UPI Go Global: વિશ્વના 11 દેશોમાં વાગ્યો ભારતીય UPIનો ડંકો, Global Fintech Fest માં PM મોદીનું મોટું નિવેદન
વડાપ્રધાન નરેન્દ્ર મોદીએ મુંબઈ ખાતે આયોજિત ‘ગ્લોબલ ફિનટેક ફેસ્ટ 2026’ (Global Fintech Fest 2026) ને સંબોધિત કરતા જણાવ્યું હતું કે, સમગ્ર વિશ્વ હાલમાં ભૌગોલિક-રાજકીય તણાવ, સંઘર્ષો અને અનિશ્ચિતતાઓના યુગમાંથી પસાર થઈ રહ્યું છે. વૈશ્વિક સ્તરે કાચા તેલના પુરવઠા અને ભાવને લઈને ભારે અસ્થિરતાનો માહોલ છે. આવી પડકારજનક વૈશ્વિક પરિસ્થિતિઓ વચ્ચે પણ ભારત 7.8 ટકાના મજબૂત જીડીપી વૃદ્ધિ દર સાથે આગળ વધી રહ્યું છે, જે વૈશ્વિક મંચ પર ભારત પ્રત્યેના વધતા અવિચળ વિશ્વાસને દર્શાવે છે.
વડાપ્રધાને ઉમેર્યું હતું કે ભારતીય અર્થતંત્રની આ ઝડપી પ્રગતિ અને સ્થિરતાનો ઉત્સાહ ફિનટેક ક્ષેત્રના યુવા ઉદ્યોગસાહસિકોના ચહેરા પર સ્પષ્ટપણે જોઈ શકાય છે.
UPI ના 10 વર્ષ અને વૈશ્વિક વિસ્તરણ
પોતાના સંબોધનમાં વડાપ્રધાન નરેન્દ્ર મોદીએ ડિજિટલ પેમેન્ટ્સ અને ફિનટેક ક્રાંતિનો ઉલ્લેખ કરતા કહ્યું કે, જ્યારે પણ ફિનટેક ક્ષેત્રની ચર્ચા થાય ત્યારે તે યુપીઆઈ (UPI) ના ઉલ્લેખ વિના અધૂરી રહે છે. તેમણે યાદ અપાવ્યું કે તાજેતરમાં જ 25 ઓગસ્ટે યુપીઆઈએ પોતાના સફળ 10 વર્ષ પૂર્ણ કર્યા છે.
India is taking its fintech journey to new heights, with innovation and inclusion at its core. Addressing the Global Fintech Fest 2026 in Mumbai. https://t.co/pMhokoCBjG
— Narendra Modi (@narendramodi) September 8, 2026
પીએમ મોદીએ કહ્યું, “એક સમય હતો જ્યારે હું કહેતો હતો કે તમારું આખું બેંકિંગ તમારા આંગળીના ટેરવે (ફિંગર ટીપ્સ પર) હશે, ત્યારે કેટલાક લોકોને આ વાત અશક્ય લાગતી હતી. પરંતુ આજે યુપીઆઈએ ભારતની નાણાકીય લેવડ-દેવડની પદ્ધતિ સંપૂર્ણપણે બદલી નાખી છે. એટલું જ નહીં, યુપીઆઈ હવે માત્ર ભારત પૂરતું મર્યાદિત નથી રહ્યું, પરંતુ વિશ્વના 11 દેશોમાં પણ ભારતીય યુપીઆઈ સેવાઓ સફળતાપૂર્વક કાર્યરત છે.”
‘અમારી સરકાર અને ગ્લોબલ ફિનટેક ફેસ્ટ બંનેમાં થઈ છે હેટ્રિક’
વડાપ્રધાને પોતાના જાહેર જીવન અને શાસનનો ઉલ્લેખ કરતા જણાવ્યું કે તેમને નીતિ નિર્માણ અને ગુડ ગવર્નન્સ સાથે જોડાયેલા 25 વર્ષ પૂર્ણ થઈ રહ્યા છે. પરંતુ મોદી કોઈ એક પડાવ પર પહોંચીને વિરામ લેવા કે માત્ર જશ્ન મનાવવામાં માનતા નથી.
તેમણે કાર્યક્રમમાં ઉપસ્થિત જનમેદનીને સંબોધતા ખુશી વ્યક્ત કરી કે આજે અહીં એક અલગ જ પ્રકારની હેટ્રિક જોવા મળી છે. એક હેટ્રિક દેશના નાગરિકોએ 2024 માં સતત ત્રીજી વખત સરકાર બનાવીને આપી હતી, અને બીજી હેટ્રિક ગ્લોબલ ફિનટેક ફેસ્ટમાં સતત ત્રીજા વર્ષે તેમની વ્યક્તિગત ઉપસ્થિતિની છે. તેમણે કહ્યું કે આ સતત ભાગીદારી દર્શાવે છે કે વિકસિત ભારતના નિર્માણમાં ફિનટેક સેક્ટર અને તેની સાથે જોડાયેલા લોકો કેટલા મહત્વપૂર્ણ છે.
યુવા ઊર્જા અને ‘વિકસિત ભારત’નો દ્રઢ સંકલ્પ
દર વર્ષે આ ફેસ્ટમાં આવવાના પોતાના અનુભવને શેર કરતા વડાપ્રધાને કહ્યું કે, “હું જ્યારે પણ ગ્લોબલ ફિનટેક ફેસ્ટમાં આવું છું ત્યારે મને પહેલાં કરતાં પણ વધુ સંખ્યામાં યુવાનો અને નવી ઊર્જાનો અનુભવ થાય છે. ભારતની ફિનટેક ઈકોસિસ્ટમમાં સંભાવનાઓનો દાયરો સતત વધી રહ્યો છે.”
તેમણે અંતમાં ઉમેર્યું કે ભારતના યુવાનોમાં રિસ્ક લેવાની (જોખમ ઉઠાવવાની) ક્ષમતા વધી રહી છે અને તેમના સપના વધુ બોલ્ડ અને વિશાળ બની રહ્યા છે. આ જ યુવા શક્તિ અને નવીનતાના બળે વર્ષ 2047 સુધીમાં ‘વિકસિત ભારત’ બનાવવાનો દેશનો સંકલ્પ વધુ મજબૂત અને ચોક્કસ બની રહ્યો છે.
