BSE
અસ્થિર ટ્રેડિંગમાં, BSE સેન્સેક્સ 138.74 પોઈન્ટ અથવા 0.17 ટકાના ઘટાડા સાથે 80,081.98 પર બંધ થયો. ટ્રેડિંગ દરમિયાન સેન્સેક્સ 80,000 થી નીચે 79,891.68 પોઈન્ટ્સ પર આવી ગયો હતો. જોકે, સવારે સેન્સેક્સ 79,921.13 પોઈન્ટ પર ખુલ્યો હતો. સેન્સેક્સમાં સમાવિષ્ટ ત્રીસ શેરોમાંથી 22 શેર ખોટમાં હતા. બીજી તરફ નેશનલ સ્ટોક એક્સચેન્જનો મુખ્ય સૂચકાંક નિફ્ટી પણ 36.60 પોઈન્ટ અથવા 0.15 ટકાના ઘટાડા સાથે 24,435.50 પોઈન્ટ પર બંધ થયો હતો. ટ્રેડિંગ સેશન દરમિયાન નિફ્ટી પણ 24,378.10 પોઈન્ટ સાથે દિવસના નીચલા સ્તરે પહોંચી ગયો હતો. જોકે, નિફ્ટી સવારે 24,378.15 પોઈન્ટ પર ખુલ્યો હતો.
સેન્સેક્સના 30 શેરોમાં મહિન્દ્રા એન્ડ મહિન્દ્રા, સન ફાર્મા, પાવર ગ્રીડ, એનટીપીસી, અદાણી પોર્ટ્સ, લાર્સન એન્ડ ટુબ્રો, આઈસીઆઈસીઆઈ બેંક અને ટાઈટન મુખ્ય ઘટ્યા હતા. બીજી તરફ, બજાજ ફાઇનાન્સના બીજા ક્વાર્ટરના નાણાકીય પરિણામો જાહેર થયા બાદ કંપનીના શેરમાં લગભગ પાંચ ટકાનો વધારો થયો હતો. કંપનીનો કોન્સોલિડેટેડ ચોખ્ખો નફો સપ્ટેમ્બર 2024માં પૂરા થયેલા બીજા ક્વાર્ટરમાં 13 ટકા વધીને રૂ. 4,014 કરોડ થયો છે. અન્ય લાભકર્તાઓમાં ટેક મહિન્દ્રા, ટાટા કન્સલ્ટન્સી સર્વિસ, એચડીએફસી બેંક, એચસીએલ ટેક્નોલોજીસ અને બજાજ ફિનસર્વનો સમાવેશ થાય છે. શેરબજારના આંકડા અનુસાર, વિદેશી સંસ્થાકીય રોકાણકારો (FII) એ મંગળવારે રૂ. 3,978.61 કરોડના શેરનું વેચાણ કર્યું હતું જ્યારે સ્થાનિક સંસ્થાકીય રોકાણકારો (DII) એ રૂ. 5,869.06 કરોડના શેર ખરીદ્યા હતા.
જો સેક્ટોરલ ઈન્ડાયસિસની વાત કરીએ તો BSEના મિડ કેપ અને સ્મોલ કેપમાં સારી વૃદ્ધિ જોવા મળી હતી. જો આંકડાઓની વાત કરીએ તો મિડકેપમાં 222.04 પોઈન્ટનો વધારો જોવા મળ્યો છે. જ્યારે સ્મોલ કેપમાં 499.26 પોઈન્ટનો વધારો જોવા મળ્યો છે. BSE ITમાં 800થી વધુ પોઈન્ટનો વધારો જોવા મળ્યો છે. બીજી તરફ BSE ટેક સેક્ટરમાં 240 પોઈન્ટથી વધુનો વધારો જોવા મળ્યો છે. ફાર્મા અને ઈન્ડસ્ટ્રીયલ સેક્ટરમાં 365 અને 112 પોઈન્ટનો ઘટાડો જોવા મળ્યો છે. કેપિટલ ગુડ્સમાં 800થી વધુ પોઈન્ટનો ઘટાડો જોવા મળ્યો છે.
મિડકેપ અને સ્મોલકેપમાં વધારાને કારણે બીએસઈનું માર્કેટ કેપ પણ વધ્યું અને રોકાણકારોને રૂ. 85 હજાર કરોડનો નફો થયો. એક દિવસ પહેલા BSEનું માર્કેટ કેપ રૂ. 4,44,45,649.22 કરોડ હતું. જે બુધવારે વધીને 4,45,31,226.01 કરોડ રૂપિયા થઈ ગયો છે. આનો અર્થ એ થયો કે BSEના માર્કેટ કેપમાં રૂ. 85,576.79 કરોડનો વધારો જોવા મળ્યો છે. જ્યારે એક દિવસ પહેલા BSEના માર્કેટ કેપમાં રૂ. 9 લાખ કરોડથી વધુનું નુકસાન થયું હતું.
એશિયાના અન્ય બજારોમાં દક્ષિણ કોરિયાનો કોસ્પી, ચીનનો શાંઘાઈ કમ્પોઝિટ અને હોંગકોંગનો હેંગસેંગ નફામાં હતો જ્યારે જાપાનનો નિક્કી ખોટમાં હતો. બપોરે કારોબારમાં યુરોપિયન બજારોમાં મિશ્ર વલણ હતું. અમેરિકન બજારો મંગળવારે સ્થિર વલણ સાથે બંધ થયા છે. ગ્લોબલ ઓઈલ સ્ટાન્ડર્ડ બ્રેન્ટ ક્રૂડની કિંમત 0.97 ટકા ઘટીને 75.30 ડોલર પ્રતિ બેરલ થઈ ગઈ છે. મંગળવારે BSE સેન્સેક્સ 930.55 પોઈન્ટ્સ જ્યારે નિફ્ટી 309 પોઈન્ટ્સ તૂટ્યો હતો.
જિયોજિત ફાઇનાન્શિયલ સર્વિસિસ લિમિટેડના રિસર્ચ હેડ વિનોદ નાયરે જણાવ્યું હતું કે કંપનીઓના નબળા ત્રિમાસિક પરિણામો અને FIIના સતત ઉપાડને કારણે બજારના સેન્ટિમેન્ટને અસર થઈ હતી. જોકે, મધ્યમ અને નાની કંપનીઓના શેરમાં તાજેતરમાં થયેલા ઘટાડા બાદ ખરીદી જોવા મળી હતી. જો કે, આ સ્થિતિ ચાલુ રાખવા અંગે અનિશ્ચિતતા છે. નાયરે કહ્યું કે અમેરિકામાં 10-વર્ષના બોન્ડ પર યીલ્ડમાં વધારો થયો છે. આનાથી ફેડરલ રિઝર્વ દ્વારા પોલિસી રેટમાં ઝડપી કાપ અંગેની અપેક્ષાઓ ઘટી છે.
