GTRI
દ્વિપક્ષીય વેપાર કરાર હેઠળ ભારતે અમેરિકન ઉત્પાદનો પર ટેરિફ ઘટાડવાનો સંકેત આપ્યા બાદ મંગળવારથી એક ઉચ્ચ સ્તરીય યુએસ પ્રતિનિધિમંડળ મુલાકાત લેવા જઈ રહ્યું છે. આમાં દક્ષિણ અને મધ્ય એશિયા માટે સહાયક યુએસ વેપાર પ્રતિનિધિ, બ્રેન્ડન લેન્ચનો પણ સમાવેશ થાય છે.
અમેરિકન પ્રતિનિધિમંડળની આ મુલાકાત એવા સમયે થઈ રહી છે જ્યારે રાષ્ટ્રપતિ ટ્રમ્પે 2 એપ્રિલથી પારસ્પરિક ટેરિફ લાદવાની જાહેરાત કરી છે. એવી આશંકા છે કે આનાથી ભારતમાંથી નિકાસ થતા કૃષિ ઉત્પાદનો, માંસ, પ્રોસેસ્ડ ફૂડ વસ્તુઓ, ઓટોમોબાઈલ્સ, હીરા, સોનાના ઉત્પાદનો તેમજ રસાયણો અને ફાર્મા ઉત્પાદનો પર અસર પડી શકે છે. જેના પર ટેરિફમાં તફાવત 8 થી 33 ટકા સુધીનો હોઈ શકે છે.
જોકે, બીજી તરફ, આર્થિક થિંક ટેન્ક GTRI (ગ્લોબલ ટ્રેડ રિસર્ચ ઇનિશિયેટિવ) એ આ અંગે ચેતવણી આપી છે. GTRI એ મંગળવારે જણાવ્યું હતું કે ભારતે અમેરિકા સાથે પ્રસ્તાવિત દ્વિપક્ષીય વેપાર કરાર પર વાટાઘાટો કરતી વખતે સાવધાની રાખવી જોઈએ કારણ કે અમેરિકામાં ફાસ્ટ-ટ્રેક વેપાર સત્તાનો અભાવ કોઈપણ કરારને કોંગ્રેસ દ્વારા કરવામાં આવેલા ફેરફારો માટે સંવેદનશીલ બનાવે છે.
GTRI એ વધુમાં જણાવ્યું હતું કે પ્રમાણપત્ર પ્રક્રિયા અમેરિકાને વેપાર કરાર પર હસ્તાક્ષર કર્યા પછી અસરકારક રીતે ફરીથી વાટાઘાટો કરવાની મંજૂરી આપે છે. આ માટે સ્થાનિક કાનૂની ફેરફારો, નિયમનકારી સુધારા અને નીતિગત ફેરફારોની જરૂર છે. આનાથી ભારતની સાર્વભૌમત્વ નબળી પડી શકે છે.
