SBI: બેંક એકાઉન્ટ ખાલી થતા બચાવો: YONO SBI યુઝર્સ માટે સુરક્ષાની નવી ગાઈડલાઈન.
ભારત જે ઝડપે ડિજિટલ ક્રાંતિ તરફ આગળ વધી રહ્યું છે, તેની સાથે જ સાયબર ક્રાઈમ અને ઓનલાઈન છેતરપિંડીના કિસ્સાઓ પણ રોકેટ ગતિએ વધી રહ્યા છે. ખાસ કરીને ડિજિટલ બેંકિંગ ક્ષેત્રમાં સ્કેમર્સ દરરોજ નિર્દોષ લોકોને શિકાર બનાવી રહ્યા છે. દેશની સૌથી મોટી જાહેર ક્ષેત્રની બેંક, સ્ટેટ બેંક ઓફ ઈન્ડિયા (SBI) એ તેના કરોડો ગ્રાહકોને, ખાસ કરીને YONO SBI એપનો ઉપયોગ કરનારાઓને ગંભીર ચેતવણી આપી છે.
YONO ના નામે સોશિયલ મીડિયા પર ફેક પેજનું જાળ
આજકાલ સ્કેમર્સ સોશિયલ મીડિયા પ્લેટફોર્મ (Facebook, Instagram) પર SBI YONO ના નામે નકલી પેજ બનાવીને લોકોને લલચાવી રહ્યા છે. આ ઠગ લોકો ‘સ્પોન્સર્ડ એડ’ (Sponsored Ads) ચલાવે છે, જેમાં લખેલું હોય છે: “શું તમે તમારો યુઝરનેમ કે પાસવર્ડ ભૂલી ગયા છો? ચિંતા કરશો નહીં, આ લિંક પર ક્લિક કરો અને 2 મિનિટમાં રિકવર કરો.”
SBI એ સ્પષ્ટ કર્યું છે કે બેંક ક્યારેય આવી કોઈ લિંક સોશિયલ મીડિયા પર શેર કરતી નથી. જો તમે આવી લિંક પર ક્લિક કરો છો, તો તમે એક નકલી વેબસાઈટ પર પહોંચો છો જે જોવામાં અસલી જેવી જ લાગે છે, પરંતુ ત્યાં તમારી બેંકિંગ વિગતો નાખતા જ તમારું એકાઉન્ટ ખાલી થઈ શકે છે.
બેંક અધિકારી બનીને આવતા ફેક કોલ્સથી બચો
સ્કેમર્સની બીજી પદ્ધતિ ‘વિશિંગ’ (Vishing) છે. જેમાં ઠગ પોતે બેંકના મોટા અધિકારી હોવાનો ડોળ કરીને ફોન કરે છે. તેઓ તમને KYC અપડેટ કરવા, પાન કાર્ડ લિંક કરવા અથવા તમારું એકાઉન્ટ બ્લોક થઈ ગયું હોવાનો ડર બતાવીને તમારી પાસેથી OTP, PIN અથવા પાસવર્ડ માંગે છે.
યાદ રાખો: SBI અથવા કોઈપણ બેંકના અધિકારી ક્યારેય ફોન, SMS કે ઈમેલ દ્વારા તમારો સિક્રેટ પાસવર્ડ કે OTP માંગતા નથી. જો કોઈ આવું માંગે, તો સમજી લેવું કે તે સો ટકા ફ્રોડ છે.
કયા નંબરથી આવે છે અસલી કોલ?
બેંકે ગ્રાહકોની સુવિધા માટે જણાવ્યું છે કે સામાન્ય રીતે બેંકના સત્તાવાર કોલ્સ 1600 થી શરૂ થતા નંબરો પરથી આવે છે. જો તમને કોઈ સામાન્ય મોબાઈલ નંબર કે અજાણ્યા લેન્ડલાઈન નંબર પરથી બેંકિંગ ડિટેલ્સ માટે કોલ આવે, તો તરત જ સાવધ થઈ જાવ અને કોઈ પણ માહિતી શેર ન કરો.
સુરક્ષિત રહેવા માટે આટલું ચોક્કસ કરો:
હંમેશા ગૂગલ પ્લે સ્ટોર કે એપલ એપ સ્ટોર પરથી જ સત્તાવાર YONO SBI એપ ડાઉનલોડ કરો.
કોઈપણ લિંક પર ક્લિક કરવાને બદલે સીધા
onlinesbi.sbiવેબસાઈટનો જ ઉપયોગ કરો.તમારા ફોનમાં ‘ટૂ-ફેક્ટર ઓથેન્ટિકેશન’ હંમેશા ચાલુ રાખો.
જાહેર Wi-Fi પર બેંકિંગ વ્યવહાર કરવાનું ટાળો.
છેતરપિંડી થાય તો શું કરવું?
જો તમે કમનસીબે કોઈ સ્કેમનો શિકાર બની જાવ, તો જરાય વિલંબ કર્યા વગર નીચે મુજબના પગલાં ભરો:
તરત જ નેશનલ સાયબર ક્રાઈમ હેલ્પલાઈન નંબર 1930 પર કોલ કરો.
વેબસાઈટ cybercrime.gov.in પર જઈને તમારી ફરિયાદ નોંધાવો.
તમારી બેંક શાખાનો સંપર્ક કરીને તમારા એકાઉન્ટ અને કાર્ડને બ્લોક કરાવો.
