Donald Trump: ‘હું ન હોત તો તમે જેલમાં હોત’: ટ્રમ્પનો નેતન્યાહૂને કડક સંદેશ
અમેરિકી રાષ્ટ્રપતિ ડોનાલ્ડ ટ્રમ્પે લેબનોન પર ઈઝરાયેલના વધતા આક્રમણને રોકવા માટે હસ્તક્ષેપ કર્યો છે. સોમવારે (1 જૂન) રાષ્ટ્રપતિ ટ્રમ્પે સોશિયલ મીડિયા પ્લેટફોર્મ ‘ટ્રુથ સોશિયલ’ પર માહિતી આપી હતી કે તેમણે ઈઝરાયેલના વડાપ્રધાન બેન્જામિન નેતન્યાહૂ સાથે ટેલિફોનિક વાતચીત કરી છે અને તેમને બેરૂત પર મોટો હુમલો ન કરવા માટે સમજાવ્યા છે. આ દરમિયાન નેતન્યાહૂએ પોતાના સૈનિકોને પાછા ખેંચવાનો નિર્ણય લીધો છે.
ગરમાગરમ વાતચીત અને ટ્રમ્પની ચેતવણી
અમેરિકી મીડિયા રિપોર્ટ્સ અનુસાર, ટ્રમ્પ અને નેતન્યાહૂ વચ્ચેની આ વાતચીત ખૂબ જ તણાવપૂર્ણ અને ‘ગરમાગરમ’ હતી. એક્સિયોસ (Axios) ના અહેવાલ મુજબ, ટ્રમ્પે નેતન્યાહૂને સ્પષ્ટ શબ્દોમાં ખખડાવ્યા હતા. ટ્રમ્પે કથિત રીતે નેતન્યાહૂને કહ્યું હતું કે, “જો હું ન હોત, તો તમે આજે જેલમાં હોત. હું તમને બચાવી રહ્યો છું, પરંતુ હવે તમારી અને ઈઝરાયેલની છબી વિશ્વમાં ખરાબ થઈ રહી છે અને લોકો તમારાથી નફરત કરી રહ્યા છે.”
રાષ્ટ્રપતિ ટ્રમ્પે તેમની પોસ્ટમાં નેતન્યાહૂને તેમના જાણીતા નામ ‘બીબી’ થી સંબોધિત કરતા લખ્યું, “આજે મારી બીબી નેતન્યાહૂ સાથે વાત થઈ. મેં તેમને અપીલ કરી હતી કે તેઓ લેબનોનના બેરૂત પર કોઈ મોટો હુમલો ન કરે. તેમણે વાત માની અને સૈનિકોને પાછા બોલાવ્યા. આભાર, બીબી.”
ઈરાનનું દબાણ અને શાંતિ વાટાઘાટો
આ ઘટનાક્રમ એવા સમયે બન્યો છે જ્યારે ઈરાને લેબનોન પર ઈઝરાયેલના વધતા હુમલાઓને લઈને અમેરિકા સાથે ચાલી રહેલી શાંતિ વાટાઘાટોમાંથી ખસી જવાની ધમકી આપી હતી. ઈરાનની અર્ધ-સરકારી સમાચાર એજન્સી તસ્નીમ (Tasnim) એ સોમવારે જણાવ્યું હતું કે, લેબનોન પર ઈઝરાયેલના હુમલાઓના વિરોધમાં તેહરાનની વાટાઘાટકારોની ટીમે મધ્યસ્થીઓ દ્વારા અમેરિકા સાથેનો સંવાદ અટકાવી દીધો છે. જોકે, આ ધમકી છતાં ટ્રમ્પે દાવો કર્યો છે કે રાજદ્વારી સ્તરે વાતચીત હજુ પણ ચાલુ છે.
વૈશ્વિક પ્રતિક્રિયા અને ભવિષ્ય
આ ઘટના ઈઝરાયેલના વડાપ્રધાન માટે એક મોટો વળાંક સાબિત થઈ શકે છે. એક તરફ જ્યાં નેતન્યાહૂ દેશની અંદર રાજકીય અને કાયદાકીય મુશ્કેલીઓનો સામનો કરી રહ્યા છે, ત્યાં બીજી તરફ લેબનોન મુદ્દે અમેરિકાનું આ કડક વલણ તેમને આંતરરાષ્ટ્રીય સ્તરે એકલા પાડી શકે છે. નિષ્ણાતોનું માનવું છે કે ટ્રમ્પની આ દરમિયાનગીરી એ દર્શાવે છે કે વોશિંગ્ટન મધ્ય-પૂર્વમાં વધતા તણાવને કાબૂમાં રાખવા માટે હવે વધુ સક્રિય ભૂમિકા ભજવવા ઈચ્છે છે. આ ઘટનાએ ફરી એકવાર સાબિત કર્યું છે કે અમેરિકાનું દબાણ ઈઝરાયેલની સૈન્ય વ્યૂહરચનાને બદલવામાં મહત્વની ભૂમિકા ભજવી શકે છે. હાલમાં સમગ્ર વિશ્વની નજર ઈઝરાયેલ-લેબનોન સરહદ પરની સ્થિતિ પર ટકેલી છે.
