શેરોમાં આશ્ચર્યજનક તોફાની વધારો, ગૌતમ અદાણીએ મુકેશ અંબાણીને પાછળ છોડી દીધા, બન્યા એશિયાના સૌથી ધનિક વ્યક્તિ

અદાણી ગ્રુપના ચેરમેન ગૌતમ અદાણી હવે રિલાયન્સ ગ્રુપના માલિક મુકેશ અંબાણીને પાછળ છોડીને ભારતના સૌથી અમીર વ્યક્તિ બની ગયા છે. એટલું જ નહીં તે એશિયાના સૌથી અમીર વ્યક્તિ પણ બની ગયા છે. ગ્રુપ કંપનીઓના શેરમાં ભારે ઉછાળાને કારણે આવું બન્યું છે. શુક્રવારે અદાણી ગ્રુપના શેરમાં જોરદાર ઉછાળો જોવા મળ્યો હતો. આ સાથે અદાણી ગ્રૂપનું માર્કેટ કેપિટલાઇઝેશન 18 લાખ કરોડ રૂપિયાના રેકોર્ડ હાઈની નજીક પહોંચી ગયું છે. શુક્રવારે તે 17.88 લાખ કરોડ રૂપિયા થઈ ગયો. અમેરિકન બ્રોકરેજ ફર્મ જેફરીઝે અદાણી એન્ટરપ્રાઇઝ સહિત ચાર ગ્રુપ કંપનીઓના શેર ખરીદવાની સલાહ આપી હતી.

1 દિવસમાં નેટવર્થમાં રૂ. 45,500 કરોડનો વધારો થયો છે

ગૌતમ અદાણીની નેટવર્થ એક જ દિવસમાં $5.45 બિલિયન એટલે કે રૂ. 45,500 કરોડ વધી છે. આ સાથે તેમની સંપત્તિ વધીને $111 બિલિયન થઈ ગઈ છે. આ વર્ષે અત્યાર સુધીમાં ગૌતમ અદાણીની નેટવર્થમાં $26.8 બિલિયનનો વધારો થયો છે. આ સાથે તે વિશ્વના સૌથી અમીર લોકોની યાદીમાં 11મા સ્થાને આવી ગયો છે. તેમજ ગૌતમ અદાણી હવે ભારત અને એશિયાના સૌથી અમીર વ્યક્તિ બની ગયા છે. બીજી તરફ, મુકેશ અંબાણી 109 અબજ ડોલરની સંપત્તિ સાથે વિશ્વના સૌથી અમીર લોકોની યાદીમાં 12મા સ્થાને છે.

અદાણી ગ્રુપના શેરમાં મોટો ઉછાળો

અદાણી ગ્રૂપની મુખ્ય કંપની અદાણી એન્ટરપ્રાઇઝિસનો શેર શુક્રવારે 6.84 ટકા અથવા રૂ. 218.35 વધીને રૂ. 3411.45 પર પહોંચ્યો હતો. અદાણી પોર્ટ્સનો શેર 3.93 ટકા અથવા રૂ. 54.30 વધીને રૂ. 1437.70 થયો હતો. અદાણી પાવરનો શેર 8.37 ટકા અથવા રૂ. 58.45 વધી રૂ. 756.65 થયો હતો. અદાણી એનર્જીનો શેર 2.36 ટકા અથવા રૂ. 25.85 વધીને રૂ. 1122.80 થયો હતો. અદાણી ગ્રીનનો શેર 2.19 ટકા અથવા રૂ. 41 વધી રૂ. 1915.25 થયો હતો. અદાણી ટોટલનો શેર 8.70 ટકા અથવા રૂ. 83.20 વધીને રૂ. 1039.15 અને અદાણી વિલ્મરનો શેર 3.31 ટકા અથવા રૂ. 11.40 વધીને રૂ. 355.85 થયો હતો.