સ્માર્ટફોન અફવાઓ: જાણો શું સાચું છે અને શું ખોટું

સ્માર્ટફોન વિશેની ખોટી માન્યતાઓનો પર્દાફાશ

સોશિયલ મીડિયા અને રોજિંદા જીવનમાં સ્માર્ટફોન અને અન્ય ગેજેટ્સ વિશે ઘણી અફવાઓ છે. ઘણા લોકો માને છે કે એરપ્લેન મોડમાં ફોન ઝડપથી ચાર્જ થાય છે અથવા ક્ષતિગ્રસ્ત બેટરીને ફ્રીઝરમાં રાખવાથી તે ઠીક થઈ જાય છે. ચાલો જાણીએ આ અફવાઓ પાછળનું સત્ય.

શું એરપ્લેન મોડમાં ફોન ઝડપથી ચાર્જ થાય છે?

આ સાચું નથી. એરપ્લેન મોડ ફોનને સિગ્નલ શોધવાથી રોકે છે, પરંતુ તેની ચાર્જિંગ સ્પીડ પર બહુ અસર થતી નથી. ફોનને ઝડપી અને સુરક્ષિત રીતે ચાર્જ કરવા માટે સુસંગત ચાર્જર અને કેબલ જરૂરી છે. ફોન બંધ થવા પર બેકગ્રાઉન્ડ પ્રક્રિયાઓ બંધ થઈ જાય છે, જેના કારણે ઝડપી ચાર્જિંગ થઈ શકે છે.

શું બેકગ્રાઉન્ડ એપ્સ બંધ કરવાથી બેટરી બચે છે?

આ સંપૂર્ણપણે ખોટું છે. વારંવાર બેકગ્રાઉન્ડ એપ્સ બંધ કરવાથી અને ખોલવાથી વધુ બેટરી વપરાય છે. આમ કરવાથી, એપ RAM માં ફરીથી લોડ થાય છે, જે વધારાની બેટરી વાપરે છે.

શું ભીના ફોનને ચોખામાં રાખવાથી તે ઠીક થાય છે?

ઘણા લોકો માને છે કે ભીના સ્માર્ટફોનને ચોખામાં રાખવાથી ભેજ દૂર થાય છે. હકીકતમાં, ચોખા ફક્ત સપાટીની ભેજ શોષી લે છે અને ચાર્જિંગ પોર્ટ અથવા ચાર્જરને નુકસાન પહોંચાડી શકે છે.

શું ક્ષતિગ્રસ્ત બેટરીને ફ્રીઝરમાં ઠીક કરી શકાય છે?

આ સંપૂર્ણપણે અફવા છે. મોટાભાગના સ્માર્ટફોન લિથિયમ-આયન બેટરી સાથે આવે છે, જે અતિશય ઠંડી કે ગરમી માટે બનાવવામાં આવતી નથી. તેને ફ્રીઝરમાં રાખવાથી બેટરીની રાસાયણિક પ્રતિક્રિયાઓ ધીમી પડી જાય છે અને તેનું જીવનકાળ ઓછું થાય છે.