PM Modi: આપાતકાલનો કાળો અધ્યાય: વડાપ્રધાન મોદીએ શહીદોને યાદ કરી બંધારણીય મૂલ્યો પર આપ્યો ભાર
આજે, 25 જૂનના રોજ વડાપ્રધાન નરેન્દ્ર મોદીએ ‘સંવિધાન હત્યા દિવસ’ નિમિત્તે દેશના ઇતિહાસના તે સૌથી કાળા અધ્યાયને યાદ કર્યો, જ્યારે ભારતીય લોકશાહીને દબાવી દેવામાં આવી હતી. આજના દિવસે વડાપ્રધાને માત્ર તે સમયની પીડાને વાચા આપી નથી, પરંતુ ભવિષ્ય માટે બંધારણીય મૂલ્યોના રક્ષણનો દ્રઢ સંકલ્પ પણ વ્યક્ત કર્યો છે.
લોકશાહી પર ‘આપાતકાલ’નો આઘાત
વડાપ્રધાન મોદીએ સોશિયલ મીડિયા પ્લેટફોર્મ ‘X’ પર પોતાના વિચારો રજૂ કરતા જણાવ્યું કે, “આપાતકાલ એ આપણા બંધારણ પર સીધો અને ક્રૂર હુમલો હતો.” તે સમયે નાગરિકોની સ્વતંત્રતા છીનવી લેવામાં આવી હતી, અભિવ્યક્તિની આઝાદી પર તાળાં મારી દેવાયા હતા અને દેશના નેતાઓ, પત્રકારો તથા સમાજસેવકોને જેલના સળિયા પાછળ ધકેલી દેવામાં આવ્યા હતા. લોકશાહીની પાયાની સંસ્થાઓને નબળી પાડવાનો જે પ્રયાસ થયો હતો, તે ભારતના ઇતિહાસમાં એક કલંક સમાન છે.
અસાધારણ સાહસનું સ્મરણ
જોકે, વડાપ્રધાને તે સમયના વિરોધ પ્રદર્શનની પણ ખાસ નોંધ લીધી. તેમણે કહ્યું કે, “આપાતકાલના તે અંધકારમય સમયગાળામાં અનેક નાગરિકોએ અસાધારણ સાહસ બતાવ્યું હતું.” જેમણે અન્યાય સામે ચૂપ રહેવાનો ઇનકાર કર્યો અને બંધારણીય આદર્શોને જાળવી રાખવા માટે અવાજ ઉઠાવ્યો, તેવી તમામ વડાપ્રધાને સાદર નમન કર્યા છે. આ સંઘર્ષ આપણને એ શીખવે છે કે લોકશાહીની રક્ષા એ નાગરિકોની સૌથી મોટી ફરજ છે.
બંધારણીય મૂલ્યો અને 140 કરોડની આશાઓ
પીએમ મોદીએ ભારપૂર્વક કહ્યું કે, “આપણું બંધારણ એ માત્ર કાગળનો દસ્તાવેજ નથી, પરંતુ 140 કરોડ ભારતીયોની આશાઓ, અધિકારો અને કર્તવ્યોનું પ્રતીક છે.” બંધારણીય મૂલ્યોની રક્ષા માટે દેશની સામૂહિક પ્રતિબદ્ધતાને દોહરાવતા તેમણે જણાવ્યું કે આપણો ઉદ્દેશ્ય એક એવા ભારતનું નિર્માણ કરવાનો છે, જ્યાં ન્યાય, સ્વતંત્રતા, સમાનતા અને બંધુત્વના આદર્શો કાયમ માટે અડીખમ રહે.
લોકશાહીની જાળવણીનો સંકલ્પ
‘સંવિધાન હત્યા દિવસ’ માત્ર ભૂતકાળને યાદ કરવાનો દિવસ નથી, પરંતુ તે આપણને સતર્ક રહેવાની પ્રેરણા પણ આપે છે. વડાપ્રધાને સ્પષ્ટ કર્યું કે લોકશાહી અને નાગરિક અધિકારોની રક્ષા માટે આપણે હંમેશા તૈયાર રહેવું જોઈએ. ભવિષ્યમાં ક્યારેય આવો સમય ન આવે અને લોકશાહીના સ્તંભો મજબૂત રહે તે માટે સતત જાગૃતતા જરૂરી છે.
