‘અમિત શાહની આંખોમાં ડર છે’, રાહુલ ગાંધીનો મોદી સરકાર પર મોટો પ્રહાર!
હૈદરાબાદના ઇન્ટરનેશનલ કન્વેન્શન સેન્ટરમાં આયોજિત ભારત સમિટ 2026ના અંતિમ દિવસે લોકસભામાં વિપક્ષના નેતા રાહુલ ગાંધીએ સભાને સંબોધિત કરી હતી. આ દરમિયાન તેમણે ભારત સરકાર પર ગંભીર આરોપો લગાવ્યા હતા. રાહુલ ગાંધીએ કાર્યક્રમમાં હાજર ન રહી શકેલા તમામ ડેલિગેટ્સની માફી માગી હતી. તેમણે કહ્યું કે ભારત સરકારના કારણે ઘણા ડેલિગેટ્સ આ સમિટમાં હાજર રહી શક્યા નથી. આ અમારી ભૂલ નથી. આ ઘટનાથી તમને અંદાજ આવી ગયો હશે કે દેશમાં વિપક્ષે કેવી પરિસ્થિતિનો સામનો કરવો પડી રહ્યો છે.
SIR અને ચૂંટણી પ્રક્રિયાને લઈને ઉઠાવ્યા સવાલ
રાહુલ ગાંધીએ પોતાના સંબોધનમાં મતદાર યાદીમાંથી નામો દૂર કરવાના મુદ્દા એટલે કે SIRનો પણ ઉલ્લેખ કર્યો હતો. તેમણે ચૂંટણી પ્રક્રિયા પર સવાલ ઉઠાવતા આરોપ લગાવ્યો કે દેશમાં લોકશાહી વ્યવસ્થા નબળી પડી રહી છે. તેમના મતે, ચૂંટણીમાં ગેરરીતિઓ થઈ રહી છે અને મતદારોના અધિકારો પર અસર પડી રહી છે. રાહુલ ગાંધીએ કહ્યું કે વર્ષ 2014થી દેશમાં લોકશાહી ખતમ થઈ ગઈ છે. તેમણે ચૂંટણી પંચની કામગીરી અને ચૂંટણી પરિણામો અંગે પણ ગંભીર સવાલો ઉઠાવ્યા હતા. જોકે, આ તમામ આરોપો રાહુલ ગાંધીના રાજકીય નિવેદનોનો ભાગ છે.
‘અમે નરેન્દ્ર મોદીને હરાવવા જઈ રહ્યા છીએ’
રાહુલ ગાંધીએ પોતાના ભાષણ દરમિયાન વિશ્વાસ વ્યક્ત કર્યો હતો કે વિપક્ષ આગામી સમયમાં નરેન્દ્ર મોદીને હરાવવામાં સફળ રહેશે. તેમણે કહ્યું હતું કે હું પૂરા આત્મવિશ્વાસ સાથે કહી શકું છું કે અમે મોદીને હરાવવા જઈ રહ્યા છીએ અને તેમની સરકારથી દેશને મુક્ત કરાવીશું. રાહુલના જણાવ્યા અનુસાર, આ બદલાવની અસર રસ્તાઓ પર પણ જોવા મળી રહી છે. તેમણે એવો દાવો પણ કર્યો કે વડાપ્રધાન નરેન્દ્ર મોદી અને ગૃહમંત્રી અમિત શાહના મનમાં ડર છે. તેમના મતે, દેશમાં રાજકીય પરિવર્તનનો માહોલ ઊભો થઈ રહ્યો છે.
ફાસીવાદ અને લોકશાહીના મુદ્દે સરકારને ઘેરી
રાહુલ ગાંધીએ પોતાના સંબોધનમાં ફાસીવાદનો ઉલ્લેખ કરતાં કહ્યું કે છેલ્લા એક દાયકાથી ફાસીવાદી લોકો સતત બૂમો પાડી રહ્યા છે, જ્યારે દેશની મોટાભાગની જનતા સમગ્ર પરિસ્થિતિ જોઈ રહી છે. તેમણે કહ્યું કે ફાસીવાદી વિચારધારા ધરાવતા લોકો પોતાને સર્વજ્ઞાની માને છે અને અન્ય લોકોની વાત સાંભળતા નથી. રાહુલના મતે, બહુમતી લોકો સ્વભાવથી નમ્ર હોય છે. તેમણે વર્ષ 2014ની ચૂંટણીનો ઉલ્લેખ કરીને કહ્યું કે તે સમયે ચૂંટણીમાં મોટા પ્રમાણમાં નાણાં ખર્ચવામાં આવ્યાં હતાં. વિપક્ષ પણ તે સમયે આ પરિસ્થિતિથી આશ્ચર્યચકિત થઈ ગયો હતો.
મહારાષ્ટ્ર ચૂંટણીનું ઉદાહરણ આપીને ચૂંટણી પંચ પર સવાલ
રાહુલ ગાંધીએ 2024ની લોકસભા ચૂંટણી અને ત્યારબાદ મહારાષ્ટ્રમાં યોજાયેલી વિધાનસભા ચૂંટણીનું ઉદાહરણ આપ્યું હતું. તેમણે દાવો કર્યો કે લોકસભા ચૂંટણીમાં વિપક્ષી ગઠબંધનને સફળતા મળી હતી, પરંતુ માત્ર ત્રણ મહિના પછી વિધાનસભા ચૂંટણીમાં પરિણામો બદલાઈ ગયાં. તેમણે આશરે 70 લાખ નવા મતદારો ઉમેરવામાં આવ્યા હોવાનો આરોપ લગાવ્યો હતો. રાહુલ ગાંધીએ સવાલ કર્યો કે જો મોટી સંખ્યામાં મતદારોને અમાન્ય ગણવામાં આવે છે, તો પછી ચૂંટણીની પારદર્શિતા અને તેની વિશ્વસનીયતા કેવી રીતે જાળવી શકાય? તેમના આ નિવેદનથી ચૂંટણી પ્રક્રિયાને લઈને રાજકીય ચર્ચા ફરી તેજ બની છે.
સત્ય અને અહિંસાથી લડવાની વાત કરી
કોંગ્રેસના ઇતિહાસનો ઉલ્લેખ કરતાં રાહુલ ગાંધીએ કહ્યું કે તેમની પાર્ટીએ દેશના બંધારણ અને આઝાદી માટે લડત આપી છે. તેમણે મહાત્મા ગાંધીના વિચારો અને સત્ય તથા અહિંસાના માર્ગને કોંગ્રેસની તાકાત ગણાવી હતી. રાહુલના મતે, ગુસ્સો, હિંસા, ડર અને નફરતથી કોઈ લડાઈ જીતી શકાતી નથી, પરંતુ પ્રેમથી લોકોના દિલ જીતી શકાય છે. તેમણે કહ્યું કે તમે થોડા સમય માટે કેટલાક લોકોને મૂર્ખ બનાવી શકો છો, પરંતુ હંમેશાં બધા લોકોને મૂર્ખ બનાવી શકતા નથી. અંતમાં તેમણે ફરી વિશ્વાસ વ્યક્ત કર્યો કે વિપક્ષ નરેન્દ્ર મોદીને હરાવશે અને આ લડાઈ નફરત નહીં, પરંતુ પ્રેમ અને લોકશાહીના રસ્તે લડશે.
