અમેરિકન ગ્રીન કાર્ડ માટેનો વેઈટિંગનો સમય એટલો લાંબો છે કે ઘણા ભારતીયોને દાયકાઓથી અમેરિકામાં રહેવા છતાં ગ્રીન કાર્ડ મળ્યું નથી. અમેરિકા દરેક દેશ માટે એક ક્વોટા નક્કી કરે છે અને જે તે દેશમાંથી ક્વોટા કરતા વધારે ગ્રીન કાર્ડની અરજીઓ મળે ત્યારે તેમાં ઘણી લાંબી રાહ જાેવી પડે છે. ભારતીયોએUS Green Card મુદ્દો વારંવાર ઉઠાવ્યો છે અને અમેરિકન રાજકારણીઓ પણ આ મામલે વચનો આપતા રહે છે. પરંતુ હજુ સુધી કોઈ ઉકેલ આવ્યો નથી. યુએસ ગ્રીન કાર્ડ માટે ભારતીયોની અરજીઓમાં એટલું બધુ વેઇટિંગ ચાલે છે કે આ ઝડપે અરજીઓનો નિકાલ કરવામાં આવશે તો હજુ ૧૯૫ વર્ષ લાગી જશે. અમેરિકન સરકારના એક અધિકારીએ તાજેતરમાં કહ્યું હતું કે કન્ટ્રી આધારિત ક્વોટા સિસ્ટમના કારણે ગ્રીન કાર્ડ ઈશ્યૂ થવામાં ઘણી વાર લાગે છે. અમેરિકામાં વસતા ભારતીયો તરફથી ગ્રીન કાર્ડની એટલી બધી અરજીઓ આવી છે કે ક્વોટાના કારણે વર્ષો સુધી તેમને પર્મેનન્ટ રેસિડન્સી મળી શકે તેમ નથી. અમેરિકન ગ્રીન કાર્ડના આંકડા પર નજર નાખીએ તો આખી વાત સારી રીતે સમજાશે. અમેરિકા દર વર્ષે ૨.૨૬ લાખ ફેમિલી સ્પોન્સર્ડ પ્રેફરન્સ ગ્રીન કાર્ડ ઈશ્યૂ કરે છે જ્યારે ૧.૪૦ લાખ એમ્પ્લોયમેન્ટ બેઝ્ડ ગ્રીન કાર્ડ આપે છે. અમેરિકન સંસદ દ્વારા જ લિમિટ સેટ કરવામાં આવી છે અને તેને વધારવા માટે માંગણી થઈ છે. અમેરિકાએ નક્કી કર્યું છે કે કોઈ પણ દેશને દર વર્ષે કુલ Green Card માંથી વધુમાં વધુ ૭ ટકા ગ્રીન કાર્ડ ઈશ્યૂ કરવા.
એટલે કે કોઈ પણ દેશના નાગરિકોને એક વર્ષમાં વધુમાં વધુ ૨૫,૬૨૦ ગ્રીન કાર્ડ મળી શકે. પછી તે ભારતીય હોય કે બીજા કોઈ દેશના નાગરિક હોય. હવે વસતી અને ડિમાન્ડની રીતે જાેવામાં આવે તો ભારત, ચીન, મેક્સિકો, અને ફિલિપાઈન્સ જેવા દેશના લોકો સૌથી વધારે ગ્રીન કાર્ડની અરજી કરતા હોય છે તેના કારણે ૨૫,૬૨૦નો આંકડો તેમના માટે ઘણો નાનો લાગે છે. પરિણામે ભારતીયોએ ગ્રીન કાર્ડ માટે ઘણા વર્ષો સુધી રાહ જાેવી પડે છે અને તેના પછી પણ તે કાર્ડ ઈશ્યૂ થવાની ૧૦૦ ટકા ગેરંટી નથી હોતી. અમેરિકા વિશ્વનો સૌથી પાવરફૂલ દેશ છે. આર્થિક રીતે, રાજકીય રીતે અને મિલિટરીની દૃષ્ટિએ પણ અમેરિકા દુનિયાભરમાં સૌથી વધુ પ્રભાવ ધરાવે છે. તેથી આ દેશનું ગ્રીન કાર્ડ કે પર્મેનન્ટ રેસિડન્ટ કાર્ડ મેળવવાના ઘણા ફાયદા છે. તેનાથી તમે કાયમ માટે અમેરિકામાં કામ કરી શકો છો અને તમારી પાસે આવડત હોય તો અનલિમિટેડ નાણાં કમાઈ શકો છો.
અમેરિકામાં અત્યારે જુદા જુદા ફિલ્ડમાં લાખો ભારતીયો કામ કરી રહ્યા છે અને તેમણે ગ્રીન કાર્ડની અરજી કર્યા પછી ઓછામાં ઓછા એક દાયકા સુધી રાહ જાેવી પડે છે. અમેરિકા ટેલેન્ટને હંમેશા બિરદાવતો દેશ ગણાય છે. પરંતુ US Green Cardની ડિમાન્ડ એટલી બધી છે કે અલગ અલગ ક્ષેત્રના અત્યંત ટેલેન્ડેટ લોકોને પણ ગ્રીન કાર્ડ મળી શકે તેમ નથી. અમેરિકન ડિપાર્ટમેન્ટ ઓફ સ્ટેટ દ્વારા દર મહિને એક બૂલેટિન બહાર પાડીને દેખાડવામાં આવે છે કે તમારી ગ્રીન કાર્ડની અરજી કેટલી આગળ વધી છે. તેમાં તમને ગ્રીન કાર્ડ મેળવવામાં કેટલો સમય રાહ જાેવી પડશે તે પણ દેખાડવામાં આવે છે. ગયા મહિને અમેરિકન સાંસદોના એક ગ્રૂપે અમેરિકન સરકાર સમક્ષ માગણી કરી હતી કે એક એક્ઝિક્યુટિવ ઓર્ડર બહાર પાડીને ભારતીયો માટે પ્રાયોરિટી ડેટ નક્કી કરવામાં આવે કારણ કે અત્યાર સુધીમાં ગ્રીન કાર્ડની જે અરજીઓ આવી છે તેનો નિકાલ કરવામાં ૧૯૫ વર્ષ લાગી જાય તેમ છે.
