Banks
Banks: નાણા મંત્રાલયે મંગળવારે જણાવ્યું હતું કે જાહેર ક્ષેત્રની બેંકોએ (PSBs) ચાલુ નાણાકીય વર્ષના પ્રથમ છ મહિનામાં મજબૂત પ્રદર્શન દર્શાવ્યું છે. મંત્રાલયે કહ્યું કે આ સમયગાળા દરમિયાન જાહેર ક્ષેત્રની બેંકોના ચોખ્ખા નફામાં 26 ટકાનો વધારો થયો છે. આ સિવાય તેમનું ટર્નઓવર પણ વધ્યું છે જ્યારે નોન-પર્ફોર્મિંગ એસેટ્સ (NPA)માં ઘટાડો થયો છે. સ્ટેટ બેંક ઓફ ઈન્ડિયા અને પંજાબ નેશનલ બેંક સહિત 12 જાહેર ક્ષેત્રની બેંકોનો કુલ બિઝનેસ એપ્રિલ-સપ્ટેમ્બર દરમિયાન રૂ. 236.04 લાખ કરોડ રહ્યો હતો. વાર્ષિક ધોરણે 11 ટકાનો વધારો થયો હતો. નાણાકીય વર્ષ 2024-25ના પ્રથમ છ મહિનામાં તેમનું દેવું વાર્ષિક ધોરણે 12.9 ટકા વધીને રૂ. 102.29 લાખ કરોડ થયું છે. આ સમયગાળા દરમિયાન, જાહેર ક્ષેત્રની બેંકોનો ડિપોઝિટ પોર્ટફોલિયો 9.5 ટકા વધીને રૂ. 133.75 લાખ કરોડ થયો છે.
સમીક્ષા હેઠળના સમયગાળા દરમિયાન, બેંકોનો કાર્યકારી નફો વાર્ષિક ધોરણે 14.4 ટકા વધીને રૂ. 1,50,023 કરોડ થયો છે. ચોખ્ખો નફો 25.6 ટકા વધીને રૂ. 85,520 કરોડ થયો છે. સપ્ટેમ્બર 2024માં બેન્કોની ગ્રોસ અને નેટ એનપીએ અનુક્રમે 3.12 ટકા અને 0.63 ટકા હતી. વાર્ષિક ધોરણે અનુક્રમે 1.08 ટકા અને 0.34 ટકાનો ઘટાડો થયો હતો. નાણા મંત્રાલયે નિવેદનમાં કહ્યું કે બેન્કિંગ સેક્ટરમાં સુધારા અને નિયમિત દેખરેખથી ઘણી ચિંતાઓ અને પડકારોનો ઉકેલ આવ્યો છે.
નાણા મંત્રાલયે એમ પણ જણાવ્યું હતું કે તેણે જાહેર ક્ષેત્રની બેંકો (PSBs) ને ચાલુ નાણાકીય વર્ષ દરમિયાન કૃષિ ક્ષેત્રના ધિરાણ લક્ષ્યાંકને પહોંચી વળવા પગલાં લેવા જણાવ્યું છે. નાણાકીય સેવા વિભાગના સચિવ એમ નાગરાજુએ મંગળવારે PSBs, NABARD અને રાજ્ય સ્તરીય બેન્કર્સ સમિતિ સાથેની બેઠકમાં આ વાત કહી. આ દરમિયાન, તેમણે પશુપાલન, ડેરી અને મત્સ્યઉદ્યોગ જેવી કૃષિ સંબંધિત પ્રવૃત્તિઓ માટે લોનના વિતરણની સમીક્ષા કરી. નાણા મંત્રાલયે બુધવારે જણાવ્યું હતું કે રાજ્ય સરકારો, પશુપાલન અને ડેરી વિભાગ અને મત્સ્યોદ્યોગ વિભાગના પ્રતિનિધિઓએ પણ ચર્ચામાં ભાગ લીધો હતો.
