SIM Rules: ડિજિટલ અરેસ્ટ સ્કેમ પર કેન્દ્રનો મોટો પ્રહાર: સુપ્રીમ કોર્ટમાં રજૂ કર્યો માસ્ટર પ્લાન, હવે સિમ કાર્ડ અને WhatsApp પર રહેશે કડક નજર
સાયબર અપરાધની દુનિયામાં વધતા જતા ‘ડિજિટલ અરેસ્ટ’ના જોખમને જોતા કેન્દ્ર સરકારે કડક વલણ અપનાવ્યું છે. સરકાર હવે સિમ કાર્ડ જારી કરવાના નિયમોમાં ધરખમ ફેરફાર કરવા, વોટ્સએપ પર દેખરેખ વધારવા અને શંકાસ્પદ બેંક ખાતાઓને તાત્કાલિક ફ્રીઝ કરવાની યોજના બનાવી રહી છે.
સિમ કાર્ડ મેળવવું હવે બનશે મુશ્કેલ
રિપોર્ટ અનુસાર, સરકાર માને છે કે મોટાભાગના સાયબર ફ્રોડ નકલી દસ્તાવેજો પર મેળવેલા સિમ કાર્ડ દ્વારા થાય છે. તેથી, હવે નવા સિમ કાર્ડ ઇશ્યૂ કરતા પહેલા બાયોમેટ્રિક વેરિફિકેશનને વધુ કડક બનાવવામાં આવશે. એટલું જ નહીં, સિમ કાર્ડ વેચનારા વિક્રેતાઓની (Vendors) પણ ઊંડી તપાસ કરવામાં આવશે. ટેલિકોમ કંપનીઓએ હવે ગ્રાહકોની વિગતો સરકારી એજન્સીઓ સાથે વધુ સક્રિય રીતે શેર કરવી પડશે, જેથી ગુનાહિત પ્રવૃત્તિમાં સામેલ સિમ કાર્ડની ત્વરિત ઓળખ થઈ શકે.
WhatsApp અને ડિજિટલ પ્લેટફોર્મ પર સકંજો
વોટ્સએપ જેવા મેસેજિંગ પ્લેટફોર્મ્સ હવે સાયબર ઠગ માટે મુખ્ય હથિયાર બન્યા છે. સરકારે સુચવ્યું છે કે જે ઉપકરણો (Devices) નો ઉપયોગ વારંવાર છેતરપિંડી માટે થાય છે તેમને કાયમી ધોરણે બ્લોક કરવા જોઈએ. આ ઉપરાંત, વોટ્સએપ એકાઉન્ટને સિમ કાર્ડ સાથે વધુ મજબૂત રીતે જોડવા અને શંકાસ્પદ લાંબા કોલ્સની ઓળખ કરવા માટેની ટેકનોલોજી વિકસાવવા પર ભાર મૂકવામાં આવ્યો છે. તપાસ એજન્સીઓની મદદ માટે ડિલીટ કરેલા એકાઉન્ટનો ડેટા પણ ચોક્કસ સમય સુધી સાચવી રાખવાનો પ્રસ્તાવ મુકાયો છે.
બેંક ખાતાઓને ત્વરિત ફ્રીઝ કરવાની વ્યવસ્થા
કેન્દ્ર સરકારે રિઝર્વ બેંકની તે નીતિને સમર્થન આપ્યું છે જેમાં સાયબર છેતરપિંડી સાથે જોડાયેલા શંકાસ્પદ ખાતાઓને તાત્કાલિક ધોરણે બ્લોક અથવા ફ્રીઝ કરવાની જોગવાઈ છે. આ વ્યવસ્થા સમગ્ર દેશમાં સમાન રીતે લાગુ કરવામાં આવશે જેથી ભોગ બનનાર વ્યક્તિના પૈસા ગુનેગારો ઉપાડી ન શકે.
છેતરપિંડી થાય તો શું કરવું? (નિષ્ણાતોની સલાહ)
જો તમે પણ ડિજિટલ સ્કેમનો શિકાર બનો છો, તો નીચે મુજબના પગલાં તાત્કાલિક લો:
હેલ્પલાઇન નંબર: તુરંત જ 1930 નંબર પર કોલ કરો અથવા cybercrime.gov.in પર ઓનલાઇન ફરિયાદ નોંધાવો.
ગોલ્ડન અવર: છેતરપિંડી થયાનો પ્રથમ એક કલાક સૌથી મહત્વનો છે. જો તમે આ સમયમાં ફરિયાદ કરો છો, તો પૈસા રિકવર થવાની શક્યતા 90% વધી જાય છે.
બેંકને જાણ કરો: તમારા બેંકના કસ્ટમર કેરને કોલ કરીને કાર્ડ અને ઇન્ટરનેટ બેંકિંગ બ્લોક કરાવો.
