Petrol-Diesel Price: ક્રૂડ ઓઈલના ભાવ ઘટ્યા: પેટ્રોલ અને ડીઝલ સસ્તું થવાના એંધાણ, જાણો શું છે વિગતો
પશ્ચિમ એશિયામાં છેલ્લા કેટલાક સમયથી ચાલી રહેલા તણાવને કારણે ઈંધણના ભાવ આસમાને પહોંચ્યા હતા, પરંતુ હવે આ દોડ પર બ્રેક લાગતી જણાય છે. અમેરિકી રાષ્ટ્રપતિ ડોનાલ્ડ ટ્રમ્પ દ્વારા ઈરાન સાથે થયેલા ઐતિહાસિક શાંતિ સમજૂતી (US-Iran Peace Deal) અને ‘સ્ટ્રેટ ઓફ હોર્મુઝ’ (Strait of Hormuz) ને કોઈપણ ટોલ વગર ફરીથી ખુલ્લું મુકવાના એલાન બાદ આંતરરાષ્ટ્રીય બજારમાં ક્રૂડ ઓઈલના ભાવમાં મોટો ઘટાડો નોંધાયો છે.
ક્રૂડ ઓઈલના ભાવમાં મોટો ઘટાડો
રવિવારે મોડી રાત્રે બ્રેન્ટ ક્રૂડના ભાવમાં ૩.૯ ટકાનો ઘટાડો થયો હતો અને તે ૮૪ ડોલર પ્રતિ બેરલની સપાટી પર આવી ગયું હતું. તેવી જ રીતે, યુએસ ક્રૂડ પણ ૪.૮ ટકા ઘટીને લગભગ ૮૧ ડોલર પ્રતિ બેરલ પર ટ્રેડ કરી રહ્યું છે. માર્ચ મહિના પછીનો આ ભાવમાં સૌથી મોટો ઘટાડો છે, જે વૈશ્વિક અર્થતંત્ર માટે સકારાત્મક સંકેત છે.
સ્ટ્રેટ ઓફ હોર્મુઝનું વ્યૂહાત્મક મહત્વ
સ્ટ્રેટ ઓફ હોર્મુઝ વિશ્વનો સૌથી મહત્વપૂર્ણ દરિયાઈ માર્ગ છે, જ્યાંથી વિશ્વના મોટાભાગના તેલના જહાજો પસાર થાય છે. ઈરાન અને અમેરિકા વચ્ચેના તણાવને પગલે ફેબ્રુઆરીના અંતથી આ માર્ગ બંધ કરી દેવામાં આવ્યો હતો. ઈરાનના એક સાંસદના જણાવ્યા અનુસાર, પહેલા કોમર્શિયલ જહાજોએ આ જળમાર્ગ પસાર કરવા માટે લગભગ ૨ મિલિયન ડોલરનો ટોલ ચૂકવવો પડતો હતો. નિષ્ણાતોએ ચેતવણી આપી હતી કે જો આ માર્ગ બંધ રહેશે, તો તેલના ભાવ ૧૦૦ ડોલરને પાર કરી જશે, પરંતુ હવે આ અવરોધ દૂર થવાથી સમગ્ર વિશ્વને રાહત મળી છે.
ભારત માટે આ સમાચાર કેમ મહત્વના છે?
ભારત પોતાની તેલની જરૂરિયાતોના ૮૫% થી વધુ ભાગ આયાત કરે છે. સ્ટ્રેટ ઓફ હોર્મુઝ ફરી ખુલવાથી ભારત માટે તેલ લાવતા જહાજોના રૂટ સરળ બનશે, જેનાથી આયાત બિલ અને ટ્રાન્સપોર્ટેશન ખર્ચમાં ધરખમ ઘટાડો થશે.
પેટ્રોલ-ડીઝલ અને ગેસના ભાવ પર શું અસર થશે?
ભારતના પેટ્રોલિયમ અને કુદરતી ગેસ મંત્રી હરદીપ સિંહ પુરીએ અગાઉ સંકેત આપ્યો હતો કે આગામી મહિનાઓમાં તેલ અને ગેસના ભાવમાં ઘટાડો થવાની સંભાવના છે. યુદ્ધ જેવી સ્થિતિને લીધે ભારતમાં પેટ્રોલ અને ડીઝલના ભાવમાં લગભગ ૮-૮.૫% નો વધારો થયો હતો. હવે ક્રૂડ ઓઈલ ૮૦ ડોલરની આસપાસ સ્થિર થવાથી એવી આશા છે કે પેટ્રોલિયમ કંપનીઓ ટૂંક સમયમાં જ પેટ્રોલ અને ડીઝલના ભાવમાં લિટર દીઠ ૩ થી ૫ રૂપિયા સુધીનો ઘટાડો કરી શકે છે. આ જ રીતે, સામાન્ય નાગરિકો માટે રસોઈ ગેસ સિલિન્ડરના ભાવમાં પણ રાહત મળવાની શક્યતાઓ વધી ગઈ છે.
