Elon Musk: AI ની રેસમાં એલોન મસ્કને મોટું નુકસાન: સંપત્તિમાં 240 બિલિયન ડોલરનો ઘટાડો
વિશ્વના પ્રથમ ‘ટ્રિલિયનેયર’ તરીકે એલોન મસ્કનો ઈતિહાસ રચનારો ટૂંકો ગાળો હાલ પૂરતો થંભી ગયો છે. તેમની બે મુખ્ય કંપનીઓ—SpaceX (SPCX) અને Tesla (TSLA)—ના શેરમાં આવેલી ભારે વેચવાલીને કારણે મસ્કની કુલ સંપત્તિમાં મોટો ઘટાડો નોંધાયો છે. આ આર્થિક ફેરફારને કારણે મસ્ક હવે અધિકૃત રીતે ટ્રિલિયનેયર રહ્યા નથી, જોકે તેમ છતાં તેઓ વિશ્વના સૌથી ધનિક વ્યક્તિ તરીકેનું પોતાનું સ્થાન જાળવી રાખવામાં સફળ રહ્યા છે.
સંપત્તિમાં અચાનક મોટો ઘટાડો
બ્લૂમબર્ગ બિલિયનેયર્સ ઈન્ડેક્સના લેટેસ્ટ ડેટા મુજબ, એલોન મસ્કની નેટવર્થ ઘટીને 946 બિલિયન ડોલરના સ્તરે આવી ગઈ છે. યાદ રહે કે બે અઠવાડિયા પહેલા જ તેમની સંપત્તિ 1.11 ટ્રિલિયન ડોલર હતી અને તાજેતરમાં જ તેમણે 1.32 ટ્રિલિયન ડોલરનો રેકોર્ડ તોડ્યો હતો. 12 જૂનના રોજ SpaceX ના ઐતિહાસિક IPO પછી મસ્કની સંપત્તિએ ટ્રિલિયન ડોલરનો આંકડો પાર કર્યો હતો, પરંતુ શેરબજારની અસ્થિરતાએ આ આંકડાને નીચે ખેંચી લીધો છે.
શેરબજારમાં તોતિંગ કડાકો
SpaceX ના શેરમાં આવેલો કડાકો મસ્કની સંપત્તિ ઘટવાનું મુખ્ય કારણ છે. 16 જૂનના રોજ SpaceX ના શેર 225.64 ડોલરના સર્વકાલીન ઉચ્ચ સ્તરે હતા, જેણે કંપનીની માર્કેટ કેપ 2.5 ટ્રિલિયન ડોલર સુધી પહોંચાડી હતી. જોકે, ત્યારબાદ શેરના ભાવમાં તેના પીક લેવલથી લગભગ 30% નો ઘટાડો જોવા મળ્યો છે અને હાલ તે 154-156 ડોલરની રેન્જમાં ટ્રેડ કરી રહ્યા છે. સોમવાર (22 જૂન) ના રોજ જ એક દિવસમાં શેરમાં 16% નો ઘટાડો થવાથી મસ્કની સંપત્તિમાંથી એક ઝાટકે 240 બિલિયન ડોલર સ્વાહા થઈ ગયા હતા. આ ઉપરાંત, ટેસ્લાના શેરમાં પણ છેલ્લા બે દિવસમાં 6% થી 9% સુધીનો ઘટાડો નોંધાયો છે, જેનાથી શેર 375.53 ડોલરની સપાટી પર આવી ગયા છે.
ભાવ ઘટવા પાછળના કારણો: AI નું મોટું રોકાણ
બજારના વિશ્લેષકોના મતે, આ ઘટાડા પાછળનું સૌથી મોટું કારણ SpaceX દ્વારા કરવામાં આવેલી નવી જાહેરાત છે. કંપનીએ નવા ડેટા સેન્ટર અને આર્ટિફિશિયલ ઈન્ટેલિજન્સ (AI) પ્રોજેક્ટ્સ માટે 25 બિલિયન ડોલરના બોન્ડ્સ બહાર પાડવાની જાહેરાત કરી છે. વધુમાં, OpenAI અને Anthropic જેવી કંપનીઓ સાથે સ્પર્ધા કરવા માટે, SpaceX એ ‘Cursor AI’ નામની સ્ટાર્ટઅપ કંપનીને 60 બિલિયન ડોલરમાં ખરીદવાનો સોદો કર્યો છે.
આ સોદા માટે SpaceX એ નવા શેર ઈસ્યુ કરવાનું નક્કી કર્યું છે, જેના કારણે હાલના રોકાણકારોની હિસ્સેદારીનું મૂલ્ય લગભગ 3.4% જેટલું ઘટી ગયું છે. રોકાણકારોમાં એવી ચિંતા છે કે AI પાછળ કરવામાં આવતો આટલો મોટો ખર્ચ લાંબા ગાળા માટે જોખમી બની શકે છે, કારણ કે તેનાથી થતો નફો તરત મળવાની કોઈ શક્યતા નથી. આ કારણે માત્ર SpaceX જ નહીં, પરંતુ સમગ્ર ટેક સેક્ટરમાં રોકાણકારો સાવધ થઈ ગયા છે.
