નવા નાણાકીય વર્ષના પ્રથમ દિવસે સોના અને ચાંદીના ભાવમાં વધારો જોવા મળી રહ્યો છે. સોનાના વાયદાના ભાવે આજે નવો રેકોર્ડ બનાવ્યો હતો અને રૂ. 69,487ની સર્વકાલીન ટોચે પહોંચી હતી. ચાંદીના વાયદાના ભાવ આજે 75,600ને વટાવી ગયા છે. આંતરરાષ્ટ્રીય બજારમાં પણ સોનાના વાયદાના ભાવ ઓલ ટાઈમ હાઈએ પહોંચ્યા હતા.
એચડીએફસી સિક્યોરિટીના કોમોડિટી અને કરન્સીના વડા અનુજ ગુપ્તા કહે છે કે અમેરિકાની સેન્ટ્રલ બેંક ફેડરલ રિઝર્વ દ્વારા વ્યાજદરમાં ઘટાડો કરવાના સમાચારને કારણે સોના અને ચાંદીના ભાવ વધી રહ્યા છે.
સોનાના વાયદાના ભાવ સર્વોચ્ચ ટોચ પર
મલ્ટી કોમોડિટી એક્સચેન્જ (MCX) પર સોનાનો એપ્રિલ કોન્ટ્રાક્ટ આજે રૂ. 1,022ના ઉછાળા સાથે રૂ. 68,699 પર ખૂલ્યો હતો. સમાચાર લખાય છે ત્યારે આ કોન્ટ્રાક્ટ રૂ. 1,215ના ઉછાળા સાથે રૂ. 68,892 પર ટ્રેડ કરી રહ્યો હતો.
આ સમયે તે દિવસની ઊંચી સપાટીએ રૂ. 69,487 અને દિવસની નીચી સપાટી રૂ. 68,699 પર પહોંચ્યો હતો. સોનાનો વાયદો આજે રૂ. 69,487 પ્રતિ 10 ગ્રામની સર્વોચ્ચ સપાટીને સ્પર્શ્યો હતો.
ચાંદી પણ ચમકી
MCX પર ચાંદીનો બેન્ચમાર્ક મે કોન્ટ્રાક્ટ આજે રૂ. 402ના વધારા સાથે રૂ. 75,450 પર ખૂલ્યો હતો. સમાચાર લખાય છે ત્યારે આ કોન્ટ્રાક્ટ રૂ. 622ના ઉછાળા સાથે રૂ. 75,670 પર ટ્રેડ કરી રહ્યો હતો.
