસ્પદ વ્યક્તિની ધરપકડ કરી હતી.
તે સમયે પણ અમેરિકી સુરક્ષા અધિકારીઓએ સત્તાવાર અહેવાલોમાં દાવો કર્યો હતો કે ઈરાન સાથે જોડાયેલા કેટલાક આંતરરાષ્ટ્રીય જૂથો જનરલ સુલેમાનીની હત્યાનો બદલો લેવા માટે કોઈપણ ભોગે ટ્રમ્પની હત્યા કરાવવાનું પદ્ધતિસરનું ષડયંત્ર રચી રહ્યા છે. આ નવી જાહેરાત બાદ વૈશ્વિક રાજકારણમાં ગરમાવો આવી ગયો છે.
