Apple Vs Google in AI Race: AI ની લડાઈમાં Apple Vs Google: ગૂગલ કરતાં વર્ષો પાછળ છે એપલ, એન્ડ્રોઇડ 17 ના ફીચર્સે વધાર્યું આઇફોનનું ટેન્શન
ટેકનોલોજીની દુનિયામાં આર્ટિફિશિયલ ઇન્ટેલિજન્સ (AI) ને લઈને અત્યારે જોરદાર સ્પર્ધા ચાલી રહી છે. વિશ્વની સૌથી મોટી સ્માર્ટફોન બ્રાન્ડ એપલ (Apple) હાલમાં એઆઈ ટેકનોલોજીના મામલે ભારે સંઘર્ષ કરી રહી છે. કંપનીએ વર્ષ ૨૦૨૪ માં આઇફોન યુઝર્સ માટે કેટલીક ક્રાંતિકારી એઆઈ સુવિધાઓની જાહેરાત કરી હતી, પરંતુ લાંબો સમય વીતી જવા છતાં યુઝર્સ માટે તેનો ઇન્તજાર હજુ સુધી ખતમ થયો નથી. બીજી તરફ, સર્ચ એન્જિન જાયન્ટ ગૂગલ (Google) એ એઆઈના ક્ષેત્રમાં એક પછી એક મોટા માઇલસ્ટોન (સિદ્ધિઓ) હાંસલ કરીને સ્માર્ટફોન માર્કેટ પર પોતાની પકડ મજબૂત કરી લીધી છે.
ગૂગલની આક્રમક એઆઈ સ્પીડ સામે એપલે એક સમયે પોતાના હાથ ઊંચા કરી દીધા હતા અને પોતાના વોઇસ આસિસ્ટન્ટ ‘સિરી’ (Siri) સહિતના અન્ય ફીચર્સને સ્માર્ટ બનાવવા માટે ગૂગલ સાથે હાથ મિલાવ્યા હતા. હવે ગૂગલ દ્વારા તેનું લેટેસ્ટ સોફ્ટવેર ‘એન્ડ્રોઇડ ૧૭’ (Android 17) રજૂ કરવામાં આવ્યા બાદ બંને કંપનીઓ વચ્ચેનો એઆઈ ગેપ (તફાવત) એકદમ સ્પષ્ટ દેખાઈ રહ્યો છે.
એપલની દરેક નાની-મોટી હિલચાલ પર બારીકાઈથી નજર રાખનારા બ્લૂમબર્ગના પ્રખ્યાત ટેક જર્નાલિસ્ટ માર્ક ગુરમેન (Mark Gurman) ના જણાવ્યા અનુસાર, એઆઈના મામલે ગૂગલની બરાબરી કરવામાં એપલને હજુ ઘણા વર્ષો લાગશે. ગુરમેને તાજેતરમાં જણાવ્યું છે કે, એપલની હાલની કામ કરવાની ગતિ જોતાં એવું લાગે છે કે તેને ગૂગલના વર્તમાન સ્તર સુધી પહોંચવામાં હજુ ઓછામાં ઓછા ૧ થી ૨ વર્ષ વધુ લાગશે. સૌથી મોટો પડકાર એ છે કે જ્યાં સુધી એપલ ત્યાં પહોંચશે, ત્યાં સુધીમાં ગૂગલ અને ઓપનએઆઈ (OpenAI) જેવી અન્ય અગ્રણી કંપનીઓ તેનાથી ઘણી આગળ નીકળી ચૂકી હશે. અગાઉ ૨૦૨૪ માં ગુરમેને દાવો કર્યો હતો કે ગૂગલ એઆઈ ડેવલપમેન્ટ મામલે એપલ કરતાં ૨-૩ વર્ષ આગળ ચાલી રહ્યું છે.
એપલના કયા ફીચર્સનો ઇન્તજાર હજુ પણ યથાવત છે?
ગૂગલે પોતાના નવા ‘એન્ડ્રોઇડ ૧૭’ અપડેટમાં એવા અદભુત એઆઈ ફીચર્સ પહેલેથી જ લોન્ચ કરી દીધા છે, જેની એપલે માત્ર કાગળ પર જાહેરાત કરી હતી. વર્ષ ૨૦૨૪ માં એપલે આઇફોનની કસ્ટમ એપ્સ અને સર્વિસીસમાં આર્ટિફિશિયલ ઇન્ટેલિજન્સ ઇન્ટિગ્રેટ કરવાની તેમજ હોમ સ્ક્રીન વિજેટ્સને ઓટો-જનરેટ કરવા જેવા ફીચર્સની જાહેરાત કરી હતી. એપલ હજુ પણ આ ફીચર્સના ટેસ્ટિંગ અને ડેવલપમેન્ટ પર જ કામ કરી રહી છે, જ્યારે ગૂગલે તેના એન્ડ્રોઇડ યુઝર્સ માટે આ તમામ સુવિધાઓ ક્યારનીયે રોલ આઉટ (લાઈવ) કરી દીધી છે.
WWDC 2026: એપલ માટે ‘કરો કે મરો’ ની સ્થિતિ
આગામી જૂન મહિનામાં એપલની વાર્ષિક મેગા ઇવેન્ટ વર્લ્ડવાઈડ ડેવલપર્સ કોન્ફરન્સ (WWDC 2026) યોજાવા જઈ રહી છે. ટેક એક્સપર્ટ્સના મતે, આ કોન્ફરન્સ એપલના ભવિષ્ય માટે ‘કરો કે મરો’ (Do or Die) જેવી સાબિત થશે. આ વૈશ્વિક મંચ પર કંપનીએ દુનિયાને સાબિત કરવું પડશે કે તે એઆઈની આ આધુનિક રેસમાં મજબૂતાઈથી ટકી રહી છે. જો એપલ આ ઇવેન્ટમાં કોઈ મોટો ધડાકો નહીં કરી શકે, તો તેણે તેના કરોડો વફાદાર યુઝર્સ અને રોકાણકારોને આ વિલંબ પાછળનું સચોટ કારણ આપવું પડશે.
જોકે, અહેવાલો અનુસાર એપલે આ કોન્ફરન્સ માટે પડદા પાછળ જોરદાર તૈયારીઓ શરૂ કરી દીધી છે. એપલ આવતા મહિને ગૂગલના શક્તિશાળી ‘જેમિની એઆઈ’ (Gemini Model) થી સજ્જ તદ્દન નવા સ્માર્ટ ‘સિરી’ (Siri) ની પ્રથમ સત્તાવાર ઝલક દુનિયા સામે રજૂ કરી શકે છે. આ નવું સિરી ઓપનએઆઈના ChatGPT જેવા ચેટબોટ્સને જોરદાર ટક્કર આપશે. તેમાં યુઝર પ્રાઇવસીને ટોચની અગ્રતા આપતાં ‘ઓટો ચેટ ડિલીટ’ નો ઓપ્શન પણ મળશે. આ ક્રાંતિકારી અપડેટને સપ્ટેમ્બર ૨૦૨૬ માં લોન્ચ થનારા iOS 27 ની સાથે સત્તાવાર રીતે તમામ આઇફોન યુઝર્સ માટે રોલ આઉટ કરવામાં આવે તેવી પૂરેપૂરી શક્યતા છે.
