Banking Tips: શું તમે ક્રેડિટ કાર્ડના વ્યાજ અને EMI થી પરેશાન છો? આ રીતે દેવાના માયજાળમાંથી મેળવો મુક્તિ
આજના સમયમાં ક્રેડિટ કાર્ડ આપણી જીવનશૈલીનો એક મહત્વનો ભાગ બની ગયા છે. તે આપણી નાણાકીય જરૂરિયાતોને સંતુલિત કરવામાં મદદ કરે છે, પરંતુ જો તેનો સમજદારીપૂર્વક ઉપયોગ કરવામાં ન આવે, તો તે ગંભીર આર્થિક મુશ્કેલીઓ ઊભી કરી શકે છે. ક્રેડિટ કાર્ડ એક એવું માયજાળ છે જેમાં એકવાર ફસાયા પછી વ્યક્તિ વ્યાજ અને EMIના ચક્રવ્યૂહમાં ફસાતી જાય છે. જો તમે પણ એક કરતા વધુ ક્રેડિટ કાર્ડ વાપરો છો અને તેના ભારે વ્યાજથી પરેશાન છો, તો આ લેખ તમારા માટે છે.
ક્રેડિટ કાર્ડ પર વ્યાજ દર વાર્ષિક 36% થી 48% સુધી હોઈ શકે છે, જે કોઈપણ અન્ય લોન કરતા ઘણો વધારે છે. જો તમે માત્ર ‘મિનિમમ ડ્યુ’ ભરી રહ્યા છો, તો તમે ક્યારેય આ દેવામાંથી બહાર આવી શકશો નહીં. આવી સ્થિતિમાં ‘પર્સનલ લોન’ તમારા માટે દેવદૂત સાબિત થઈ શકે છે.
પર્સનલ લોન કેવી રીતે મદદ કરશે?
પર્સનલ લોનનો વ્યાજ દર સામાન્ય રીતે 10% થી 18% ની વચ્ચે હોય છે, જે ક્રેડિટ કાર્ડના વ્યાજ કરતા ઘણો ઓછો છે. તમે એક મોટી રકમની પર્સનલ લોન લઈને તમારા તમામ ક્રેડિટ કાર્ડના બાકી લેણાં એકસાથે ચૂકવી શકો છો. આ પ્રક્રિયાને ‘Debt Consolidation’ કહેવામાં આવે છે. આનાથી તમારે અલગ-અલગ તારીખે અલગ-અલગ કાર્ડના બિલ ભરવાની માથાકૂટ રહેશે નહીં અને વ્યાજમાં પણ મોટી બચત થશે.
આ રીતે કરો સ્ટેપ-બાય-સ્ટેપ પ્લાનિંગ
1. કુલ દેવાની ગણતરી કરો: સૌ પ્રથમ, તમારા બધા ક્રેડિટ કાર્ડ્સ પર કેટલી રકમ બાકી છે તેની યાદી બનાવો. તેમાં બાકી EMI, વ્યાજ અને લેટ ફી બધું જ ઉમેરી દો. આ ચોક્કસ રકમ માટે જ પર્સનલ લોન માટે અરજી કરો.
2. વ્યાજ દરની સરખામણી: લોન લેતા પહેલા વિવિધ બેંકોના પર્સનલ લોન ઓફર્સ તપાસો. વ્યાજ દરની સાથે પ્રોસેસિંગ ફી અને પ્રી-પેમેન્ટ ચાર્જિસ (લોન વહેલી બંધ કરવાના ચાર્જ) પણ ખાસ જુઓ.
3. યોગ્ય સમયગાળો (Tenure) પસંદ કરો: લોન ચૂકવવા માટે બહુ લાંબો સમય ન પસંદ કરો. સામાન્ય રીતે 3 થી 5 વર્ષનો સમયગાળો પૂરતો છે. લાંબો સમયગાળો લેવાથી તમારો માસિક હપ્તો (EMI) નાનો થશે, પરંતુ તમે વ્યાજ પેટે વધુ રકમ ચૂકવશો.
4. તાત્કાલિક બાકી લેણાં ચૂકવો: લોન મળતાની સાથે જ સૌથી પહેલા તમામ ક્રેડિટ કાર્ડના બિલો પૂરેપૂરા ભરી દો. કોઈપણ કાર્ડમાં બાકી રકમ ન રાખો અને શક્ય હોય તો કાર્ડની EMI સર્વિસ પણ ક્લોઝ કરી દો.
5. કાર્ડ લોક કરો અને આદત બદલો: બધા બિલો ચૂકવ્યા પછી, વધારાના ક્રેડિટ કાર્ડ્સ બંધ કરી દો અથવા લોક કરી દો. તમારો ક્રેડિટ સ્કોર જાળવી રાખવા માટે માત્ર એક જ કાર્ડ ચાલુ રાખો અને તેનો ઉપયોગ પણ અત્યંત જરૂરિયાત હોય ત્યારે જ કરો.
સાવચેતી
યાદ રાખો કે પર્સનલ લોન એ દેવું ચૂકવવાનું સાધન છે, નવો ખર્ચ કરવાનું બહાનું નહીં. લોન લીધા પછી ફરીથી ક્રેડિટ કાર્ડ પર બિનજરૂરી ખરીદી કરવી તમને ફરીથી એ જ મુશ્કેલીમાં મૂકી શકે છે.
