માણસા પોલીસ સ્ટેશનના ડી સ્ટાફના ASI ૬૦૦૦૦ રૂપિયાની લાંચ લેતા રંગેહાથ ઝડપાતા એન્ટી કરપ્શન બ્યૂરો દ્વારા ધરપકડ કરીને કાયદેસરની કાર્યવાહી હાથ ધરવામાં આવી છે. લાંચિયા અધિકારીની ઓળખ મુકેશસિંહ અણદુસિંહ વાઘેલા તરીકે થઈ છે. મુકેશસિંહે ફરિયાદી પાસેથી લાંચ માગી હતી. જાે કે, ફરિયાદી રૂપિયા દેવા માંગતો ન હોવાથી ACB ને જાણ કરતા ટ્રેપ ગોઠવવામાં આવી હતી. જેમાં મુકેશસિંહ ફરિયાદી પાસેથી આ રૂપિયા લેતા રંગેહાથ ઝડપાઈ ગયા હતા.
ACB ટ્રેપની વિગતો અનુસાર આ કામના ફરિયાદીના કાકા ઉપર માણસા પોલીસ સ્ટેશન ખાતે પ્રોહિબિશનનો ગુનો દાખલ કરવામાં આવ્યો હતો. જેને ગુનાના કામે હાજર કરી, માર ન મારવા અને જામીન ઉપર છોડવાના અવેજ પેટે આ આરોપી ASI મુકેશસિંહે ફરિયાદી પાસેથી ૬૦૦૦૦ રૂપિયા માગ્યા હતા. જે લાંચના નાણાં ફરિયાદી આપવા માંગતા ન હોઇ, ફરિયાદીએ એ.સી.બી.નો સંપર્ક કર્યો હતો. જેથી આજરોજ લાંચના છટકા દરમિયાન ફરિયાદી સાથે આરોપીએ હેતુલક્ષી વાતચીત કરી લાંચના ૬૦૦૦૦ સ્વીકારતા પકડાઈ ગયા હતા. આરોપીને એ.સી.બી.એ ડીટેઇન કરી આગળની કાર્યવાહી હાથ ધરી છે.
