Mercedes-Benz
Mercedes-Benz: ભારતમાં મર્સિડીઝ-બેન્ઝના વેચાણમાં સારો વધારો નોંધાયો છે. ગયા નાણાકીય વર્ષ 2024-25માં મર્સિડીઝ-બેન્ઝના વેચાણમાં 4.44 ટકાનો વધારો નોંધાયો છે. જર્મન લક્ઝરી કાર ઉત્પાદક કંપનીએ ગયા નાણાકીય વર્ષમાં કુલ ૧૮,૯૨૮ વાહનો વેચ્યા હતા. ગુરુવારે આ માહિતી આપતાં કંપનીએ જણાવ્યું હતું કે વેચાયેલી દરેક 4 કારમાંથી એક કાર 1.5 કરોડ રૂપિયાથી વધુની હતી. જોકે, આ વર્ષે જાન્યુઆરી-માર્ચ ક્વાર્ટરમાં મર્સિડીઝ-બેન્ઝ ઇન્ડિયાના વેચાણમાં ૧૧.૮ ટકાનો મોટો ઘટાડો જોવા મળ્યો હતો.
ગયા નાણાકીય વર્ષના ચોથા ક્વાર્ટરમાં, કંપનીએ કુલ 4775 વાહનો વેચ્યા હતા. જ્યારે ગયા વર્ષે આ જ સમયગાળા દરમિયાન કંપનીએ કુલ ૫૪૧૨ વાહનોનું વેચાણ કર્યું હતું. મર્સિડીઝ-બેન્ઝ ઇન્ડિયાના મેનેજિંગ ડિરેક્ટર અને સીઈઓ સંતોષ ઐયરે જણાવ્યું હતું કે કંપનીને અપેક્ષા છે કે રિઝર્વ બેંક ઓફ ઇન્ડિયા (RBI) દ્વારા રેપો રેટમાં ઘટાડો માંગને વધારવામાં મદદ કરશે. કંપનીના ફ્રેન્ચાઇઝ ભાગીદારો આગામી ત્રણ વર્ષમાં ઉભરતા અને હાલના મેટ્રો શહેરોમાં બ્રાન્ડની હાજરીને વિસ્તૃત કરવા માટે રૂ. 450 કરોડનું રોકાણ કરી રહ્યા છે.
સંતોષ ઐયરે કહ્યું, “છેલ્લા નાણાકીય વર્ષમાં અમારો વિકાસ અત્યાર સુધીનો શ્રેષ્ઠ રહ્યો છે. આ વૃદ્ધિ મોંઘી કારમાં 34 ટકાના મજબૂત વિકાસને કારણે થઈ છે, અને ઇલેક્ટ્રિક કારમાં પણ 50 ટકાથી વધુનો વિકાસ જોવા મળ્યો છે.” તમને જણાવી દઈએ કે મર્સિડીઝ-બેન્ઝ ઈન્ડિયાએ અગાઉ નાણાકીય વર્ષ 2023-24માં 18,123 વાહનોના વેચાણ સાથે તેનું શ્રેષ્ઠ વેચાણ રેકોર્ડ કર્યું હતું. નાણાકીય વર્ષ 2024-25 અને 2025 ના પ્રથમ ક્વાર્ટરમાં મર્સિડીઝ-બેન્ઝ ઇન્ડિયા દ્વારા વેચાયેલી 4 માંથી 1 કાર S-ક્લાસ, મર્સિડીઝ-મેબેક અને AMG G 63 જેવા ‘ટોપ-એન્ડ લક્ઝરી’ વાહનો હતા, જેની કિંમત 1.5 કરોડ રૂપિયાથી શરૂ થાય છે અને 4 કરોડ રૂપિયા સુધી જાય છે.
