Cyber Attacks: દુનિયાના ૪૦% ડિજિટલ હુમલાઓ પાછળ ચીનનો હાથ, જાણો ક્યાં બેઠા છે સૌથી ખતરનાક હેકર્સ

Cyber Attacks: માઇક્રોસોફ્ટનો ચોંકાવનારો રિપોર્ટ: ચીન, રશિયા અને ઉત્તર કોરિયાના હેકર્સ વૈશ્વિક અર્થતંત્ર માટે બન્યા મોટો ખતરો

આજના આધુનિક યુગમાં સમગ્ર વિશ્વ ઈન્ટરનેટ અને ડિજિટલ ટેકનોલોજી પર સંપૂર્ણપણે નિર્ભર બની ચૂક્યું છે. બેંકિંગ, શોપિંગ, ઓફિસના કામકાજથી લઈને અંગત વાતચીત સુધીની દરેક નાની-મોટી પ્રક્રિયા ઓનલાઈન થઈ રહી છે. ટેકનોલોજીએ માનવ જીવનને અત્યંત સરળ અને ઝડપી જરૂર બનાવ્યું છે, પરંતુ તેની સાથે સાયબર ક્રાઈમ (Cyber Crime) નું જોખમ પણ એટલી જ ઝડપે વધ્યું છે. વર્તમાન સમયમાં સ્થિતિ એવી ગંભીર છે કે માત્ર ગણતરીની મિનિટોમાં જ કોઈ વ્યક્તિનું આખું બેંક એકાઉન્ટ ખાલી થઈ શકે છે, ખાનગી ડેટા ચોરી થઈ શકે છે અને મોટી વૈશ્વિક કંપનીઓના કરોડો રૂપિયાના સર્વર ઠપ થઈ શકે છે.

જ્યારે પણ મોટા સાયબર હુમલાના સમાચારો હેડલાઇન્સ બને છે, ત્યારે સામાન્ય લોકોના મનમાં એક પ્રશ્ન ચોક્કસ ઉઠે છે કે આખરે આ ડિજિટલ હુમલાઓ ક્યાંથી થાય છે અને દુનિયાના સૌથી ખતરનાક હેકર્સ કયા દેશમાં બેઠા છે? આ પ્રશ્નનો ટેકનિકલ જવાબ ઘણો જટિલ છે, પરંતુ અનેક આંતરરાષ્ટ્રીય અહેવાલોએ એવા દેશોની કુંડળી જાહેર કરી છે જ્યાંથી સૌથી વધુ સાયબર ગુનાઓ ઓપરેટ થાય છે.

ગ્લોબલ સાયબર થ્રેટ (Global Cyber Threat) ના અહેવાલો મુજબ, વિશ્વમાં થતા કુલ સાયબર હુમલાઓનો સૌથી મોટો હિસ્સો ચીન સાથે જોડાયેલા નેટવર્ક અથવા ત્યાંના હેકર જૂથો દ્વારા થાય છે. આંકડા દર્શાવે છે કે દુનિયાભરના અંદાજે ૪૦ ટકા સાયબર એટેક ચીની IP એડ્રેસ અથવા ચીન પ્રેરિત હેકર નેટવર્ક દ્વારા સંચાલિત થાય છે.

ચીન અને રશિયાના હેકર્સની ખતરનાક રણનીતિ

• ચીની હેકર્સ (કોર્પોરેટ જાસૂસી): સાયબર નિષ્ણાતોના મતે, ચીનના હાઈ-ટેક હેકર જૂથો મુખ્યત્વે કોર્પોરેટ જાસૂસી કરવા, અન્ય દેશોની સંવેદનશીલ સરકારી માહિતીઓ ચોરવા અને મોટી વૈશ્વિક કંપનીઓની સિક્રેટ ટેકનોલોજી હસ્તગત કરવા પર ફોકસ કરે છે. આ હુમલાઓ પાછળ માત્ર પૈસા કમાવવાનો ઉદ્દેશ્ય નથી હોતો, પરંતુ વ્યૂહાત્મક અને તકનીકી ક્ષેત્રે વૈશ્વિક સરસાઈ મેળવવાનો હોય છે.

• રશિયન હેકર્સ (રેન્સમવેરના કિંગ): સાયબર હુમલાની યાદીમાં રશિયાનું નામ પણ ટોચ પર આવે છે. રશિયાના હેકર જૂથો ખાસ કરીને ‘રેન્સમવેર’ (Ransomware) હુમલાઓ માટે સમગ્ર વિશ્વમાં બદનામ છે. આ પ્રકારના હુમલામાં તેઓ કોઈપણ મોટી કંપની કે સંસ્થાની સિસ્ટમને ઓનલાઈન લોક (હાઈજેક) કરી દે છે અને તે સિસ્ટમ અનલોક કરવાના બદલામાં કરોડો રૂપિયાની ખંડણી માંગે છે. આ સિવાય તેઓ DDoS (ડિસ્ટ્રિબ્યુટેડ ડિનાયલ ઓફ સર્વિસ) એટેક પણ કરે છે, જેમાં કોઈપણ વેબસાઈટ પર એટલો બધો ફેક ટ્રાફિક મોકલવામાં આવે છે કે તે વેબસાઈટ ક્રેશ થઈ જાય છે. વૈશ્વિક સાયબર હુમલામાં રશિયાની હિસ્સેદારી ૧૫ થી ૨૫ ટકાની વચ્ચે છે.

માઇક્રોસોફ્ટ ડિજિટલ ડિફેન્સ રિપોર્ટનો ખુલાસો

વિશ્વવિખ્યાત અમેરિકી ટેક કંપની માઇક્રોસોફ્ટના ‘ડિજિટલ ડિફેન્સ રિપોર્ટ ૨૦૨૫’ અનુસાર, વિશ્વમાં ચાર દેશો – ચીન, રશિયા, ઈરાન અને ઉત્તર કોરિયા ના હેકર્સ સૌથી વધુ સક્રિય છે. આ દેશોના સાયબર ગુનેગારો વિવિધ દેશોના પાવર ગ્રીડ (વીજળી નેટવર્ક), સંરક્ષણ પ્રણાલી (Defense Systems), હોસ્પિટલો અને સરકારી સંસ્થાઓના ડેટાબેઝને નિશાન બનાવી રહ્યા છે. ઉત્તર કોરિયા પર લાંબા સમયથી ક્રિપ્ટોકરન્સીની ચોરી અને મોટા નાણાકીય સાયબર ફ્રોડ કરવાનો આરોપ લાગતો રહ્યો છે.

જોકે, સાયબર સિક્યોરિટી એક્સપર્ટ્સનું એવું પણ માનવું છે કે કોઈ હુમલો જે દેશના લોકેશન પરથી દેખાતો હોય, તે હુમલો ત્યાંથી જ થયો હોય તે જરૂરી નથી. હેકર્સ પોતાની અસલી ઓળખ અને લોકેશન છુપાવવા માટે હાઈ-લેવલ પ્રોક્સી VPN, ક્લાઉડ સર્વર્સ અને અન્ય દેશોના ડાર્કવેબ નેટવર્કનો ઉપયોગ કરે છે, જેના કારણે તેમની સાચી લોકેશન ટ્રેસ કરવી અત્યંત મુશ્કેલ બને છે.

સાયબર હુમલાથી સૌથી વધુ પ્રભાવિત બનેલા દેશો