Zomato: શું ઝોમેટોનું નામ બદલાશે? ‘ઇટર્નલ લિમિટેડ’ બનવાથી વપરાશકર્તાઓ પર કેવી અસર પડશે?

જાણીતી ઓનલાઈન ફૂડ અને કરિયાણાની ડિલિવરી કરતી કંપની ઝોમેટોએ ગુરુવારે જણાવ્યું હતું કે તેને 20 માર્ચથી તેનું નામ બદલીને ‘ઇટર્નલ લિમિટેડ’ કરવા માટે કોર્પોરેટ બાબતોના મંત્રાલય તરફથી મંજૂરી મળી ગઈ છે. અગાઉ, ઝોમેટોના શેરધારકોએ આ મહિનાની શરૂઆતમાં પેઢીનું નામ બદલીને ‘ઇટર્નલ’ કરવા માટે એક ખાસ ઠરાવને પણ મંજૂરી આપી હતી, એમ પીટીઆઈના અહેવાલમાં જણાવાયું છે. જોકે, કંપનીના ઓનલાઈન ફૂડ ડિલિવરી બિઝનેસ ઝોમેટોના બ્રાન્ડ નામમાં કોઈ ફેરફાર કરવામાં આવ્યો નથી. એટલું જ નહીં, એપને પણ એવી જ રાખવામાં આવી છે.

ઇટરનલમાં ચાર મુખ્ય વ્યવસાયો (હાલ મુજબ) હશે – ઝોમેટો, બ્લિંકિટ, ડિસ્ટ્રિક્ટ અને હાઇપરપ્યુર. “અમે તમને જણાવવા માંગીએ છીએ કે કોર્પોરેટ બાબતોના મંત્રાલયના રજિસ્ટ્રાર ઓફ કંપનીઝે 20 માર્ચ, 2025 થી કંપનીનું નામ ‘ઝોમેટો લિમિટેડ’ થી ‘ઇટર્નલ લિમિટેડ’ કરવાને મંજૂરી આપી છે,” ઝોમેટોએ એક નિયમનકારી ફાઇલિંગમાં જણાવ્યું હતું.

ગયા મહિને, ઝોમેટોના સ્થાપક અને સીઈઓ દીપિન્દર ગોયલે કહ્યું હતું કે અમારા બોર્ડે આ ફેરફારને મંજૂરી આપી દીધી છે અને હું અમારા શેરધારકોને પણ આ ફેરફારને સમર્થન આપવા વિનંતી કરું છું. જો અને જ્યારે તે મંજૂર થશે, તો અમારી કોર્પોરેટ વેબસાઇટ zomato.com થી eternal.com માં બદલાઈ જશે. અમે અમારા સ્ટોક ટીકરમાં પણ ફેરફાર કરીશું.

ગોયલે તે સમયે એમ પણ કહ્યું હતું કે કંપનીનો જાહેરમાં આવવાનો અને તેનું નામ બદલવાનો નિર્ણય બ્લિંકિટના ભવિષ્ય માટે મુખ્ય ચાલક તરીકે જોતા હતા તેના અનુરૂપ હતો. જ્યારે અમે બ્લિંકિટ હસ્તગત કરી, ત્યારે અમે કંપની અને બ્રાન્ડ/એપ વચ્ચે તફાવત કરવા માટે આંતરિક રીતે Eternal (ઝોમેટોને બદલે) નો ઉપયોગ કરવાનું શરૂ કર્યું. અમે એવું પણ વિચાર્યું હતું કે જે દિવસે ઝોમેટોથી આગળ કંઈક આપણા ભવિષ્યનું મહત્વનું ચાલક બનશે, તે દિવસે અમે કંપનીનું જાહેરમાં નામ બદલીને ઇટર્નલ રાખીશું. આજે, બ્લિંકિટ સાથે, મને લાગે છે કે આપણે ત્યાં પહોંચી ગયા છીએ.