હવામાન વિભાગની આગાહી પ્રમાણે દક્ષિણ-મધ્ય ગુજરાત અને સૌરાષ્ટ્રમાં છેલ્લા કેટલાય દિવસોથી ધોધમાર વરસાદ પડી રહ્યો છે અને શનિવારે પણ યથાવત રહ્યો. રવિવારથી ૩ દિવસ રાજ્યના વિવિધ ભાગોમાં ક્યાંક ભારેથી અતિભારે તો ક્યાંક ભારે વરસાદ પડવાની હવામાન વિભાગ દ્વારા આગાહી કરવામાં આવી છે. આગાહી પ્રમાણે અમદાવાદમાં પણ બે દિવસ ભારેથી અતિભારે વરસાદ પડી શકે છે.
હાલ સૌરાષ્ટ્ર, દક્ષિણ ગુજરાતમાં વરસાદી માહોલ છે. સુરતમાં ભારે વરસાદ બાદ જળબંબાકારની સ્થિતિ છે. નવસારીમાં વરસાદથી જનજીવન પ્રભાવિત થયું છે આ દરમિયાન એક વિડીયો સામે આવ્યો છે. જેમાં એક ગેસ એજન્સીના સિલિન્ડર પાણીમાં રીતસર તણાઈને જઈ રહ્યા છે. આ ઉપરાંત જુનાગઢમાં પણ મેઘતાંડવ જાેવા મળી રહ્યું છે. પૂરના પાણીમાં અનેક કારો તણાઈ ગઈ હોવાના અહેવાલ મળ્યા છે. ભાવનગરમાં પણ ધોધમાર વરસાદ નોંધાયો છે.
હવામાન વિભાગ દ્વારા જે વિસ્તારોમા રેડ એલર્ટ જાહેર કરાયું હતું ત્યાં શનિવારે જાેરદાર વરસાદ તૂટી પડ્યો છે. આંકડા પર નજર કરીએ તો પ્રાપ્ત માહિતી અનુસાર મેઘરાજાએ સૌરાષ્ટ્રને ઘમરોળ્યું છે અને દક્ષિણ ગુજરાતમાં આફ ફાટ્યું હોય તેવી સ્થિતિ સર્જાઈ છે. નવસારીમાં બે કલાકમાં ૯ ઈંચ વરસાદ પડ્યો હોવાની માહિતી મળી છે. નવસારી જિલ્લામાં હાલ જ્યાં જુઓ ત્યા પાણી જ પાણી જાેવા મળી રહ્યું છે. સમગ્ર નવસારી શહેરમાં જાણે મેઘરાજાએ કહેર વરસાવ્યો હોય તેવા દ્રશ્યો સામે આવી રહ્યા છે. અનેક સોસાયટીની બહાર ઢીચણસમા પાણી ભરાઈ જતાં સ્થાનિકોએ ભારે હાલાકીનો સામનો કરવાનો વારો આવ્યો છે. આ ઉપરાંત જલાલપોરમાં ૭ ઈંચ વરસાદ નોંધાયો છે.
૨૩ જુલાઈઃ સુરત, નવસારી, વલસાડ, દમણ, દાદરા નગર હવેલી, જામનગર, દ્વારકા, કચ્છ, આણંદ, વડોદરા, નર્મદા, ભરૂચ, ડાંગ, તાપી, રાજકોટ, પોરબંદર, જુનાગઢ, અમરેલી અને ભાવનગરમાં વીજળીના કડાકા ભડાકા સાથે ભારેથી અતિભારે વરસાદ જ્યારે બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, છોટા ઉદેપુર, સુરેન્દ્રનગર, મોરબી અને બોટાદમાં ભારે વરસાદ પડવાની આગાહી છે. આ દરમિયાન ૩૦-૪૦ કિમી પ્રતિકલાકની ઝડપે પવન પણ ફૂંકાઈ શકે છે. અમદાવાદમાં પણ વાદળછાયા વાતાવરણ વચ્ચે વરસાદ પડવાની સંભાવના છે.
૨૪ જુલાઈઃ પોરબંદર, દ્વારકા, વલસાડ, દમણ, દાદરા નગર હવેલી, જુનાગઢ, કચ્છમાં ભારેથી અતિભારે વરસાદ જ્યારે આણંદ, વડોદરા, સુરત, નવસારી, અમરેલી, ભાવનગર, ગીર સોમનાથ અને દીવમાં ભારે વરસાદ પડશે. ૨૫ જુલાઈઃ પોરબંદર, દ્વારકામાં ભારેથી અતિભારે વરસાદ જ્યારે આણંદ, ભરૂચ, સુરત, જામનગર અને કચ્છમાં ભારે વરસાદ પડી શકે છે.
