Trump Tariff
Trump Tariff: અમેરિકાના રાષ્ટ્રપતિ ડોનાલ્ડ ટ્રમ્પે ટેરિફ યુદ્ધ વચ્ચે ચીનના રાષ્ટ્રપતિ શી જિનપિંગની પ્રશંસા કરી છે અને તેમને ‘ખૂબ જ સ્માર્ટ મેન’ ગણાવ્યા છે. ટ્રમ્પે ચીન પર ટેરિફ વધારીને ૧૨૫ ટકા કર્યો છે, જ્યારે વિશ્વના તમામ દેશોને ૯૦ દિવસ માટે ટેરિફમાંથી રાહત આપી છે. આ પહેલા ચીને પણ અમેરિકન આયાત પર ૮૪ ટકા ટેરિફની જાહેરાત કરીને બદલો લીધો હતો.
ટેરિફને લઈને બંને દેશો વચ્ચે વધી રહેલા તણાવને ધ્યાનમાં રાખીને, ટ્રમ્પે કહ્યું છે કે તેઓ શી જિનપિંગ સાથે વાતચીત માટે તૈયાર છે. બુધવારે વ્હાઇટ હાઉસ ખાતે પત્રકારો સાથે વાત કરતા ટ્રમ્પે જિનપિંગની પ્રશંસા કરી. તેમણે કહ્યું કે બંને દેશો વચ્ચે વાતચીત માટે હજુ પણ અવકાશ છે. નોંધનીય છે કે ટ્રમ્પે રાષ્ટ્રપતિ તરીકેનો બીજો કાર્યકાળ સંભાળ્યો ત્યારથી, તેમણે ચીનના રાષ્ટ્રપતિ સાથે વાત કરી નથી. છેલ્લા 20 વર્ષમાં આ પહેલી વાર છે જ્યારે કોઈ રાષ્ટ્રપતિએ તેમના ચીની સમકક્ષ સાથે વાત કરી નથી.
આ વાતચીત દરમિયાન ટ્રમ્પે શી જિનપિંગને વિશ્વના સૌથી હોશિયાર લોકોમાંના એક ગણાવ્યા. તેમણે કહ્યું, “તે (જિનપિંગ) એક એવો માણસ છે જે જાણે છે કે શું કરવું. તે પોતાના દેશને પ્રેમ કરે છે.” ટ્રમ્પે એ પણ સ્વીકાર્યું કે અમેરિકાને હાલમાં ચીન તરફથી કોઈ ફાયદો મળી રહ્યો નથી. તેમણે એમ પણ કહ્યું કે તેઓ શી જિનપિંગ સાથે વાત કરવા વિશે વિચારશે. તેમણે આશા વ્યક્ત કરી કે ચીન પર ટેરિફમાં વધુ વધારો થશે નહીં, પરંતુ ડ્રેગન પર સતત દબાણ જાળવવાની વાત પણ કરી. આ દરમિયાન, પોતાના મુદ્દાને પુનરાવર્તિત કરતા ટ્રમ્પે કહ્યું કે છેલ્લા ઘણા વર્ષોથી અમેરિકા સાથે ખરાબ વર્તન કરવામાં આવી રહ્યું છે અને અગાઉના બિડેન વહીવટીતંત્રે આવું થવા દીધું.
