Google Chrome: ક્રોમ બ્રાઉઝરમાં જોવા મળી ગંભીર ખામી; જાણો કેવી રીતે તમારા સિસ્ટમને સાયબર અટેકથી બચાવવું
જો તમે ઈન્ટરનેટ સર્ફિંગ માટે ગૂગલ ક્રોમ (Google Chrome) નો ઉપયોગ કરો છો, તો તમારે અત્યારે જ સાવધાન થઈ જવાની જરૂર છે. ભારત સરકારની સાયબર સુરક્ષા એજન્સી CERT-In (Indian Computer Emergency Response Team) એ ક્રોમ બ્રાઉઝરમાં કેટલીક અત્યંત ગંભીર સુરક્ષા ખામીઓ શોધી કાઢી છે. આ ખામીઓનો ફાયદો ઉઠાવીને સાયબર ગુનેગારો તમારા કમ્પ્યુટર કે લેપટોપ પર નિયંત્રણ મેળવી શકે છે અને તમારો પર્સનલ ડેટા ચોરી શકે છે.
કયા યુઝર્સ પર છે સૌથી વધુ જોખમ?
CERT-In ના રિપોર્ટ અનુસાર, જો તમે નીચે જણાવેલ વર્ઝનથી જૂનું બ્રાઉઝર વાપરો છો, તો તમારું સિસ્ટમ જોખમમાં છે:
વિન્ડોઝ અને મેક (Windows & Mac): વર્ઝન 148.0.7778.96/97 થી જૂના તમામ વર્ઝન.
લિનક્સ (Linux): વર્ઝન 148.0.7778.96 થી જૂના તમામ વર્ઝન.
હુમલાખોરો કેવી રીતે નુકસાન પહોંચાડી શકે?
આ સુરક્ષા ખામીઓ એટલી ગંભીર છે કે હુમલાખોરો દૂર બેઠા બેઠા (Remotely) તમારા સિસ્ટમને નિશાન બનાવી શકે છે:
માલેશિયસ લિંક્સ: અટેકર્સ તમને કોઈ એવી લિંક મોકલી શકે છે જેના પર ક્લિક કરતા જ તમારા બ્રાઉઝરની સુરક્ષા દિવાલ (Security Bypass) તૂટી જાય છે.
ડેટા ચોરી: તમારા સેવ કરેલા પાસવર્ડ, બેંકિંગ વિગતો અને અન્ય ખાનગી દસ્તાવેજો ચોરી થઈ શકે છે.
માલવેર ઇન્સ્ટોલેશન: તમારી જાણ બહાર સિસ્ટમમાં જોખમી સોફ્ટવેર ઇન્સ્ટોલ થઈ શકે છે જે તમારા કમ્પ્યુટરને કાયમી ધોરણે ઠપ કરી શકે છે.
સિસ્ટમ ક્રેશ: હુમલાખોરો તમારા બ્રાઉઝરને વારંવાર ક્રેશ કરાવી શકે છે, જેનાથી તમારું કામ અટકી શકે છે.
ટેકનિકલ ખામીઓ ક્યાં છે?
એજન્સીએ જણાવ્યું છે કે ક્રોમના ‘રેન્ડરિંગ એન્જિન’, ‘ગ્રાફિક્સ પ્રોસેસિંગ’ અને ‘મેમરી હેન્ડલિંગ’ જેવા મહત્વના ભાગોમાં ખામીઓ જોવા મળી છે. આ ઉપરાંત ઇનપુટ વેલિડેશન અને મેમરી એરરને કારણે પણ સુરક્ષામાં છીંડા જોવા મળ્યા છે.
બચાવ માટે શું કરવું? (તમારા બ્રાઉઝરને અત્યારે જ અપડેટ કરો)
ગૂગલે આ ખામીઓને ઠીક કરવા માટે નવા સિક્યોરિટી પેચ (Security Patches) જાહેર કર્યા છે. તમારી સુરક્ષા માટે નીચેના સ્ટેપ્સ અનુસરો:
તમારા કમ્પ્યુટરમાં Google Chrome ઓપન કરો.
જમણી બાજુ ઉપરના ખૂણે આપેલા ત્રણ ડોટ્સ (Menu) પર ક્લિક કરો.
નીચે આપેલા ‘Help’ સેક્શનમાં જાઓ અને ‘About Google Chrome’ પર ક્લિક કરો.
અહીં ગૂગલ ક્રોમ આપમેળે નવું અપડેટ ચેક કરશે અને ડાઉનલોડ કરવાનું શરૂ કરશે.
અપડેટ પૂર્ણ થયા પછી બ્રાઉઝરને ‘Relaunch’ કરો.
