RailOne App: ડિજિટલ પેમેન્ટ અને આર-વોલેટ દ્વારા 3% સુધીનું ડિસ્કાઉન્ટ મેળવો
ભારતીય રેલ્વેના મુસાફરો માટે રાહતના સમાચાર છે. હવે અનારક્ષિત (જનરલ) ટિકિટના ભાડામાં પણ બચત કરવાની તક મળી રહી છે. 14 જુલાઈ 2026 સુધી ચાલનારી આ મર્યાદિત સમયગાળાની ઓફર હેઠળ, RailOne એપ દ્વારા રિઝર્વેશન વગરની ટિકિટ બુક કરવા અને ડિજિટલ પેમેન્ટ કરવા પર 3% સુધીની છૂટ મળી શકે છે. જો તમે દરરોજ ટ્રેનમાં મુસાફરી કરો છો અથવા ટૂંક સમયમાં પ્રવાસનું આયોજન કરી રહ્યા છો, તો આ ઓફર તમારા માટે ઘણી ફાયદાકારક સાબિત થઈ શકે છે.
ડિસ્કાઉન્ટનો લાભ લેવા માટે તમારે RailOne એપ ડાઉનલોડ કરીને તેમાં લોગ-ઈન કરવાનું રહેશે. એપ દ્વારા ટિકિટ બુક કરતી વખતે મુસાફરોને ભાડામાં 3 ટકા સુધીની છૂટ મળશે. દાખલા તરીકે, જો ટિકિટનું ભાડું 100 રૂપિયા છે, તો તેની કિંમત માત્ર 97 રૂપિયા રહેશે. આ ઉપરાંત, જો તમે R-Wallet થી પેમેન્ટ કરો છો, તો તમને વધારાનું 3% કેશબેક પણ મળશે. રેલ્વેનું કહેવું છે કે આ એપનો હેતુ મુસાફરોની સુવિધા વધારવાનો અને દેશમાં કેશલેસ વ્યવહારોને પ્રોત્સાહન આપવાનો છે.
RailOne એપ મુસાફરો માટે અત્યંત ઉપયોગી છે કારણ કે તે એક જ પ્લેટફોર્મ પર અનેક સેવાઓ પૂરી પાડે છે. આ એપ દ્વારા તમે આરક્ષિત, અનારક્ષિત અને પ્લેટફોર્મ ટિકિટ સરળતાથી બુક કરી શકો છો. આ સિવાય ટ્રેનનું લાઈવ લોકેશન, પ્લેટફોર્મ નંબર અને કોચ પોઝિશન વિશે પણ માહિતી મેળવી શકાય છે. મુસાફરો ઈ-કેટરિંગ સેવા દ્વારા પોતાની સીટ પર ભોજન મંગાવી શકે છે અને ‘રેલ મદદ’ ફીચર દ્વારા કોઈપણ ફરિયાદ નોંધાવી શકે છે. સુરક્ષા માટે આ એપમાં ફિંગરપ્રિન્ટ અને ફેસ રેકગ્નિશન જેવા બાયોમેટ્રિક લોગ-ઈન સપોર્ટ પણ આપવામાં આવ્યા છે.
