પેન્શનરો અને કર્મચારીઓ માટે સમાનતાની માંગ, જાણો BPS અને AIDEF ની મુખ્ય રજૂઆતો
કેન્દ્ર સરકાર દ્વારા 8મા પગાર પંચ (8th Pay Commission) ની રચનાની પ્રક્રિયા શરૂ થતાંની સાથે જ કર્મચારીઓની સાથે સાથે પેન્શનરોની માંગણીઓ પણ તેજ બની ગઈ છે. ‘ભારત પેન્શનર્સ સમાજ’ (BPS) અને ‘ઓલ ઈન્ડિયા ડિફેન્સ એમ્પ્લોઈઝ ફેડરેશન’ (AIDEF) જેવા મુખ્ય સંગઠનોએ સરકાર સમક્ષ પંચના ટર્મ્સ ઓફ રેફરન્સ (ToR) માં ફેરફાર કરવાની વિધિવત માંગ કરી છે. આ સંગઠનોની મુખ્ય માંગ એ છે કે 1 જાન્યુઆરી 2026 પહેલાં નિવૃત્ત થયેલા કર્મચારીઓની પેન્શન અને ફેમિલી પેન્શનમાં સુધારાને 8મા પગાર પંચના કાર્યક્ષેત્રમાં સ્પષ્ટપણે સામેલ કરવામાં આવે. આ ઉપરાંત, પેન્શનની સમાનતા અને પંચના દસ્તાવેજોમાં વપરાયેલા કેટલાક શબ્દો સામે પણ સંગઠનોએ વિરોધ નોંધાવ્યો છે.
જૂના પેન્શનરોના સુધારા અને સમાનતા અંગેની મુખ્ય માંગણીઓ
BPS અને AIDEF નું કહેવું છે કે 8મા પગાર પંચના હાલના ToR માં 1 જાન્યુઆરી 2026 પહેલાં નિવૃત્ત થયેલા કર્મચારીઓ અને તેમના પરિવારજનો માટે પેન્શન સુધારણાનો સ્પષ્ટ ઉલ્લેખ નથી.
પેન્શન સમાનતા: જૂના અને નવા નિવૃત્ત થયેલા કર્મચારીઓ વચ્ચે પેન્શનમાં કોઈ વિસંગતતા ન રહે તે માટે યોગ્ય સમાનતા લાવવાની માંગ કરવામાં આવી છે.
તમામ યોજનાઓનો સમાવેશ: ઓલ્ડ પેન્શન સ્કીમ (OPS), નેશનલ પેન્શન સિસ્ટમ (NPS) અને યુનિફાઈડ પેન્શન સ્કીમ (UPS) હેઠળ આવતા તમામ પેન્શનરો તેમજ ફેમિલી પેન્શન ધારકોને આ પંચના દાયરામાં સ્પષ્ટ રીતે આવરી લેવા વિનંતી કરાઈ છે.
‘Unfunded Cost’ શબ્દપ્રયોગ સામે સંગઠનોનો સખત વાંધો
8મા પગાર પંચના ToR માં પેન્શન યોજનાઓને “unfunded cost of non-contributory pension schemes” તરીકે દર્શાવવામાં આવી છે, જેની સામે સંગઠનોએ ભારે આક્રોશ વ્યક્ત કર્યો છે.
AIDEF નો તર્ક: જૂની પેન્શન યોજના હેઠળ મળતું પેન્શન એ કર્મચારીઓની ભૂતકાળની લાંબી સેવાઓનું ફળ અને સરકારની કાનૂની જવાબદારી છે. તેને માત્ર ફંડ વગરની દેવાદારી કે આર્થિક બોજ તરીકે ન જોઈ શકાય.
BPS ની રજૂઆત: ‘અનફંડેડ કોસ્ટ’ જેવા શબ્દોથી વરિષ્ઠ નાગરિકો અને પેન્શનરોમાં ચિંતા અને અસુરક્ષાની ભય લાગણી જન્મે છે. પેન્શન એ માત્ર નાણાકીય બોજ નથી, પરંતુ વૃદ્ધોની સામાજિક-આર્થિક સુરક્ષા અને સ્વાભિમાન સાથે જોડાયેલી બાબત છે. તેથી ToR માંથી આ શબ્દાવલી બદલવી જરૂરી છે.
1 જાન્યુઆરી 2026 ની અમલીકરણ તારીખ અંગે સ્પષ્ટતાની માંગ
ભારત પેન્શનર્સ સમાજે સરકાર સમક્ષ માંગ કરી છે કે 1 જાન્યુઆરી 2026 ને 8મા પગાર પંચની ભલામણો લાગુ કરવાની સત્તાવાર તારીખ તરીકે જાહેર કરવામાં આવે. પગાર, ભથ્થાં, પેન્શન અને ફેમિલી પેન્શનમાં થનારા તમામ ફેરફારો આ જ તારીખથી અમલી બને તેવી સ્થિતિ સ્પષ્ટ કરવા વિનંતી કરાઈ છે.
સેવા રત કર્મચારીઓ અને પેન્શનરોને એકસાથે લાભ આપવાની રજૂઆત
BPS ની વધુ એક મહત્વની માંગ એ છે કે પેન્શન અને ફેમિલી પેન્શન સંબંધિત ભલામણોને ચાલુ નોકરી કરતા કર્મચારીઓની ભલામણોની સાથે જ લાગુ કરવામાં આવે. આ સિવાય કેન્દ્ર સરકારની સ્વાયત્ત અને વૈધાનિક સંસ્થાઓ (Autonomous and Statutory Bodies) ના કર્મચારીઓ અને પેન્શનરોને પણ કોઈ પણ ભેદભાવ વગર આ જ સમયે તમામ લાભો આપવાની અપીલ કરવામાં આવી છે.
હાલની પરિસ્થિતિ અને આગળનો માર્ગ
અહીં એ નોંધવું જરૂરી છે કે આ તમામ વિગતો BPS અને AIDEF દ્વારા સરકાર સમક્ષ મૂકવામાં આવેલી મુખ્ય માંગણીઓ છે. સરકારે હજુ સુધી આ માંગણીઓ પર કોઈ આખરી સ્વીકૃતિ આપી નથી. તેથી 1 જાન્યુઆરી 2026 પહેલાં નિવૃત્ત થયેલા તમામ પેન્શનરોના પેન્શનમાં ચોક્કસ વધારો થશે કે કેમ, તેનો આખરી નિર્ણય સરકાર અને 8મા પગાર પંચના વલણ બાદ જ સ્પષ્ટ થશે.
