Gmail: છેલ્લા 5 દિવસથી જીમેલ યુઝર્સ પરેશાન, ગૂગલના આ બગ પાછળનું શું છે કારણ?
જો સ્માર્ટફોન કે ટેબ્લેટમાં જીમેલ (Gmail) ઓપન કર્યા પછી તમારા ડિવાઇસની સ્ક્રીન અચાનક ધ્રુજવા લાગે (Flicker થવા લાગે) અથવા આખી સ્ક્રીન સફેદ કે બ્લેન્ક (કોરી) થઈ જાય, તો ચિંતા ન કરશો, આ સમસ્યાનો સામનો કરનારા તમે એકલા નથી. ઇન્ટરનેટ જાયન્ટ ગૂગલની લોકપ્રિય ઈમેલ સર્વિસ જીમેલમાં એક નવો મોટો બગ (ટેકનિકલ ખામી) આવ્યો છે, જેના કારણે લાખો યુઝર્સ માટે પોતાના જરૂરી ઈમેલ વાંચવા પણ મુશ્કેલ બની ગયા છે.
આ સમસ્યા ખાસ કરીને એન્ડ્રોઇડ (Android) ડિવાઇસ વાપરતા યુઝર્સને વધુ પરેશાન કરી રહી છે. યુઝર્સના જણાવ્યા અનુસાર, આ બગના કારણે જીમેલ એપ ઓપન કરતા જ સ્ક્રીન ફ્લિકરિંગ થવી, સ્ક્રીન પર લખેલો ટેક્સ્ટ ગાયબ થઈ જવો અથવા આખી ડિસ્પ્લે બ્લેન્ક થઈ જવી જેવી ગંભીર સમસ્યાઓ આવી રહી છે. છેલ્લા ૪ થી ૫ દિવસથી યુઝર્સ આ ટેકનિકલ પ્રોબ્લેમનો સામનો કરી રહ્યા છે અને નવાઈની વાત એ છે કે સામાન્ય રીતે અજમાવવામાં આવતી કોઈ પણ ટ્રીક આ બગ સામે કામ કરી રહી નથી.
ગૂગલ સપોર્ટ ફોરમ પર યુઝર્સે ઠાલવ્યો બળાપો
એક પરેશાન યુઝરે ગૂગલ સપોર્ટ ફોરમ (Google Support Forum) પર પોતાની ફરિયાદ નોંધાવતા લખ્યું કે:
“જ્યારે પણ હું કોઈ નવો ઈમેલ ઓપન કરવાનો પ્રયત્ન કરું છું, ત્યારે ડિવાઇસની સ્ક્રીન જોરજોરથી ફ્લિકર થવા લાગે છે અને ઈમેલ વાંચી શકાતો નથી. મેં જીમેલ એપને ‘ફોર્સ સ્ટોપ’ કરી જોઈ, ‘કેશ મેમરી ક્લિયર’ કરી અને મારા ટેબ્લેટને ‘રીસ્ટાર્ટ’ પણ કરી જોયું. એપ અપડેટ કર્યા પછી પણ આ પ્રોબ્લેમ સોલ્વ થતો નથી.”
જ્યારે અન્ય એક યુઝરે જણાવ્યું કે તેને માત્ર ટેબ્લેટ પર જ આ સમસ્યા આવી રહી છે, જ્યારે સ્માર્ટફોન પર એપ બિલકુલ બરાબર કામ કરી રહી છે.
સેમસંગ (Samsung) ના યુઝર્સ સૌથી વધુ પ્રભાવિત
પ્રાપ્ત અહેવાલો અને ટેક રિપોર્ટ્સ અનુસાર, આ જીમેલ બગની સૌથી વધુ માઠી અસર સેમસંગના પ્રીમિયમ ડિવાઇસ પર જોવા મળી રહી છે. ખાસ કરીને સેમસંગના ટેબ્લેટ્સ (Samsung Tablets) અને મોંઘા ફોલ્ડેબર સ્માર્ટફોન જેમ કે Galaxy Z Fold 3 નો ઉપયોગ કરનારા યુઝર્સ આ બગથી સૌથી વધુ પરેશાન છે.
ટેક એક્સપર્ટ્સનું માનવું છે કે આ સમસ્યા જીમેલ એપની પોતાની નથી, પરંતુ એન્ડ્રોઇડ ઓપરેટિંગ સિસ્ટમમાં રહેલા એન્ડ્રોઇડ સિસ્ટમ વેબવ્યૂ (Android System WebView) નામના ઇન્ટરનલ ટૂલના કારણે ઉભી થઈ રહી છે. ગૂગલ કંપનીને આ બગ અંગે સત્તાવાર જાણકારી આપી દેવામાં આવી છે, પરંતુ હજુ સુધી કંપની તરફથી આ મામલે કોઈ સત્તાવાર નિવેદન કે ‘સોફ્ટવેર પેચ’ (ઇસ્યુ ફિક્સ) જાહેર કરવામાં આવ્યો નથી.
પ્રભાવિત યુઝર્સ આ સરળ રીતો અજમાવી શકે છે
ગૂગલ તરફથી જ્યાં સુધી આ બગને સુધારવા માટે નવું અપડેટ બહાર પાડવામાં ન આવે, ત્યાં સુધી જો તમારે જીમેલ પર અર્જન્ટ ઈમેલ વાંચવા હોય, તો તમે આ કામચલાઉ (Temporary) જુગાડ અથવા રીતો અજમાવી શકો છો:
સ્ક્રીન રોટેશન ટ્રીક: જ્યારે તમે જીમેલ ઓપન કરો અને સ્ક્રીન બ્લેન્ક થઈ જાય, ત્યારે તમારા ડિવાઇસને ‘પોર્ટ્રેટ મોડ’ (ઊભો ફોન) માંથી ‘લેન્ડસ્કેપ મોડ’ (આડો ફોન) માં ફેરવો અને ફરી પાછો પોર્ટ્રેટ મોડમાં લાવો. તમારા ફોનમાં ‘ઓટો-રોટેટ’ (Auto-Rotate) ફીચર ઓન કરીને ડિવાઇસને બંને મોડમાં ફેરવી જુઓ, આનાથી ટેક્સ્ટ લોડ થઈ જાય છે.
વેબવ્યૂ કેશ ક્લિયર કરો: ફોનના સેટિંગ્સમાં જઈને ‘Apps’ સેક્શન ઓપન કરો. ત્યાં Android System WebView શોધો. તેના સ્ટોરેજ ઓપ્શનમાં જઈને ‘Clear Cache’ પર ક્લિક કરો અને તેને પ્લે સ્ટોર પરથી લેટેસ્ટ વર્ઝન સાથે અપડેટ કરી લો. આ સ્ટેપ ફોલો કરવાથી ઘણા યુઝર્સનો પ્રોબ્લેમ સોલ્વ થયો છે.
બ્રાઉઝરનો ઉપયોગ કરો: જો એપ બિલકુલ કામ ન કરી રહી હોય, તો ગૂગલ ક્રોમ (Chrome) બ્રાઉઝર ઓપન કરીને ત્યાં
gmail.comસર્ચ કરીને લોગઈન કરો, બ્રાઉઝર પર ઈમેલ સરળતાથી ઓપન થઈ જશે.
