Gautam Adani
મુંબઈના લોકોને જૂન 2025 માં બીજા એરપોર્ટની ભેટ મળવા જઈ રહી છે. નવી મુંબઈ આંતરરાષ્ટ્રીય એરપોર્ટનું ઉદ્ઘાટન જૂનમાં થશે. અદાણી ગ્રુપના ચેરમેન ગૌતમ અદાણીએ આ જાહેરાત કરી છે. તેમણે કહ્યું કે, નવી મુંબઈ આંતરરાષ્ટ્રીય એરપોર્ટનું ઉદ્ઘાટન જૂનમાં થશે અને તે કનેક્ટિવિટી અને વૃદ્ધિને ફરીથી વ્યાખ્યાયિત કરશે.
દેશના બીજા ક્રમના સૌથી ધનિક ઉદ્યોગપતિ ગૌતમ અદાણીએ નવી મુંબઈ ઇન્ટરનેશનલ એરપોર્ટ લિમિટેડ (NMIAL) સાઇટની મુલાકાત લીધી અને પ્રોજેક્ટ સાથે સંકળાયેલી ટીમોને મળ્યા. તેમણે પોતાના સોશિયલ મીડિયા પ્લેટફોર્મ પર એક ટૂંકી વિડીયો ફિલ્મ પણ શેર કરતા કહ્યું કે આવનારું એરપોર્ટ ભારત માટે એક સાચી ભેટ છે. ગૌતમ અદાણીએ પોસ્ટમાં લખ્યું છે કે આજે તેમણે નવી મુંબઈ ઇન્ટરનેશનલ એરપોર્ટ લિમિટેડની સાઇટની મુલાકાત લીધી અને અહીં એક નવું વિશ્વ કક્ષાનું એરપોર્ટ આકાર લઈ રહ્યું છે.
અદાણી ગ્રુપના અધ્યક્ષે જણાવ્યું હતું કે, “નવું એરપોર્ટ જૂનમાં ઉદ્ઘાટન થવાનું છે અને તે કનેક્ટિવિટી અને વૃદ્ધિને ફરીથી વ્યાખ્યાયિત કરશે. તે ભારતને સાચી ભેટ છે.” તેમણે કહ્યું, “આ વિઝનને વાસ્તવિકતા બનાવવા બદલ અદાણી એરપોર્ટ્સ ટીમ અને ભાગીદારોને અભિનંદન.” ગયા વર્ષે ડિસેમ્બરમાં NMIAL ખાતે ઇન્ડિગો એરલાઇન્સ A320 એરક્રાફ્ટના લેન્ડિંગ સાથે પ્રથમ વાણિજ્યિક માન્યતા ફ્લાઇટ સફળતાપૂર્વક પૂર્ણ થઈ હતી, જેનાથી ગ્રીનફિલ્ડ એરપોર્ટના વહેલા સંચાલનનો માર્ગ મોકળો થયો હતો.
રનવે 08/26 પર ફ્લાઇટ ટેસ્ટનું નિરીક્ષણ ડિરેક્ટોરેટ જનરલ ઓફ સિવિલ એવિએશન (DGCA), એરપોર્ટ્સ ઓથોરિટી ઓફ ઇન્ડિયા (AAI), કસ્ટમ્સ, ઇમિગ્રેશન, સેન્ટ્રલ ઇન્ડસ્ટ્રિયલ સિક્યુરિટી ફોર્સ (CISF), મહારાષ્ટ્ર સિટી એન્ડ ઇન્ડસ્ટ્રિયલ ડેવલપમેન્ટ કોર્પોરેશન લિમિટેડ (CIDCO), ઇન્ડિયા મિટિરોલોજીકલ ડિપાર્ટમેન્ટ (IMD), બ્યુરો ઓફ સિવિલ એવિએશન સિક્યુરિટી (BCAS) તેમજ અદાણી એરપોર્ટ હોલ્ડિંગ્સ લિમિટેડ (AAHL) અને અન્ય મુખ્ય હિસ્સેદારો દ્વારા કરવામાં આવ્યું હતું.
