કોમર્શિયલ ગેસ સિલિન્ડર ૩,૦૦૦ ને પાર, શું હોટલ-રેસ્ટોરન્ટમાં જમવું મોંઘું થશે?
આજે ૧ મે ના રોજ જારી કરાયેલા દરો મુજબ, સામાન્ય જનતા અને વ્યવસાયિક એકમો માટે મિશ્ર સમાચાર સામે આવ્યા છે:
ઘરગથ્થુ અને કોમર્શિયલ સિલિન્ડરના લેટેસ્ટ રેટ
૧૪.૨ કિલો (ઘરગથ્થુ): રાહતના સમાચાર એ છે કે ઘરેલું ગેસ સિલિન્ડરની કિંમતમાં કોઈ ફેરફાર કરવામાં આવ્યો નથી. દિલ્હી, મુંબઈ અને ગુજરાત સહિતના મુખ્ય શહેરોમાં તેના ભાવ સ્થિર રહ્યા છે.
૧૯ કિલો (કોમર્શિયલ): વેપારીઓ અને હોટલ ઉદ્યોગ માટે મોટો ઝટકો લાગ્યો છે. કોમર્શિયલ એલપીજી સિલિન્ડરની કિંમતમાં ૯૯૩ રૂપિયા નો જંગી વધારો કરવામાં આવ્યો છે. આ વધારા બાદ દિલ્હીમાં ૧૯ કિલોના સિલિન્ડરની કિંમત ૩,૦૭૧.૫૦ રૂપિયા સુધી પહોંચી ગઈ છે.
ભારતની આયાત નિર્ભરતા અને વૈશ્વિક સંકટ
ભારત તેની એલપીજીની જરૂરિયાતનો લગભગ ૬૦ ટકા હિસ્સો આયાત કરે છે. પશ્ચિમ એશિયામાં વધતા તણાવને કારણે સપ્લાય ચેઈન ખોરવાઈ છે:
હોર્મુઝ સ્ટ્રેટનું મહત્વ: ભારતનો ૩૦ ટકા ગેસ અને ૮૫-૯૦ ટકા એલપીજી સાઉદી અરેબિયા અને યુએઈ જેવા દેશોમાંથી આ વ્યૂહાત્મક દરિયાઈ માર્ગે આવે છે. અહીં નાકેબંધી થવાથી તેલ માર્કેટિંગ કંપનીઓ (OMCs) પર ભારે દબાણ છે.
રશિયા પાસેથી મદદ: કાચા તેલની અછતને પહોંચી વળવા માટે ભારતે રશિયા પાસેથી આયાત વધારીને સ્થિતિને કાબૂમાં લેવાનો પ્રયાસ કર્યો છે.
સપ્લાયમાં કાપ: વધતી કિંમતો અને મર્યાદિત પુરવઠાને કારણે ઔદ્યોગિક વપરાશકારો માટે ગેસ સપ્લાયમાં કાપ મૂકવામાં આવ્યો છે, જેની અસર હોટલો અને રેસ્ટોરન્ટ્સની કિંમતો પર પણ પડી શકે છે.
