સામાન્ય નાગરિકોના ખિસ્સા પર પડશે અસર: “૧ ઓક્ટોબર ૨૦૨૬થી બદલાશે બેંકિંગ, ગેસ સબ્સિડી અને પ્રદૂષણના કડક નિયમો”
નવો મહિનો હંમેશા નાણાકીય અને વહીવટી ક્ષેત્રે કેટલાંક નવા ફેરફારો લઈને આવે છે. તે જ રીતે ૧ ઓક્ટોબર ૨૦૨૬ થી દેશભરમાં અનેક મહત્વપૂર્ણ નિયમો બદલાવા જઈ રહ્યા છે, જેની સીધી અસર સામાન્ય નાગરિકોના રોજિંદા જીવન અને ખિસ્સા પર પડશે. એલપીજી ગેસ સબ્સિડીથી લઈને બેંકિંગ, પ્રોપર્ટી ટેક્સ, વાહન પ્રદૂષણ અને ઈલેક્ટ્રોનિક્સ સાધનોની ખરીદી સુધીના ક્ષેત્રોમાં આ ફેરફારો અમલી બનશે.
એલપીજી ગ્રાહકો માટે આધાર બાયોમેટ્રિક ઓથેન્ટિકેશન ફરજિયાત
જે ગ્રાહકો એલપીજી ગેસ કનેક્શન પર સબ્સિડી મેળવે છે, તેમણે ૧ ઓક્ટોબર પહેલાં બાયોમેટ્રિક આધાર ઓથેન્ટિકેશન પૂર્ણ કરવું જરૂરી છે. જો આ પ્રક્રિયા પૂરી નહીં થાય, તો ગેસ સિલિન્ડરનું કનેક્શન કે ડિલિવરી બંધ નહીં થાય, પરંતુ સરકાર તરફથી મળતી સબ્સિડી અટકી જશે અને ગ્રાહકે બજાર ભાવે (Market Rate) સિલિન્ડર ખરીદવો પડશે. આ ઓથેન્ટિકેશન ગેસ એજન્સી, ડિલિવરી બોય કે ઓઈલ કંપનીઓની મોબાઈલ એપ દ્વારા કરાવવાનું રહેશે.
બેંકોમાં ફિક્સ્ડ ડિપોઝિટ (FD) ના વ્યાજદરોમાં સુધારો
રિઝર્વ બેંક ઓફ ઈન્ડિયા (RBI) ના નવા નિર્દેશો અનુસાર, ૧ ઓક્ટોબરથી બેંકોએ એક જ તારીખે જમા કરાયેલી સમાન રકમ પર તમામ શાખાઓ અને ગ્રાહકોને એકસરખો વ્યાજદર આપવો પડશે. આ ઉપરાંત, તમામ સ્મોલ ફાઇનાન્સ બેંકોએ દરરોજ સવારે ૧૦:૦૦ વાગ્યા સુધી પોતાની સત્તાવાર વેબસાઇટ પર એફડીના વ્યાજદરોની અદ્યતન યાદી જાહેર કરવી ફરજિયાત રહેશે.
એસબીઆઈ (SBI) ખાતામાંથી કેશ ઉપાડના નિયમોમાં ફેરફાર
સ્ટેટ બેંક ઓફ ઈન્ડિયાના ‘બેસિક સેવિંગ્સ બેંક ડિપોઝિટ એકાઉન્ટ’ (BSBDA) ધારકો માટે શાખામાંથી રોકડ ઉપાડવાના નિયમો બદલાયા છે. ૧ ઓક્ટોબરથી મહિનામાં પ્રથમ ૪ વાર કેશ ઉપાડ બિલકુલ મફત રહેશે. જોકે, ૪ વખતથી વધુ ઉપાડ કરવા પર ગ્રાહકે પ્રતિ ટ્રાન્ઝેક્શન રૂ. ૧૫ વત્તા જીએસટી (GST) નો ચાર્જ ચૂકવવો પડશે.
જન્મ-મૃત્યુ પ્રમાણપત્ર અને એનપીએસ (NPS) સ્વાસ્થ્ય યોજના
સરકારે જન્મ અને મૃત્યુની નોંધણીના નિયમો કડક બનાવ્યા છે. ૨૧ દિવસની અંદર કરાયેલી નોંધણી તદ્દન મફત રહેશે. ૨૧ દિવસથી ૧ વર્ષ વચ્ચે વિલંબ થાય તો લેટ ફી સાથે સોગંદનામું (Affidavit) આપવું પડશે, જ્યારે ૧ થી ૨ વર્ષ બાદ એક્ઝિક્યુટિવ મેજિસ્ટ્રેટ અને ૨ વર્ષ પછી ફર્સ્ટ ક્લાસ જ્યુડિશિયલ મેજિસ્ટ્રેટની મંજૂરી જરૂરી બનશે.
બીજી તરફ, ૨.૧૭ કરોડથી વધુ એનપીએસ સબ્સ્ક્રાઇબર્સ માટે ૧ ઓક્ટોબરથી ‘NPS સ્વાસ્થ્ય’ યોજના શરૂ થઈ રહી છે, જેમાં નિવૃત્તિ બચતની સાથે અલગથી ‘સુપર ટોપ-અપ હેલ્થ ઇન્સ્યોરન્સ’ નો લાભ પણ મળશે.
પ્રોપર્ટી ખરીદી, હોમ એપ્લાયન્સિસ અને દિલ્હી વાહન નિયમો
એનઆરઆઈ પ્રોપર્ટી ખરીદી: NRI વિક્રેતા પાસેથી પ્રોપર્ટી ખરીદતી વખતે ભારતીય ખરીદદારોએ હવે TAN નંબર લેવાની જરૂર નહીં રહે; તેઓ પોતાના PAN કાર્ડનો ઉપયોગ કરીને જ TDS કાપી શકશે.
હોમ એપ્લાયન્સિસ મોંઘા થશે: કાચા માલના ઊંચા ભાવ અને વૈશ્વિક પરિબળોને કારણે ૧ ઓક્ટોબરથી એસી, ટીવી, વોશિંગ મશીનની કિંમતોમાં ૫% થી ૮% નો વધારો થશે.
PUC નિયમો અને ગુલાબી પાસ: દિલ્હી-એનસીઆરમાં માન્ય PUC સર્ટિફિકેટ વગરના વાહનો પર રૂ. ૧૦,૦૦૦ નો દંડ અને જેલની જોગવાઈ અમલી બનશે. સાથે જ, દિલ્હીની ડીટીસી બસોમાં મહિલાઓ માટે કાગળની પિંક ટિકિટને બદલે ‘સહેલી પિંક સ્માર્ટ કાર્ડ’ ફરજિયાત બનાવવામાં આવ્યું છે.
