GST
ભારતીય વીમા નિયમનકારી અને વિકાસ સત્તામંડળ (IRDAI) એ આરોગ્ય અને જીવન વીમા પ્રીમિયમ પર GST ઘટાડવા અંગે પોતાનો અભિપ્રાય રજૂ કર્યો છે. આ અંગે એપ્રિલમાં મંત્રીઓના જૂથ (GoM) ની બેઠક થવાની શક્યતા છે. મનીકંટ્રોલના અહેવાલ મુજબ, બિહારના નાયબ મુખ્યમંત્રી સમ્રાટ ચૌધરીના નેતૃત્વ હેઠળની કાઉન્સિલ મે મહિનામાં તેની આગામી બેઠકમાં દરખાસ્તો પર વિચાર કરી શકે છે.
એપ્રિલમાં યોજાઈ શકે છે GoM ની બેઠક
અધિકારીએ જણાવ્યું હતું કે, IRDAI એ જીવન અને આરોગ્ય વીમા પર GST ઘટાડવા અંગે પોતાનો અભિપ્રાય આપ્યો છે. હવે IRDAI પણ આ ચર્ચામાં જોડાયું છે. એપ્રિલમાં આ અંગે GoM ની બેઠક યોજાઈ શકે છે. આ પછી રિપોર્ટ GST કાઉન્સિલને સુપરત કરવામાં આવશે. GST કાઉન્સિલ તેની આગામી બેઠકમાં જીવન અને આરોગ્ય વીમા પર GSTમાં રાહત આપી શકે છે.
આ બેઠક એપ્રિલના અંતમાં અથવા મે મહિનાની શરૂઆતમાં યોજાશે. પછી કદાચ આ વીમાનો મુદ્દો પણ ઉકેલાઈ જશે. ટર્મ ઇન્શ્યોરન્સ પ્લાન પર ૧૮ ટકા ટેક્સ સંપૂર્ણપણે નાબૂદ કરવા પર રાજ્યો વચ્ચે સર્વસંમતિ બની હતી. IRDAI એ કોઈ ટિપ્પણી કરી ન હોવાથી નિર્ણય પર કોઈ સર્વસંમતિ નહોતી.
અધિકારીએ કહ્યું કે આ સમગ્ર ચર્ચામાં IRDAIનો સમાવેશ કરવો મહત્વપૂર્ણ છે જેથી વધુ આરોપો ન લગાવી શકાય કે આ મુદ્દા પર તેમની સાથે કોઈ ચર્ચા થઈ નથી. IRDAI દ્વારા કરવામાં આવેલી ટિપ્પણીઓની સમીક્ષા કર્યા પછી, સમ્રાટ ચૌધરીની અધ્યક્ષતામાં રચાયેલ મંત્રીઓનું જૂથ તેના અહેવાલને અંતિમ સ્વરૂપ આપશે. GST કાઉન્સિલે અગાઉ 21 ડિસેમ્બરના રોજ તેની બેઠકમાં આરોગ્ય અને જીવન વીમા પ્રીમિયમ પર GST મુક્તિ આપવા અથવા ઘટાડવાનો નિર્ણય નિયમનકાર તરફથી વધુ માહિતી પ્રાપ્ત થાય ત્યાં સુધી મુલતવી રાખ્યો હતો.
