Bank
નાણાકીય વર્ષ 2024-25 ના પ્રથમ નવ મહિનામાં 12 જાહેર ક્ષેત્રની બેંકોનો ચોખ્ખો નફો વાર્ષિક ધોરણે 31.3 ટકા વધીને રૂ. 1,29,426 કરોડ થયો છે. આ સમયગાળામાં અત્યાર સુધીનો સૌથી વધુ કુલ ચોખ્ખો નફો છે. નાણા મંત્રાલયે એક નિવેદનમાં જણાવ્યું હતું કે, સમીક્ષા હેઠળના સમયગાળા દરમિયાન જાહેર ક્ષેત્રની બેંકોએ કુલ રૂ. 2,20,243 કરોડનો કાર્યકારી નફો નોંધાવ્યો હતો. નિવેદન અનુસાર, આ બેંકોના ચોખ્ખા નફામાં વૃદ્ધિ અને સંપત્તિની ગુણવત્તા ઘણી સારી રહી છે. પૂરતું મૂડી બફર પણ છે.
મંત્રાલયે જણાવ્યું હતું કે 0.59 ટકાનો નોંધપાત્ર રીતે ઓછો ચોખ્ખો NPA ગુણોત્તર પણ સારી સંપત્તિ ગુણવત્તા દર્શાવે છે. જાહેર ક્ષેત્રની બેંકોએ વાર્ષિક ધોરણે ૧૧ ટકાનો એકંદર વ્યવસાય વૃદ્ધિ નોંધાવી છે, જેમાં કુલ થાપણ વૃદ્ધિ ૯.૮ ટકા રહી છે. સમીક્ષા હેઠળના સમયગાળા દરમિયાન જાહેર ક્ષેત્રની બેંકોનો કુલ વ્યવસાય રૂ. ૨૪૨.૨૭ લાખ કરોડ સુધી પહોંચ્યો. આ બેંકોએ ૧૨.૪ ટકાનો મજબૂત લોન વૃદ્ધિદર પણ નોંધાવ્યો હતો. આમાં, રિટેલ લોન વૃદ્ધિ ૧૬.૬ ટકા, કૃષિ લોન વૃદ્ધિ ૧૨.૯ ટકા અને એમએસએમઈ લોન વૃદ્ધિ ૧૨.૫ ટકા રહી.
નિવેદન અનુસાર, મૂડી અને જોખમ ભારિત સંપત્તિના ગુણોત્તર ૧૪.૮૩ ટકા સાથે પર્યાપ્ત મૂડી બફર બનાવવામાં આવ્યો હતો, જે ૧૧.૫ ટકાની લઘુત્તમ જરૂરિયાત કરતાં ઘણો વધારે છે. મંત્રાલયે જણાવ્યું હતું કે, “જાહેર ક્ષેત્રની બેંકો પર્યાપ્ત મૂડીકૃત છે અને અર્થતંત્રના તમામ ક્ષેત્રોની ધિરાણ માંગણીઓને પૂર્ણ કરવા માટે સારી સ્થિતિમાં છે, જેમાં ખાસ કરીને કૃષિ, MSME અને માળખાગત ક્ષેત્રો પર ભાર મૂકવામાં આવ્યો છે.” નાણા મંત્રાલયે જણાવ્યું હતું કે નીતિ અને પ્રક્રિયા સુધારાઓને કારણે ધિરાણ શિસ્ત, તણાવગ્રસ્ત સંપત્તિઓની ઓળખ અને નિરાકરણ, સુધારેલ શાસન, નાણાકીય સમાવેશ પહેલ અને ટેકનોલોજી અપનાવવા માટે વધુ સારી સિસ્ટમો બની છે.
