China : એકકહેવત છે કે તમે જે વાવો તે લણશો! ચીન પર તેના અવકાશના કાટમાળનો યોગ્ય રીતે નિકાલ ન કરવાનો આરોપ છે. જેના કારણે અવકાશમાં સેટેલાઇટ જેવો કચરો વધી રહ્યો છે. હવે સમાચાર આવ્યા છે કે આવા જ એક કથિત કચરાએ ચીનને મુશ્કેલીમાં મૂકી દીધું છે. ચીનના સરકારી મીડિયા અનુસાર, તેના તિઆંગોંગ સ્પેસ સ્ટેશન પર અવકાશી કાટમાળના હુમલાને કારણે વીજ પુરવઠો આંશિક રીતે પ્રભાવિત થયો હતો. આ ઘટના 1 માર્ચની જણાવવામાં આવી રહી છે, જ્યારે શેનઝોઉ 17 મિશનના અવકાશયાત્રીઓ સ્પેસવોક કરી રહ્યા હતા.
તિઆંગોંગ સ્પેસ સ્ટેશનનું સંચાલન ચીનની સ્પેસ એજન્સી CMSA દ્વારા કરવામાં આવે છે. મીડિયા રિપોર્ટ્સ અનુસાર, ચીની અવકાશયાત્રીઓ સ્પેસવોક પર હતા ત્યારે સ્પેસ સ્ટેશનની ચોકી પર અવકાશનો કાટમાળ પડ્યો હતો. જેના કારણે વીજ પુરવઠાને લગતી સમસ્યા સર્જાઈ હતી.
CMSAએ પ્રેસ કોન્ફરન્સમાં જણાવ્યું હતું કે સ્પેસવોક દરમિયાન આટલી ખલેલ હોવા છતાં સ્પેસવોક સફળ રહી હતી. એજન્સીનું કહેવું છે કે ભવિષ્યમાં તે પોતાના સ્પેસ સ્ટેશનને અવકાશના કાટમાળથી બચાવવા માટે તૈયાર હશે. ચાઈનીઝ સ્પેસ એજન્સીના ડેપ્યુટી ડિરેક્ટરે કહ્યું કે સ્પેસ સ્ટેશનના કોર મોડ્યુલ ‘તિયાનહે’ને સોલર વિંગના પાવર કેબલ પર અવકાશના કાટમાળની અસરને કારણે પાવરની અછતનો સામનો કરવો પડ્યો હતો.
જોકે, ચીને એ વાતની પુષ્ટિ કરી નથી કે આ કાટમાળ માઈક્રો-મેટોરોઈડ હતો કે ઉપગ્રહનો કાટમાળ. પરંતુ મોટી શક્યતા એ છે કે તે ઉપગ્રહનો કાટમાળ હોઈ શકે છે. આવા કચરાને આવનારા સમયમાં સ્પેસ કંપનીઓ માટે સૌથી મોટા પડકાર તરીકે જોવામાં આવી રહ્યો છે.
