Adani Group : ટૂંકા વેચાણ અને નિયમનકારો દ્વારા સઘન ચકાસણી વચ્ચે, અદાણી ગ્રૂપની કંપનીઓના શેરધારકોની પેટર્નમાં નોંધપાત્ર ફેરફાર થયો છે. વિદેશી પોર્ટફોલિયો રોકાણકારો (FPIs)ને બદલે સ્પષ્ટ રીતે ઓળખાયેલા રોકાણકારો અને બ્રોડ-બેઝ્ડ ફંડ્સની હાજરી વધી છે. સ્ટોક એક્સચેન્જ દ્વારા જાહેરમાં જાહેર કરવામાં આવેલા શેરહોલ્ડિંગ ડેટાના વિશ્લેષણમાંથી આ માહિતી મેળવવામાં આવી છે. ગ્રુપ કંપનીઓમાં ઓછામાં ઓછો 1 ટકાનો સીધો હિસ્સો ધરાવતા મુખ્ય શેરધારકોમાં લાઈફ ઈન્સ્યોરન્સ કોર્પોરેશન ઓફ ઈન્ડિયા (LIC), યુએસ રોકાણકાર GQG પાર્ટનર્સ, અબુ ધાબી ઈન્ટરનેશનલ હોલ્ડિંગ કંપની અને કતાર ઈન્વેસ્ટમેન્ટ ઓથોરિટીના INQ હોલ્ડિંગનો સમાવેશ થાય છે.
સ્થાનિક મ્યુચ્યુઅલ ફંડોએ પણ અદાણી ગ્રૂપના શેરમાં રોકાણ કરવાનું શરૂ કર્યું છે. તેનું એક કારણ નિફ્ટી 50 અને નિફ્ટી નેક્સ્ટ 50 જેવા લોકપ્રિય સૂચકાંકોમાં જૂથના કેટલાક શેરોનો સમાવેશ છે. એક વિશ્લેષકે જણાવ્યું હતું કે, ‘FPIs એ માર્ચ 2024 ક્વાર્ટર દરમિયાન અદાણી ગ્રૂપની 10 લિસ્ટેડ કંપનીઓમાંથી સાતમાં તેમનો હિસ્સો વધાર્યો છે. રિટેલ અને સ્થાનિક રોકાણકારોએ પણ મોટાભાગની કંપનીઓમાં આવું જ કર્યું છે. એક કે બે જુના રોકાણોને બાદ કરતાં અદાણી ગ્રૂપની કંપનીઓના વર્તમાન માળખા પર આંગળી ચિંધવાની કોઈ અવકાશ નથી. ગ્રૂપની ઓપરેટિંગ કામગીરીમાં સુધારો, દેવાના બોજમાં ઘટાડો અને વધુ સારા મૂલ્યાંકનથી રોકાણકારોમાં તેને વધુ સારી રીતે સ્વીકારવામાં આવશે.
થોડા વર્ષો પહેલાની સ્થિતિ પર નજર કરીએ તો ચિત્ર અલગ જ દેખાશે. અદાણી ગ્રુપની મોટાભાગની કંપનીઓના મોટા શેરધારકો મોરેશિયસના હતા. નિયમનકારે તેમની અંતિમ લાભદાયી માલિકી (UBO) ને ઓળખવા માટે પણ સખત મહેનત કરવી પડી રહી છે. કેટલાક ફંડો, જે હાલમાં માર્કેટ રેગ્યુલેટર સેબીના સ્કેનર હેઠળ છે, અદાણી જૂથની કંપનીઓમાં મોટો હિસ્સો ધરાવે છે.
અદાણી ગ્રૂપે હંમેશા આમાંના કોઈપણ ફંડ્સ સાથે કોઈપણ ગેરરીતિ અથવા કોઈપણ જોડાણનો ઇનકાર કર્યો છે. માર્કેટ રેગ્યુલેટર સેબીએ જે રોકાણકારોને રોકાણના નિયમોના કથિત ઉલ્લંઘન માટે કારણ બતાવો નોટિસ જારી કરી છે તેમાં અલબુલા ઈન્વેસ્ટમેન્ટ ફંડ, ક્રેસ્ટા ફંડ, APMS ઈન્વેસ્ટમેન્ટ ફંડ, ઈલારા ઈન્ડિયા ઓપોર્ચ્યુનિટીઝ ફંડ, વેસ્પેરા ફંડ અને એલટીએસ ઈન્વેસ્ટમેન્ટ ફંડનો સમાવેશ થાય છે.
