પોતાની ઓળખ યુકેના હાર્ટ સ્પેશિયાલિસ્ટ તરીકે આપનારા એક ગઠિયાએ ગુજરાતની ૨૨ જેટલી ભણેલી-ગણેલી અને સારા ઘરની મહિલાઓને પોતાની પ્રેમજાળમાં ફસાવીને તેમની પાસેથી સાડા ચાર કરોડ રૂપિયા જેટલી મસમોટી રકમ પડાવી હોવાની એક ચોંકાવનારી ઘટના સામે આવી છે. અમદાવાદની એક મહિલા ડોક્ટર પણ આ ઠગનો શિકાર બની હતી, જેની પાસેથી તેણે ૧૮ લાખ રૂપિયા પડાવ્યા હતા. આ મહિલા ડોક્ટરને એમ હતું કે તે પોતાના સંપર્કમાં આવેલા યુકેના ડોક્ટર સાથે પરણીને ત્યાં સેટલ થઈ જશે, પરંતુ આ ગઠિયાને ટૂકડે-ટૂકડે ૧૮ લાખ રૂપિયા ટ્રાન્સફર કર્યા બાદ તેની સાથે સંપર્ક કપાઈ જતાં મહિલાને પોતે છેતરાઈ હોવાનો અહેસાસ થયો હતો.
આ મામલે તેણે પોલીસનો સંપર્ક કરતાં આ સમગ્ર કાંડ બહાર આવ્યો હતો. પોલીસનું માનવું છે કે યુકેનો આ કહેવાતો હાર્ટ સ્પેશિયાલિસ્ટ કુલ ૨૨ મહિલાઓને છેતરી ચૂક્યો છે. અમદાવાદની જે ૩૫ વર્ષીય મહિલા ડોક્ટરને તેણે શિકાર બનાવી હતી તે શહેરમાં સ્કીન સ્પેશિયાલિસ્ટ તરીકે પ્રેક્ટિસ કરે છે, જેને મેટ્રિમોનિયલ વેબસાઈટ પર મળેલા આ ઠગે પોતાની ઓળખ યુકેના હાર્ટ સ્પેશિયાલિસ્ટ ડોક્ટર દિલિપ કુમાર તરીકે આપી હતી. પોતે ભણેલી-ગણેલી હોવા છતાંય એક ઠગની જાળમાં સપડાઈ ગઈ હોવાનો અહેસાસ થતાં અમદાવાદની આ મહિલા આઘાતમાં સરી પડી હતી, શરૂઆતમાં તે પોલીસનો સંપર્ક કરવા માટે પણ તૈયાર નહોતી. જાેકે, પોલીસે તેનું કાઉન્સેલિંગ કર્યા બાદ તે અરજી આપવા માટે તૈયાર થઈ હતી. પોલીસે આ મહિલાને સમજાવ્યું હતું કે કઈ રીતે આવા ઠગ કોઈને કલ્પના પણ ના આવે તે રીતે નિર્દોષ મહિલાઓને પોતાની જાળમાં ફસાવીને તેમની પાસેથી મોટી રકમ પડાવી લે છે.
આ કેસની તપાસ દરમિયાન પોલીસને જાણવા મળ્યું હતું કે આ ઠગે સોશિયલ મીડિયા તેમજ મેટ્રીમોનિયલ વેબસાઈટ્સ પર પ્રોફાઈલ્સ બનાવી રાખી હતી અને તેના દ્વારા જ તે પોતાના શિકાર શોધતો હતો. આ હોશિયાર ઠગ ૩૦ વર્ષથી ઉપરની વય ધરાવતી હોય તેવી જ ભણેલી-ગણેલી મહિલાઓને ટાર્ગેટ કરતો હતો. તેમની સાથે અમુક સમય સુધી સારી-સારી વાતો કરીને તે પોતાની જાળમાં સપડાયેલી મહિલાનો વિશ્વાસ જીતી લેતો હતો અને ત્યારબાદ મોટાભાગે મેડિકલ ઈમરજન્સીનું બહાનું કાઢીને તેમની પાસેથી રૂપિયા પડાવતો હતો. એટલું જ નહીં, તે લગ્નની વાતો કરીને આવી મહિલાઓને પાસેથી મોંઘી ગિફ્ટ્સ પણ મેળવતો હતો. એક પોલીસ અધિકારીના જણાવ્યા અનુસાર, આ ઠગનો શિકાર બનેલી મહિલાઓ શરૂઆતમાં તો તેની સામે નિવેદન આપવામાં પણ ખૂબ જ સંકોચ અનુભવતી હતી.
જાેકે, તેમનું લાંબો સમય કાઉન્સેલિંગ કર્યા બાદ પોલીસને તેમના સ્ટેટમેન્ટ મેળવવામાં સફળતા મળી હતી અને ત્યારબાદ પોલીસે તેમણે ગુમાવેલા કુલ સાડા ચાર કરોડ રૂપિયા પણ પાછા અપાવ્યા હતા. પોલીસનું માનવું છે કે આ ઠગે હજુ પણ ઘણી મહિલાઓને પોતાનો શિકાર બનાવી છે, પરંતુ તેઓ પોલીસનો સંપર્ક કરતા અચકાઈ રહી છે. ઠગાઈના આવા કેસમાં જાે વિક્ટિમે કોઈ બેંક અકાઉન્ટમાં પૈસા ટ્રાન્સફર કર્યા હોય તો તેને પાછા મેળવી શકાય છે, CID ક્રાઈમે CrPC સેક્શન ૪૫૭ હેઠળ આવા કેસમાં વિક્ટિમ્સ પાસેથી અરજી લઈને ચાલુ વર્ષમાં જ ૧૨ કરોડથી વધુ રકમ પાછી અપાવી છે. આવા કેસમાં પોલીસે ભોગ બનનારા લોકોની મદદ લેવા માટે ખાસ હેલ્પલાઈન પણ શરૂ કરી છે જેનો નંબર છે ૧૯૩૦. તેના પર સંપર્ક કરી વિક્ટિમ પોતે જે અકાઉન્ટમાં પૈસા ટ્રાન્સફર કર્યા હોય તેની ડિટેલ શેર કરે તો પોલીસ તે અકાઉન્ટને ફ્રીઝ કરાવી શકે છે, જેના કારણે છેતરપિંડી કરનારો વ્યક્તિ અકાઉન્ટમાંથી પૈસા નથી ઉપાડી શકતો. જાેકે, તેના માટે વિક્ટિમ બને તેટલું જલ્દી પોલીસનો સંપર્ક કરે તે જરૂરી છે, કારણકે ઘણા કેસમાં રકમ ટ્રાન્સફર થતાં જ ગઠિયા તેને ઉપાડી લેતા હોય છે. ઉલ્લેખનીય છે કે, ગુજરાત પોલીસને સાયબર ફ્રોડના રોજના ૧૨૦૦થી ૧૩૦૦ કોલ્સ આવે છે, જેથી દરેક કેસમાં ફરિયાદ નોંધી લાંબી કાયદાકીય પ્રક્રિયા કરવી શક્ય ના હોવાથી પોલીસ તેમની પાસેથી અરજી લઈ ગઠિયાનું બેંક અકાઉન્ટ ફ્રિઝ કરાવી દે છે.
