DA Hike: મોંઘવારી વચ્ચે આસામ સરકારની મોટી રાહત: કર્મચારીઓના પગારમાં હવે વધુ ફાયદો
જ્યારે કેન્દ્રીય કર્મચારીઓ દેશભરમાં આઠમા પગાર પંચ (8th Pay Commission) અને મોંઘવારી ભથ્થા (DA) ના વધારાની આતુરતાથી રાહ જોઈ રહ્યા છે, ત્યારે આસામ સરકારે પોતાના રાજ્યના કર્મચારીઓ અને પેન્શનધારકો માટે એક મોટી ભેટની જાહેરાત કરી છે. મુખ્યમંત્રી હિમંતા બિસ્તવા સરમાના નેતૃત્વમાં મળેલી કેબિનેટ બેઠકમાં કર્મચારીઓના હિતમાં મહત્વપૂર્ણ નિર્ણયો લેવામાં આવ્યા છે, જેનાથી લાખો પરિવારોમાં ખુશીની લહેર દોડી ગઈ છે.
મોંઘવારી ભથ્થામાં ૨%નો વધારો
મુખ્યમંત્રી હિમંતા બિસ્તવા સરમાની નવી કેબિનેટની આ પ્રથમ બેઠક હતી, અને તેમાં સરકારે કર્મચારીઓ અને પેન્શનધારકો માટે મોંઘવારી ભથ્થા (DA) અને મોંઘવારી રાહત (DR) માં ૨% નો વધારો કરવાનો ઐતિહાસિક નિર્ણય કર્યો છે. આ વધારા સાથે હવે રાજ્યના કર્મચારીઓ માટે DA ૫૮% થી વધીને ૬૦% થઈ ગયો છે. આ લાભ ૧ જાન્યુઆરી, ૨૦૨૬ થી પૂર્વવર્તી અસરથી લાગુ કરવામાં આવશે. વધતી જતી મોંઘવારીના આ સમયમાં, સરકારનો આ નિર્ણય લાખો કર્મચારીઓ માટે આર્થિક સુરક્ષા પૂરી પાડનારું પગલું સાબિત થશે.
પગારમાં કેટલો વધારો થશે?
એક ઉદાહરણ) સરકારના આ નિર્ણયથી કર્મચારીઓના માસિક પગારમાં સીધો વધારો થશે. તેને સરળ ગણતરીથી સમજીએ:
૩૦,૦૦૦ રૂપિયાનો બેઝિક પે: જે કર્મચારીનો મૂળ પગાર ૩૦,૦૦૦ રૂપિયા છે, તેમને અગાઉ ૫૮% ના દરે ૧૭,૪૦૦ રૂપિયા વધારાના મળતા હતા. હવે ૬૦% ના નવા દરે તેમને ૧૮,૦૦૦ રૂપિયા મળશે. એટલે કે, કર્મચારીને દર મહિને સીધો ૬૦૦ રૂપિયાનો વધારો મળશે.
૫૦,૦૦૦ રૂપિયાનો બેઝિક પે: જે કર્મચારીનો મૂળ પગાર ૫૦,૦૦૦ રૂપિયા છે, તેમને અગાઉ ૨૯,૦૦૦ રૂપિયા મળતા હતા, જે હવે વધીને ૩૦,૦૦૦ રૂપિયા થઈ જશે. એટલે કે, આ કેટેગરીના કર્મચારીઓને મહિને ૧,૦૦૦ રૂપિયાનો વધારાનો ફાયદો થશે.
આ વધારાની રકમનો લાભ કર્મચારીઓને જૂન ૨૦૨૬ ના પગાર સાથે મળી જશે, જેમાં બાકી રહેલા મહિનાઓનો એરિયર્સ (બાકી નીકળતું ભથ્થું) પણ સામેલ હશે.
ગ્રેડ-૪ કર્મચારીઓ માટે પ્રમોશનની નવી રાહ
માત્ર મોંઘવારી ભથ્થામાં જ નહીં, પરંતુ સરકારે નીચલા સ્તરના કર્મચારીઓના કારકિર્દી વિકાસ માટે પણ મહત્વની નીતિ અમલી બનાવી છે. ‘આસામ માધ્યમિક શિક્ષણ (પ્રાંતીયકૃત શાળા) સેવા નિયમ, ૨૦૨૬’ માં સુધારાને મંજૂરી આપવામાં આવી છે. આ નિર્ણયનો સૌથી મોટો ફાયદો ગ્રેડ-૪ ના કર્મચારીઓને મળશે. હવે શાળાઓ અને અન્ય સરકારી વિભાગોમાં કામ કરતા ગ્રેડ-૪ કર્મચારીઓ માટે ગ્રેડ-૩ ના પદો પર બઢતી (Promotion) મેળવવાની પ્રક્રિયા વધુ સરળ, સ્પષ્ટ અને નિયમિત બની જશે.
