Air India: ટર્બ્યુલન્સ બાદ એર ઈન્ડિયાની નવી ઉડાન: ઈંધણના ભાવમાં ઘટાડાથી મળી રાહત
ટાટા ગ્રૂપની માલિકીની એર ઈન્ડિયા આવનારા સમયમાં તેની ફ્લાઈટ્સની સંખ્યામાં વધારો કરી શકે છે. એર ઈન્ડિયાના સીઈઓ અને મેનેજિંગ ડિરેક્ટર કેમ્પબેલ વિલ્સને સંકેત આપ્યો છે કે જો વર્તમાન સકારાત્મક સ્થિતિ યથાવત રહેશે, તો એરલાઈન તેના સંચાલનને ફરીથી વિસ્તૃત કરી શકે છે.
પશ્ચિમ એશિયામાં સ્થિરતા અને એટીએફમાં ઘટાડો
કેમ્પબેલ વિલ્સને કંપનીના કર્મચારીઓને મોકલેલા સંદેશમાં જણાવ્યું હતું કે, પશ્ચિમ એશિયામાં તાજેતરના સમયમાં તણાવ ઘટ્યો છે. જોકે ભવિષ્ય વિશે કોઈ ચોક્કસ ખાતરી આપી શકાય નહીં, પરંતુ હાલની સ્થિરતાને કારણે એરસ્પેસ (હવાઈ ક્ષેત્ર) વધુ ઉપલબ્ધ બન્યું છે. આ ઉપરાંત, એવિએશન ટર્બાઇન ફ્યુઅલ (ATF) એટલે કે વિમાનના ઈંધણના ભાવમાં નોંધપાત્ર ઘટાડો જોવા મળ્યો છે.
એરલાઈન્સના કુલ સંચાલન ખર્ચમાં એટીએફનો હિસ્સો 40 ટકાથી વધુ હોય છે. તેથી, ઈંધણના ભાવમાં ઘટાડો એ એર ઈન્ડિયા માટે મોટી રાહત સમાન છે. વિલ્સને આશા વ્યક્ત કરી હતી કે જો આ ટ્રેન્ડ ચાલુ રહેશે, તો એરલાઈન જે ફ્લાઈટ્સમાં કાપ મૂક્યો હતો, તેને ફરીથી શરૂ કરી શકશે.
ભૂતકાળમાં લેવાયેલા કઠોર નિર્ણયો
મે મહિનામાં પરિસ્થિતિ સંપૂર્ણપણે અલગ હતી. પશ્ચિમ એશિયામાં વધેલા ભૌગોલિક-રાજકીય તણાવ અને હવાઈ ક્ષેત્ર પર લાદવામાં આવેલા પ્રતિબંધોને કારણે એર ઈન્ડિયાને ખૂબ જ મુશ્કેલ નિર્ણયો લેવા પડ્યા હતા. એ સમયે ઈંધણના વધતા ભાવ અને રૂટ બદલવાની ફરજ પડવાને કારણે સંચાલન ખર્ચ આસમાને પહોંચ્યો હતો.
પરિણામે, એર ઈન્ડિયાએ પોતાની આંતરરાષ્ટ્રીય ફ્લાઈટ્સમાં 27 ટકાનો મોટો કાપ મૂક્યો હતો. આટલું જ નહીં, આર્થિક ભારણ ઘટાડવા અને એટીએફના ઊંચા ખર્ચ સામે ટકી રહેવા માટે કંપનીએ ઘરેલું (ડોમેસ્ટિક) ફ્લાઈટ્સમાં પણ કામચલાઉ ધોરણે 22 ટકાનો ઘટાડો કરવાની ફરજ પડી હતી.
એર ઈન્ડિયાનો વિસ્તરણ પ્લાન અને નવા વિમાનો
એક તરફ જ્યાં ફ્લાઈટ્સના પુનઃસંચાલનની ચર્ચાઓ ચાલી રહી છે, ત્યાં બીજી તરફ એર ઈન્ડિયા તેના કાફલા (ફ્લીટ)ને આધુનિક બનાવવા પર પણ ધ્યાન કેન્દ્રિત કરી રહી છે. વિલ્સને માહિતી આપી હતી કે આ વર્ષે એર ઈન્ડિયાના કાફલામાં 8 નવા અથવા રિ-કન્સ્ટ્રક્ટેડ ‘વાઈડ-બોડી’ એરક્રાફ્ટ સામેલ કરવામાં આવશે. આ પ્રક્રિયાના ભાગરૂપે આ સપ્તાહના અંતમાં નવું ‘B-787-9’ વિમાન કંપનીમાં જોડાઈ રહ્યું છે.
